Ттул дакIниву учительтал муданмагу бусравсса инсанталли. Буссар гайннан личIи бувну дакIнил улттулу яла чаннамур, яла гъилимур кIану, цуксса ва дуниял даххана хьурчагу.
Нава 6-мур классравун бивну, ттулла кIулши цIакь хъанай, лагма-ялтту хъанахъимур бюхлай, асарду ххи хъанан бивкIсса чIумал, Ккурккуллал дянивмур даражалул школалий зун бувкIуна Магьихъал агьулданиясса Аьвдуссаламлул ва Бариятлул кулпат – лас ва щар. Га дия 1961 шин. Ганиннин Аьвдуссалам 2 шинай Кьубиял шяраву школалул директорну зий ивкIун ия. Бариятлул тIурча, Урмайннал школалий математикну зий 3 шин хьуну дия.
Та чIун дия хъунамагу, чIивимагу учительнайн икрам буллалисса. Амма ттул учительтал чIумул бакъая ххуй буллай, гай кIиягу жагьилсса, авурсса, даврих шавкьирайсса, оьрмулух эшкьи хьусса учительтал бия. Къаттагу гайннал школалийн къаршину ккурчIавва бия. Мудан гайннал хьулуха, хIаятрава, ларзула дуклаки оьрчIру ва шяравучутал чан къашайва. Пачкъатлуву мудан тIивтIусса ссупра бикIайва. Ккашилнан ччатI, мякьнан щин дулун хIадурсса кулпат бия. Цалама, чилма личIи къаувайва.
ДакIния къабуккай Барият 1961 шинал 1-мур сентябрьданий геометриялул дарс дишин жула классравун бувкIсса. Аьвдуссалам ия тарихрал дарсру дихьлай, жул классрал каялувчигу ия. АцIрахъул шиннардий Ккурккуллал дянивмур даражалул школалий захIмат буллайгу бивкIун, гай бивзуна Гьанжилив. ХIалалсса пенсиялийн бувккун махъгу гайннал буллалисса захIмат, лагма-ялттунахсса аякьа, кумаг-ка хIисав къархьуну къаличIайва. Хьунни миннал кюрттараву захIматсса кьинирдугу. Амма ттул учительтурал, цалва буттахъая хъус кунма, бутIурай бувксса аькьлугу, учительтурал узданшивугу, ниттихъая дирсса мяърипатгу ссавурданий дурурччунни.
Таний Ккурккуллал школалий буссия чIявусса за кIулсса, хьхьичIунсса учительтал: Сулайманов Шагьумилав, Сулайманов Бадруттин, ХIажиев Пагьабутта, Гарайханов МахIаммадхан, Исяев Аьвдулла. Амма ттул дакIниву оьрмулухун ливчIунни Аьвдуссалам ва Барият. ЦIанасса чIумалгу вай чIявуминнан эбратну бур. Лайкьну дуручлай бур учительнал цIа.
Октябрь зурул 5-нний Учительнал кьини дур. Гьашину вайннал цачIу бувтсса оьрмулулгу юбилей хъанай дур. Вай шинну ларгуннича куну аькьлулул мискин къавхьунни. Вай мудангу ттул яла ххирами, ххаллилми, лавайми учительталли. На вай барча буллай бура Учительнал кьинилущал ва архIал бувтсса оьрмулул юбилейращал. ЧIа тIий бура вайннан лахъисса оьрму. Дунияллия щалихханнин битаннав. Вай ца-кIива шеърилул ххагу вайннан хас буллай бура.
Зул магьарданул чагъар
Мяърипатрал биявав,
Эбратирал хIарпирдай
Махъру щавщун биявав,
Инсаншиврул къирият
Чан хьун маритару тIий.
Ханича Аьлиева,
ш. Ккурккул
