Сентябрьданул 4-6-нний Тамбовский областьрайсса Мичуринскалий хьуну дур щалва Аьрасатнал «День садовода» Х-сса хъуннасса выставка. Му областьрал губернатор Александр Никитиннул оьвкуну, выставкалий гьуртту хьуну ур жулла республикалия ДР-лул ХIукуматрал Председательнал хъиривчу Шарип Шарипов. Москавлив Темирязевлул цIанийсса университет къуртал баннин, Тамбовскаллал областьрайсса Чакинскаллал шяраваллил хозяйствалул техникум къуртал бувсса Шарип Исмяиловичлул ва Александр Никитиннул дусшиврул дахIаву дусса дур 1998-ку шиная шиннай. Вай кIиягу тай шиннардий архIал дуклай бивкIун бур цал аспирантуралуву, хъирив докто­рантуралуву.Выставкалул сакиншинна дурну дур Аьрасатнал Шяраваллил хозяйствалул министерствалул, областьрал ва шагьрулул администрациярттал, Мичуринскаллал элмийсса ва техникалул советрал ва цайминнал.

Шиккува кIицI лаган, «День садовода» выставка дусса дур багъирдал комплексраву ишла дувайсса ду-дакъацири техника, элмийсса ххалдигьавуртту ва цаймигу каширду тамашалун дуккан дувайсса, щалва билаятрай дурарагу дувайсса ца выставка. Цанчирча Мичуринскалий сакин дурну дусса дур агропромышленный комплексрал багъру бугьаврил элмулун хасъсса циняр шартIру. Ванийн учайсса бур агропромрал наукоград куну.
Ва выставка дуллалисса кьини кIицI ларгун дур Мичуринскаллан 380 шин хъанахъисса кьинигу, дунияллийх цIа ларгсса аьлимчу И.Мичурин увну 160 шин хъана­хъисса юбилейгу.
Выставкалий 80 азараксса инсан гьуртту хьуну ур. Вания хьуну дур багъманчитурал цалла каширду ккаккан дан бювхъусса хъунна­сса байран. Шагьрулул майданнив дурну дур, гьивчуя ва цаймигу ахъулссаннуясса нацIу-кьацIурду, нацIу щинну, дукра-къяс, мура­ппарду дукан, ххал дан ва машан ласун ччинан чIюлу дурсса, ярмаркарду, тяхъашивуртту ва цаймигу мероприятияртту.
Юбилейран хасъсса батIаврий, укун агьамсса иширащал барчагу бувну Тамбовскаллал областьрал халкь, вице-премьер Шарип Шариповлул кIицI лавгун бур, Да­гъусттаннал БакIчинал сипталий, гьашинусса шин республикалий Багъирдал шинну баян бувшиву. Мукунма бувсун бур ва даврил лагрулуву республикалий дуллалисса давурттая, бугьлагьисса жагьилсса уттизаманнул багъирдая ва дузрайн дуккан дан дакIнийсса проектирдая.
«ХIакьину Дагъусттаннай багъру бугьаврих ва миннуя хьунтIисса маэшатрах хъуннасса къулагъас дуллай буссар. Ва шинал ин­ттухунмай республикалий 1 140 гектарданий мурхьру бувгьуссар. Ккаккан дурну дуссия дугьан 567 гектар. Хъуннасса даврин ккаллийсса давур ва жул шяраваллил хозяйство ччаннай дацIан давриву. Умудгу бур зул областьращал дахIаву дурну, Мичуринскалий дуллалисса элмийсса давурттащал кIул хьуну, жучIавагу ишла буллан зул аьлимтурал захIмат», — увкуну бур шикку Ш. Шариповлул.
Выставкалул хахливу, ярмаркарду ва тяхъашивуртту дакъасса, хьуну бур элмийсса конференциярду, «ккуркки столлу» ва семинарду.