ХIурмат бусса Юсуп ХIа­мидович!
Совет Союзрал Виричу ХIажи Бугъановлул цIанийсса фондрал чулуха дакIнийхтуну барчаллагь тIий ура вихь, цинярдагу ва фондрал дуллалисса давурттал чIарав ацIлай, ххуйсса кумаг буллай тIий. Фондгу сакин дурну, навагу мунил каялувчи хьуннина, 2011 шинал, на тавакъю бувссия вихь къачагътурал ппив-ххив дурсса ХIажи Бугъановлул гьайкал цIудуккан дан кумаг бува куну. Ина та чIумалгу ххуйсса кумаг бувссия

ХIакьинусса кьини Къизилюртуллал райондалий Султанянгиюртуллал шяраву яхъанахъисса Хъанардал жяматран цивппа буттал аьрщарая, лакрая архну бушиву асар хьун битлай акъара ина, мудангу жул чIарав ацIлай, ка-кумаг буллай. Мунин барашиннану хьунни уттигъанну, ХIажи Бугъанов увсса гьантрай, мунал ватандалийн, Хъанардал шяравун, бувкIсса Султанянгиюртуллал школалул учительтал ва дуклаки оьрчIру лавайсса хIурматрай кьамул баву инагу, Гъумучиял школалул учительтурал коллективралгу.
Виричунал ватандалийнсса аьрххи хьуссия ХIажи Бугъановлул цIанийсса фондрал сипталий сентябрь зурул 21-22 кьинирдай.
ДакIнийхтуну хъамалгу кьамул бувну, хъамакъадитансса бахшишругу дурну, тIайла бувккун тIий, вихьгу, вил хъиривчу Соня Макьаевахьгу, КIулшивуртту дулаврил управлениялул хъунама Явсупа ХIамзаевлухьгу, Гъумучиял школалул директор ЖахIпар Канкаевлухьгу, завуч Зугьра Рамазановнахьгу, цинявппагу педагогтурахь ва дуклаки оьрчIахьгу хъунмасса барчаллагь тIий ура. ЛяличIиссава барчаллагь тIий ура Лакрал райондалул полициялул хъунама Марат МахIмудовлухь ва мунал хъиривчу Закир МухIадовлухь, Полициялул ветерантурал советрал председатель Исмяил МахIаммадовлухь, уссурвал Идрис, Загьиди ва Руслан МухIадовхъахь, уссур­вал ХIамзат ва Залимхан Ибрагьимовхъахь, Виричунал гъанчу АьвдулхIалим Бугъановлухь. Мукунма барчаллагь учин ччива Хъанардал шяраву хъамал кьамул бувсса, ва шяраву мина дирхьусса Залимханнул кулпат Ибрагьимова Светланахь.
ХIурматращал,
ХIажи Бугъановлул цIанийсса фондрал
президент Давуд Бугъанов