Жулла республикалий дуллай бур 29-мур Дунияллул халкьуннал даражалул литературалул фестиваль «КIяла кьурукьирттал кьинирду». Сентябрьданул 8-нний, дунияллийх цIа дурксса шаэр Расул ХIамзатов ниттил увсса кьини, фестивальданул гьурттучитал лавгунни шаэрнал къушлийн.
Хъунасса шаэр дакIнийн утан бувкIун бия ДР-лул Халкьуннал Мажлисрал Председательнал 1-ма хъиривчу Юрий Левицкий, ДР-лул ХIукуматрал Председательнал 1-ма хъиривчу Анатолий Карибов, МахIачкъалаллал администрациялул бакIчинал кIанайсса Муса Мусаев, АьФ-лул ва ДР-лул Чичултрал союзирттал члентал.
Анатолий Карибовлул аьла-ссалам бунни фестивальданийн бувкIминнахь. Ганал мукъурттийн бувну, «КIяла кьурукьру» фестивальданийн хъамал бучIаву – му цIа дурксса шаэрнал хIурмат бавур, ганал творчествалун лавайсса кьимат бищавур ва билаятрал миллатирттал дянивсса дусшиву ва цашиву цIакь давричIансса уттигу ца ша хъанахъиссар.
Шаэр дакIнийн утлатисса, ганал поэзиялул кьимат лавай буллалисса махъ лавхъунни ДР-лул Чичултрал союзрал председатель МахIаммад АхIмадовлул.
Хъамаллуралгу ххуйва-ххуйсса ихтилатру бунни, махъру лавхъунни, дурккунни шаэрнал назмурду. Яла ихтилатру хьунни ттизаманнул литературалия.
Дагъусттаннай ХIамзатовлул кьинирду хъанай дур сентябрьданул 7-9-нний. Щалва Аьрасатнава бувкIсса шаэртал, чичулт, жяматийсса ишккаккулт гьуртту хъанай бур «ккуркки столлал» батIавурттай, тематический выставкардай, хьунабакьавурттай. Сентябрьданул 9-нний хъамал лавгунни шаэрнал ватандалийн ЦIадав, яла Гъунив, Дарбантлив, Буйнакскалийн шадлугърал давурттавух гьуртту хьун.
