Жагьилшиву. Дурвав ва чIумущал лащан дувансса цамур чIун? Гьич душиву къакIулли. Хъиннува хияллал ххазинарду чIявусса чIунну дикIай школалий дуклакимур. Ккуллал райондалий махъсса шиннардий хъунмасса ургъил буллай бур ялун нанисса никирал дуккаврих, му багьайсса кьяйдалий Ватан ххирану тарбия дуван.
Вай мукъурттил тIайлашиву тасттикь дуллай бур оьрчIал кIулшиву ласлансса цила багьайсса кьяйдалийсса хIалурду хIасул дуллай, цIусса школарду буллалаврил. Вана 1-мур сентябрьданий Ваччиял шяраву тIивтIунни 2 зивулийсса, 200 дуклаки оьрчI цакуну щяикIан бюхъайсса, школа.
Укунмасса школа тIивтIуссар цаппара шиннардил хьхьичI Ккуллал шяравугу. Буллай бачIи бувну бур укунмасса школа Вихьуллал шяраву. Арцу дузал къахъанахъаврийн бувну, бацIан бувссар цалсса. Лякъинхьуви ва къуртал буванссагу чаран.
Ва школа 4 шинал мутталий бувну бацIан бунни. Гьай-гьай, чара бакъа ва школа буван, байбивхьуну махъ дузал буван хъунмасса хIарачат бувссар Ккуллал райондалул бакIчи Сулайманов Сяид ХIасниевичлул.

ХIажимурад ХIусайнов
Школа тIитIлатIисса шадлугъравух гьуртту хьун бувкIун бия: Дагъусттаннал ХIукуматрал Председательнал хъиривчу Шарип Шарипов, ДР-лул КIулшиву дулаврил ва элмулул министерствалул вакил Ирина МахIаммадрасуловна, связрал министрнал хъиривчу Тамерлан Бугъанов, Экономикалул министерствалул зузала Шагьимардан Мудуев, ДР-лул Халкьуннал Мажлисрал депутат ХIасан Аьлиев, Гьарун Сяидовлул цIанийсса сакиншиннарал бакIчи Давди Увайсов, художник ХIажи Сунгъуров ва цаймигу хъамал.
Школалул хIаятраву оьрчIру ябацIансса лаххиярттаву, тIу­тIащал, учительтуращал, нитти-буттахъащал бавцIуну бия. Хъамал хьунабавкьуна школалул дарвазалул хьхьичI кIарттул ччатIущал ва нисиращал, зунттал инсантурал байраннайн лаххайсса лаххияр­ттавусса оьрчIал ва душнил. Яла хъамал ва райондалул идарар­ттал къуллугъчитал гьаз хьуна школалувун буххайсса нузардил хьхьичIсса чурттурдал ялун. Шикку Ваччиял шяраваллил цIусса школа тIитIлатIаврил мажлис бачин бувна Ккуллал райондалул бакIчи Сяид Сулаймановлул. Ванал барча бувна цинявппагу цIусса школа тIитIлатIаврищал, умуд бушиву бувсуна ва школалия букканшиву личIи-личIисса пишакартал, миллатрал аьдатру дуруччинсса инсантал.
Яла махъ буллуна Шарип Шариповлухьхьун. Ванал цалва ихтилат байбивхьуна цува хьхьичI кьинива увкIун, шикку хъанахъисса дахханашивурттащал кIул хьушиврия. «Ссят ца хьуну дия на зана хьусса чIумал», — увкуна Шарип Шариповлул. Ххуйсса, дакIнийхтунусса махъру увкуна ванал. КIицI бувна цува Хъусрал ЧIаратусса ушиву, лавгшиву бу­ттал шяравунгу. Школалун ванал бахшиш бунни телевизор.
ЦIусса школа тIитIаврищал барча буллалисса махъру лавхъуна Тамерлан Бугъановлул, Ирина МахIаммадрасуловнал, ХIасан Аьлиевлул, Давди Увайсовлул, ХIажи Сунгъуровлул.
Ирина МахIаммадрасуловнал бахшиш бувна школалун интерактивный класс, ХIасан Аьлиев­лул спортрал инвентарь дулуншиву бувсуна, Давди Увайсовлул, ХIажи Сунгъуровлул дирхьусса, Фазу Аьлиевал, Расул ХIамзатовлул, Муса Маннаровлул, Ссугъури Увайсовлул ххуйра-ххуйсса суратру бахшиш дурна. КIицI бувна Давди Увайсовлул цалла сакиншиннарал школалул хIаятравусса Гьарун Саэдовлул гьайкал дацIан дуван 50 азарда къуруш бахшиш дуршиву, мукунма кIицI бувна гьарца шинал ахирданий хьхьичIунсса оьрчIан дуллантIишиву Гьарун Саэдовлул цIанийсса, личIи-личIисса лагрурдайсса, арцуйнусса бахшишру.
Хъирив махъ лавхъуна школалул директор Бажи Мирзаевал. Ванил оьрчIру цIусса школа тIитIаврищал барчагу бувну, баян бувна 1-мур класс­равун кьамул буллалишиву оьрчIру. Вайннал учительница бия ХIусайнова ХIурия. Цалчин школалийн нанисса оьрчIан, Ккуллал райондалул администрациялул ва нитти-буттал хIарачатрайну, «Кумаг бувара оьрчIру школалийн тIайла буккан» тIисса оьвчаврийн бувну, аьркинмур дусса сумкри буллуна Ккуллал райондалул бакIчинал хъиривмур Сабрина Илиясовал. ОьрчIру къавтIун бивзуна цала цалчинсса учительницащал ва цивппа занай бивкIсса оьрчIал оьрчIал багърал хъунмур Чупанова Асбатлущал.
Яла Бажи Мирзаевал ларгсса дуккаврил шин ххуйсса кка­ккиярттай гьан дурсса оьрчIан дипломру буллуна.
Хъамаллурал кьувкьуна ятIул лента. Бивщуна ва школалий цалчинсса гюнгутIи. Хъирив школ душварал, хъинну ххуйсса лаххиярттаву, ккаккан дурна къавтIаву. Яла, 1-мур классрал оьрчIру хьхьичIну, циняв школалувун бувххуна. Школалул вив Бажи Мирзаевал экскурсиялул зумуну хъамал буккан бувна циняв классирттавух. Кла­ссирттал дузалшиврул, эмаратшиврул, жанахIравун лархъсса личIи-личIисса баннердал исвагьишиврул хIат-хIисав дакъая. Хъиннува чаннасса, гьартасса бия спортзал. Мунил кьай-кьуй дузал дуваншиву бувсуна ХIасан Аьлиевлул.
Хъамал, мукунма, бивуна Ккуллал райондалул Аьрасатнал халкьуннал аслийсса культуралул центрданийнгу.
Ванияр махъ хъамал лавгуна Хъювхъиял шяраву цIуну бакьин бувсса оьрчIал багъ тIитIин. Ва ишираяту ва Хъювхъиял шяравусса Аьрасатнал халкьуннал аслийсса культуралул центрданияту жу бусанну хъиривмур номерданий.