Уттигъанну жулла республикалий лавайсса даражалий хьуссия Дагъусттаннал луттирдал «Тарки-Тау – 2015» мукьилчинсса ярмарка. Мунил хIасиллу дуллалисса ва хьхьичIунминнан бахшишру дуллалисса батIаву хьунни октябрьданул 1-нний Расул ХIамзатовлул цIанийсса Миллатрал библиотекалул конференц-залдануву.

Бадрижамал Аьлиева
Пресс-конференциялувух гьур­тту хьунни «Тарки-Тау» проектрал автор, «Горцы» литературалул кказитрал хъунама редактор Марат ХIажиев, Дагъусттаннал музейрал зузала, художник Диана ХIамзатова, Миллатрал библиотекалул директор Аьли Аьлиев, ДР-лул культуралул министрнал хъиривчу Елена Гьарунова.
Дайдихьулий Аьли Аьлиевлул барчаллагь увкунни ва ярмаркалул давурттавух хьхьичIунсса гьур­ттушинна дурну, чIарав бавцIусса цинявннахьвагу, яла-яла волонтертурахь – республикалул вузирттал студентътурахь, бувсунни ярмаркалул программалул хъуннашиврул, муний цинявппа багьайминнан бахшишру дулун чIун диял къархьушиву ва шикку дулунтIишиву.
Елена Гьаруновал цилва ихтилатраву кIицI лавгунни ва ярмарка хьушиву хъинну чIявусса инсантурал захIматрайну, муний хьушиву машгьурсса чичултращалсса, литературоведтуращалсса хьунабакьавуртту, кIул хьушиву цIу-цIусса инсантуращал, ххарину хьунабавкьушиву хьхьичIми шиннардийсса ярмаркарттай хьусса дустуращал.
Марат ХIажиевлул кIицI лавгунни ярмарка щаллу хъанахъисса кьини къадуллуну лирчIшиву бахшиш ца ххаллилсса луттирангу – ХIажимурад Доногол «Дагестанцы на русско-японской войне» тIисса (издательствалул къатта «Эпоха»). Му лайкь хьунни «Мавраевъ» издательствалул къатлул чулухасса бахшишран.
«Дагестан» издательствалул къатлул директор УмархIусман ХIажиевлул бувсунни «Тарки-Тау – 2015» луттирдал ярмаркалий язимур луттиран ккалли бувшиву Камил Чутуевлул фотоальбом «Дагестан. По дороге времени» (издательствалул къатта «Дагестан»), так ца ва ярмаркалийва бавххушиву 200-нния ливчусса луттирду.
«Тарки-Тау – 2015» ярмаркалул циняв хIасиллая тIий, ми хьунни укунсса: «Тарки-Тау – 2015» ярмаркалул Гран-приран лайкь хьунни проект «Кавказ» — Нальчик (издательство «М. и В. Котляровы); «Тарки-Тау – 2015» ярмаркалул язимур проектран ккалли бунни тарихийсса альбом «Дербентъ Дагестанской области. Стереографiческия виды старого Дербента» (составитель С. В. Дидковский; издательствалул центр «Мастер»); ОьрчIансса ва чIава жагьилтурансса язимур луттиран – А. Строкинал «Кит плывет на север» лу (КомпасГид); назмурдал язимур сборникран – А. Къардашлул сакин бувсса М. Ю. Лермонтовлул «Люб­лю я цепи синих гор…» (назмурду, поэмартту; «Дагестанское книжное издательство» ГАУ); Дагъусттаннал миллатирттал мазурдий бувксса луттирдаву язимунин ккалли бунни Т. М. Зургьаловал яру мазрайсса лу «Моя прекрасная Азбука» («Издательство НИИ педагогики» ООО); «Тарки-Тау – 2015» ярмаркалул язима художник-иллюстратор – Е. Ремезова (Окуджава Б. «Будь здоров, школяр»; издательствалул къатта «Самокат»); гуманитар элмурдал аралувусса элмийсса язимур луттиран ккалли бунни «Дербент в изобразительном искусстве. Живопись. Графика. Западная Европа. Россия. Дагестан. XVII-XXI вв.» (издательствалул къатта «Дагестан»).
«Тарки-Тау» ярмаркалул жюрилуву бивкIсса Диана ХIамзатовал бувсунни жюрилул члентуран къабигьану бивкIшиву зун, амма, мунил председатель, МГУ-рал профессор, чичу Владимир Новиковлул каялувшиндаралу жюрилул цилла даву лавайсса пишакаршиврий дуршиву.
Махъру лавхъуна чIявусса цайминналгу, бувсуна ва давривухсса цалламур гьурттушиндарая, цалвами асардая, увкуна чIявусса барчаллагьрал махъру. Дуллунни чIявуссаннан бахшишру, миннавух къачанъя республикалул оьрчIал художествалул школарттай тарбия хъанахъими, вузирдал студентътал.
Ва кьини бахшишру дуллуминнал цIардаву дия Камил Чутуевлулмур цIагу.
УмархIусман ХIажиевлул дул­лунни бахшиш цанна Марат ХIажиевлунгу. «Дагестан» издательствалул чулуха Марат ХIажиев тIайла уккантIиссар Москавлив хьунтIисса луттирдал выставкалийн.
Маратлун даргиял миллатрал «Замана» кказитрал отделданул редактор МахIаммад Рабадановлул дуллуна Ингушнал халкьуннал шаэр Сяид Чахкиевлул цIанийсса медальгу. Аьпа биву, ва чичул цIаницIун бавхIусса хъун бакъасса таварих буссар Маратлул оьрмулуву. Маратлул ва ярмаркалувухсса гьурттушиннарая тIурча, ваний гьарца шинал шайминнан кIулссар ва жагьилнал цуксса хъунмасса захIмат бихьлай уссарив укун бусравсса давриву.
Ва кьини дипломирттан лайкь хьуминнавух бия художник Па­тIимат ХIусайнова ва ванил арс Амин ХIусайнов (Лакрал театрданул директор МахIаммад ХIусайновлул кулпат ва арс).