«Илчи» кказитрал редакциялийн хъамалу увкIунни республикалийгу, Аьрасатнавугу машгьурсса, жяматийсса ишккакку, хIакин-хирург, Дагъусттаннал бучIантIимунийгу хъуннасса дакIцIуцIаву дусса Сяидов Аьбдурашид КьурамахIаммадлул арс. Аьбдурашид яручури. Жулва кказитралгу дусри. Москавлия увкIтаригу учIайссар жул редакциялийн, жущалгу, жул буккултращалгу дакI дачIин.
Вана хIакьинугу Аьбдурашид увкIунни. Ва ппурттух хъинну хъювусулну. Мунил сававгу ххишала дакъа бунияласса диркIун дия.
— Уссу оьвтIий ия. Цува цирив ца «вихшалдарала бувкминнал сияхIраву» усса урчала тIий, полицалтрал азурда увну ура, ияйнийн ивну ура, суд-силистта къабувнува, хъирив къалавнува, райотделлайн гьар шаттирахун ххюрхху уллай, азурда уллай ура тIий. Ттул ца акъа-акъасса уссу 4 оьрчIал ппур, цувагу мяйжаннугусса инвалидри. Уссил кулпатран кумагран на «Газель» машан лавсъссия. МахIачкъалалия Агъвалилив ва кIия шилун пассажир ххилай уссия. Гьанулун ласунсса хIучча бакъанува, органнал зузалтрал, рейсгу дяличIан дурну, цIухларду бихьлай, объяснительнирду чичлачи уллай, азурда уллай ур гьарца пострай, цувагу, пассажирталгу. Ванал машиналий утти халкь щябикIангума нигьабуслай бур. Укун тIайла бакъасса иширттал ссибизан бувну, жагьилтал вацIравунгу, ИГИЛ-ллавунгу, Сириянавунгу лихълай бушиву къабувчIлачIиссарив гужирдал структурардан? На хъирив бацIан къааьркинссар, ччима ччимур зий итан аьркинссар тIий акъара. Амма инсаннал оьрмулуцIун, жандалуцIун, яхI-къириятрацIун бавхIусса иширттаву ххишала бакъа мугъаятну бикIан аьркинни, личIлулну хъирив лаян аьркинни. Бунагь бакъасса инсан нахIакь харж къахьун.
На хIакин ура. Жулла медициналулмур тагьар ци дуссарив чIаланссар ва на бусантIисса иширава. Лахьхьу-цархьхьу Хасаврайнсса ххуллий авария хьуну, ттул карав жан дуллунни бюрни хьусса оьрчIал. На муначIан ххявхссияв ттущава шайсса кумаг бан. «Скорая помощь» бучIайхту, вев-гьарай тIий ура, укунсса чIумал ишла байсса дарурттал цIарду ришлай. «Скорый помощьрай» дакъа дикIан къабучIисса 3 зат дула учав. Царагу дакъая «Анаварсса кумаграл» машиналийсса хIакинтурачIа. БучIаврил мяънарагу цир тIий ивкIра, сситтуй. Жулва аваданлувтал мизитру буллай булувкьуну бур. Цалва харжирацIух чIявусса инсантал хIажлийн тIайла буклакисса бур. Медициналунгу, инсантуран хайрданунсса цамур иширангу кумаг булларча къахъинав. Агарда гай духтуртурачIа ми на тIисса, бувагу бити 5 азарда къурушран бацIайсса даруртту бивкIссания, га жагьилгу бюхъайссия ххассал ан бюхъан.
— Махъсса шиннардий аварартту, терактру, КТО-ртту сайки къуртал хьуну дунугу, жува цIанакулгу Дагъусттаннай нигьал дазуй буру. Тагьар ттигу чIурусса чIалай дур. Гьантлия гьантлийн баяй, ай, тикку ххалбан бацIан бувсса машиналува полицанайн битлай бивкIун тIий, вайксса- тайксса боевиктал кьатI бувссар, ххит бувссар тIий. Ттуннив кIул хьун ччива га «боевик» цу ивкIссарив, циван боевик хьуну ивкIссарив. Суд-силистталий танмихI кьувкьуну мукьах, цала танмихIрайн увцуну ккаккан увну ччива. Биявав – бакъаявав къатIун. Ххуттава увксса ивкIухьурчагума, закондалул ххуллий циванни танмихI къабайсса, бигьана аьнакIи куна «уничтожать» къауллай. Ягу, вайксса хасъсса органну бунува, хъирив бавцIуну, хъирив лавну ацIан циван къаайссар, циван къаугьайссар. Балаллуя гагу, жувагу бурувччуну бикIаншиврул. Гайнналгу цинявннал оьрмулухун дардирдай личIансса нину-ппу, уссурссу бур. Гайгу цалва оьрчIал хIакъираву ташвишну личIан къааьркинни.
— Цаппара шиннардил хьхьичI радио «Свободалий» зузисса журналист Андрей Бабицкий Дагъусттаннай угьаврил чялав багьну буссия агьалинавун. Мугу Бабицкийл чIарах бацIулт цIакьсса буну тIий бакъаяча, силовиктал халкьуннал дянивсса терроризмалущал унгу-унгуну талай бушиву ккаккан бан ччай буну тIий. Мива гьантрай увгьуна Завахири, мяйжаннугусса террорист, Усама Бен-Ладеннул урчIака. Амма му угьаврилмур аваза личIину гьаз къавхьуна. Цаппара гьантри МахIачкъалаллал дуснакьравугу бувну, Завахири итаавкьуна. На муний хъинну махIаттал хьуну ивкIра. Циванни му итаавкьусса, щинни му итаакьаврия хайр хьусса? Щил тIалавшинъя му биттур дурсса? Укунсса мисаллу цаймигу буцин бюхъанссар.
— Укун оьлуркъусса тагьарданий къабикIанссарухха. Ялун бучIантIимур цукун чIалай бур вин? Ина архниягу, гъанниягу ура ва иширах уруглай. Ссайну ххассал хьунссару жува?
— Инсаннал жан ласайсса Аллагьутааьланал ихтияр инсантурал бигьанна цайнна ласласаву къатIайлар. Мукун зузиминнал ххуймуничIан буцингу къабюхъайссару. Тахсиркарнан танмихIгу закондалул ххуттайсса буван аьркинни. Конституциялул, закондалул ххуттаву зун аьркинну – къуллугъчиталгу, гражданталгу. Цамур ххуллу бакъассар. Яла хъунмур хъусгу, ххазинагу дунияллий – инсаннал оьрмур. Инсаннал жан ласланнин, хъинну хъуннасса хъирив лаяву дуван аьркинссар.
— Санкциярдалун дагьссарчала тIий, ччучлай, ккуччу дуллай духлаган дуллалисса дуки-хIачIиялия ци учинна?
— Дукиялий зулму буллай, ми духлаган дуллалаву — му жуйнма ласласисса хъунмасса бунагьри. ЧIивинияцIава на аьдат увну ура ххуллий ччатI лякъирчагума, ризкьилул, чIелмултрал буканшиврул, гьаз бувну, ппайгу увкуну, букайнан хIалалгу куну, марцIсса кIанттай бихьлай. Аллагьнал неъмат цила ххуллий ишла баншиврулли жунма гьан байсса. Зия бан бакъар. На махIаттал хъанай ура жула динчитурал, бунагьсса, цинярдагу диннал аьйлулу дихьлахьисса дукиялийсса къиялия ссихI дакъа чулий бацIаврий. Дукиялул хIурмат бакъа, ми лиян дуллалисса инсантурайн Аллагьнал сситара ликкайссар тIий тарбия хьусса халкь буру жува. Ккаши ккавксса, кьянатшиву дурхIусса. Му иш ттул няраща лялиян бан къашай.
Цамур вахIшисса ишираягу учин ччай ура. ХIан дахлахисса ттучаннайн ххяхлай, ай, исламран хIан кьамул дакъассар тIий, хIанттил шушри гъагълай, ттучанну пIякь учин буллалисса ишру хьунни жучIава. Муния «Фейсбук» чялав-чялав тIий бия. Ай, вана зун исламрал лажин тIий. КъабучIихьурча — маласара му ттучандалия ми хIачIия, махIачIара. Вил бикIу, цаманал бикIу кьакьарттувун къиялий рутIлай цучIав акъар. Маша бухлавгукун, щинчIав аьркин хъанан къадиркIукун, та машачиналгу лакьинссар цала хIанттил ттучан, дахланссар аьркинмур, хIалалмур, тIалавмур, хайрданунмур. Чил хъус, цукунсса духьурчагу, гъара дуллан ина цура? Вихь ци ихтиярди?
— Лях-карах баяйсса, ай, Дагъусттан бусурман билаятри, Республикалий шариаьт дишин аьркинссар, исламрал ххуллу бикIан аьркинссар тIутIаврил хIакъираву ци учинна?
— На Аллагьнайн вихсса инсанна, амма хIакьинусса «шариатизация» нигь рутлатисса, ялув духIлахIисса, къиялийсса, исламрайн ххют рутлатисса дур. Чунай ачирчагу хIакьину Дагъусттаннай — аьрабнал музыка, нашидру, вяъзарду бур. Цивппа ми вяъзардугу инсаннал дакIнивун ццаххандарал зурзу бутлатисса, чIявумур чIумал, дужагьрал цIараву цукунсса аькьуварду дикIантIиссарив, цукунсса танмихIру бикIантIиссарив ури бувну бусласисса, дин думагума исламрая арх уцан уллалисса бур. Масалдаран, ца вяъзардучи буслай ур: «Агар нитти-буттал чIумуй чак къабуварчан, вилттили оьрчIру шанан къахъанай, аьтIун бикIайссар, ми щяйтIаннул байссар», тIий. Вай ци вахIшисса къакрур, чантI увкусса ХХI-мур ттуршукулуха къалавхьхьусса? ОьрчI аьтIий ухьурча, щяйтIаннухун къабутлай, хIакиннайн оьвкуну, мунил багьана-савав лякъин аьркинни. Мукунсса варсагъирттал динчитурава дакI дуккан дуллай дур. Вяъзарду бикIан аьркинни инсантурал мяърипат ххуй дуван хIарачатрайсса, хъиншиврийн, хъинбалдарайн халкь кIункIу буллалисса. ВичIидирхьуманал дакIнивун чаннал нур рутIлатIисса, ххуймур буллансса ва ххуймур гьаз буллансса гъира бутлатисса. ХIакьину, тIурча, жулва динчитурах вичIидиширча ( ми тIурча Дагъусттаннал цинярдагу каналлай дия-диялсса чIумуй гъалгъа тIий бур ) чIалай бур ми личIину дукъарккусса, дунияллул культуралия, тарихрая, динная хавар чанну бусса, ялттутувасса инсантал бушиву. Гъалгъа, тIурчарив, бур га яла бюхттулния, щинчIав къакIулмур цанма кIулсса халкь кунма. На нава дин дусса, Аллагьнайн вихсса инсанна. Так на къавихссара Аллагьнал мазрая гъалгъа тIисса кунма, цанма къакIулмур жухьва буслай, жуйра дюъ дихьлахьисса, амма цанма гьарцагу дунияллул неъматру хIалал буллалисса инсантурайн. Къавихссара, «Аллагьу акбаргу» тIий, инсантурал бакIру кьукьлакьисса къачагътал исламрал агьлур тIий.
— Аьпа биву, Наби Анкаевлул (журналист) мукунминная учайссия «Аллагьнал ссурахъу цува усса куна гъалгъа тIий ур», куну. БучIанну хIакьину республикалий агьалинаву зума-ккарччулунувасса ччюрклил масъалалийнгу. Муниява муния гъалгъа тIий бунува, иширайнусса ххуйчулиннайсса дахханашивуртту дурар ттигу хIисав хъанан. Ччюрклия рязишиву — му дагъусттанлувтурал жуллара хасиятривав?
— Му масъала бюхттулсса даражалий дузал бувну бур чIаххуврайсса Чачаннал республикалий, тийх дур эбратрансса марцIшиву ва лазилакьаву. ЖучIарарив марцIшиву дувантIисса лозунгиртталу спортсментал чавай, журналистал чавай субботникирттайн буссар буккан буллай. На ура, яртал, кьюкьрай субботникирттайн ччюрклищал талан буклан жуйнна ци кьини лиркссар, тIий? Аьрщи сукку хьуну дурив? Вулкан пIякь куну дурив, хьхьири ялтту лавгун бурив? Гьарманал цала лагма-ялтту лази-лакьишиву дуварча – вана вин низам. Буттал буттахъачIагу мукунма бакъарив бивкIсса? Тайннахь марцIну бикIира тIий миннатру буллай цу ивкIссар? Ттигъанну кунна марцI дуккан дунни КОР. Амма лахьхьу-цархьхьугу Дагъусттаннал БакIчинал вакил ур телевизорданувух мува каналданул зуманив муниява гъалгъа тIий. Му республикалул бакIчитурахун дагьайсса даву дикIан къааьркинссар. Так му бурж бакIрайн лавсъсса идара цила ххуттаву кьаралданий зий бикIан аьркинссар. Муниха зузисса идарарттал даву низамрайн ва сантирайн дуртун дикIан аьркинссар. Шагьру марцIну ябаврил система сантирайн къадуртссаксса, лакьлакьаврия ва субботникирттая пайда бакъассар. Гьай-гьай, шагьрулул коммунал службарду ччюрк дукьан хъирив лаллай бакъар. Ччюрк дичай къуршив чанну буну, ччи-ччинийнгу дичлай бур. ГьануцIакул даххана дан багьлай бур санитар культуралуцIун дархIусса даву. ЧантI увкусса билаятирттай шагьрурдал базаллал, ттучаннал лагма-ялттусса кIанттурдайсса марцIшиврул жаваб дулайсса микку зузиминналли. ЖучIарагу мукунсса тIалавшинна дикIан аьркинни. Базар, ттучан лакьайхту, цайми билаятирттай, шагьрурдай, гикку зузисса машачитурал цалва зузи кIанугу, ганил лагма-ялттумургу пар-пар тIутIи бувну лавкьуну, гьунттийсса кьининин хIадур байссар. Мукун къабувну гьарча, дирхьусса диялсса аьчIа дуссар.
Цаппара цIинцI дичай къуршай, масалдаран, Гитлердул, Порошенкол ва цайминнал суратру дия. Миннан рекламарду къадуллай, на ми къуршай дишивияв цалва биялдаралусса территорияртту, кIанттурду къалакьлакьисса ишбажаранчитурал, къуллугъчитурал суратру, миннан нач хьуншиврул.
— Ихтилат банну хIакьину дунияллул инсантуравун ццах ва нигь рутлатисса, журналистурал зума-ккарччулунувасса ИГИЛ-дания. ЧIявуссаннан чIалай бур ИГИЛ Изряилнал, Американал кьюлтIсса биялалий щурущисса кунма. Ци бухьурчагу, ислам оькки-ккаккул дуллалисса, исламрайн ххют рутлатисса суккушинна дур. Вил пикрилий, му буниялттунгу исламрал суккушиннаривкьай ягу ИГИЛ-данул каних мечI битлатисса билаятирттал луркIаннив?
— Гьанугу, хIадуршиннагу дакъаний, цичIаргу цайнура цурда къашайссар. Учарухха «урша бувцIумурди къявхъ учайсса» куну. Аьрабнал билаятирттайгу махъсса шиннардий диялсса гьануцIакулсса дахханашивуртту хьунни. ЧIяруми зиянсса. Микку, махъ бакъа, «хIарачат» бувссар дунияллул хъуни хIукуматиртталгу, тийхсса ишру цалвами мурадру щаллу баву мурадрай ччанаккан буллалисса. Жагьилтал радикал ххуллийн буккайссар оьрмулул тIалавшиннарду щаллу къахъанай, лахъи лаглай ссавур духларгукун. Жунма кIулли Ливиянавугу, Сириянавугу щин оьлукъин дуллалисса дазул кьатIувсса гужругу мяйжаннугу бушиву. Амма Изряилгу, Америкагу хIакьину ИГИЛ-данул чул бувгьуну бухьунссар тIий акъара. Цанчирча миннан кIулссар гьунттий-сара ИГИЛ-данул байлсса ххутIахьхьун цивппагу бириянтIишиву. ХIакьину Сириянай ва Ливиянай къабувсса рахIму, гьунттий миннайгу къабантIиссар.
— Уттигъанну бувккуссия «Фейсбукраву» ина Республикалул БакIчинайн чивчусса чагъар.
— Ттул чагъарданул мурад — республикалул экономика, социал сфера ва культура гьаз дуваврил захIматсса хъар ларсун нанисса бакIчинан тIайлабацIу чIа тIиссия. На мунайн чивчуссия ялагу, террористурал сияхIру дуллалаву, му террорданущал талатаврил тIайласса кьяйда дакъар, ттулва пикрилий, тIий. Цанчирча оьбала ва оьхIалшиву зана дикIайссар так оьбалалийну. Цумананни кIулсса ми «сияхIирттавун» буниялттунгу террористурал цIарду цукун дагьлагьиссарив? Биялсса дагъусттанлувтал бур тIий бур хIакьину Сириянаву, Ливиянаву ва Иракьнаву ИГИЛ-данул кьюкьраву талатисса. Микку хъирив къалавну, дакI цIуцIаву къадурну дурсса силовой структурардал «профилактикалул» хIасиллугур багьана хьусса тIиссара.
Дагъусттаннан хайр-мюнпат биян бан каши дусса жагьилтал бяйкьу ххуллурдайн багьунничала, щилтагъсса тIулуй биривунничала тIий, миннан ххуллу кьукьлакьаву къатIайлассар. Жулва мурад бикIан аьркинссия ми жагьилтал бяйкьусса ххуллия буруччаву, бакIрай бацIан баву. Ватандалун хайрсса давурттахун бичаву. Нигьай бикIу, маз-кьазлий бикIу, жучIава бучIи лякъинмур баву. Гьарцагу билаятрал миллатрал хъусгу, ялун бучIантIимургу жагьилсса ник дакъарив? Гьу, зана бикIанссар тиха жулва сагъну ливчIми оьрчIру. Ххуймур лавхьхьуну бучIантIиссарив тай? Жуйнма барчаллагьрай бучIантIиссарив? Щийри тахсир Машрикьуллал билаятирттая цамур журалийсса кIулшивурттугу, тIалавшиннардугу лархьхьуну жулва жагьилтал бяйкьусса ххуллийх бачавриву. Ми хъяврин хьусса оьрчIру «хъин булланну», тIайла бацIан булланну, буручланну жува аьркинсса, миннащал зунну аьркинсса. Жулва генофонд жура духлаган дулланнув?
— ЧIявусса иш багьсса кIанай, ай, финансру диял хъанай дакъар, жува дотациялийсса республикару тIун бикIай. Циривав Дагъусттаннан диял къахъанахъисса дотациялий къабикIан?
— Буниялттунгу, жунна Аллагьутааьланал дуллуну дур ххаллилсса тIабиаьт, буллугъсса аьрщи, дунияллун дакIмяшсса щюлли хьхьири, хьхьирил эмаратсса зумарду, хъинсса бакIлахъия ласун шайсса лухччив ва аьрщив, караматсса зунттурду, арду, майданну. Дагъусттаннал агьлу цивппагу захIмат ххирашиврий цIа ларгсса агьлур. Жулва захIматгу, бюхъугу, аькьлугу зун аьркинссар жухава, гьаз буллай жулва маэшат. Амма миллионну доходрал дусса дагъусттаннал бизнесменталгума хIукуматран дагьайсса налогру дуллай бакъар. Ми бур чиплагъсса къуллугъчитал рушватирттай буччин буллай, закондалул ххуллийсса налогру дакI тIайлану, лажин кIялану хIукуматран дулаяр. Мукунма нахIу лавчIун бур къалпсса документру бувну, социал пособиярду, пенсиярду компенсациярду, субсидияртту ласласаву. Бювххун ивкIра щялусса документру бувсса «ятинталгума» бур Дагъусттаннай тIисса хавар баяйхту. Му чун нанисса ишри? Дагъусттаннал яхIлин къакьамулну бикIан аьркинссар мукунсса ишругу, дагъусттанчунал цIа кьюкьин дуллалисса кьюркьусса тIуллугу. Ххуллурдайсса низам дуруччинвагу ччай бакъар, му низам къадуруччаву сававнур чIявусса инсантал оьрмурдацIа хъанахъисса.
Медициналия, строительствалия, ххуллурду ххуйсса бакъашиврия хъунисса тIалавшиннарду дур. Амма ми масъалартту щаллу баншиврул, бюджетравун налогру дулун ччисса чансса бур. Шаттираха шаттирахун цикссагу бензозаправкарду дур. Дагъусттаннай бензиндалул нехру нанисса хханссар, амма, дула къаувкуну, царагу заправкалий чек къадулай. Шагьрулул бюджетравун нан аьркинсса арцу чIарах най чIалай дур. ТIабиаьтрал луртанная, ххазнардая дучIаймургу, агьалинан дакъарча, цаппарасса чиновниктурал жипавун най дунуккар. Мигу агьалинал ххуйсса оьрму дузал баврил балаллий бакъар.
— Ттун ххуй бивзунни «Фейсбукраву» ина патриотизмалия чивчусса текст, ай, тарбия жучIара циванни мудангу «военно- патриотическое» дикIан аьркинсса тIисса. Мяйжаннугу, циваннивав?
— Жувунма оьрчIнияцIава Ватандалухсса ччаврил асарду бутлан бикIайва. Ттул пикрилий, патриотизм му хьхьичIва-хьхьичI уссурссу, гъанчу, чIаххучу, лагма-ялттуми ххирашивур, иш багьний миннал чIарав бацIавур. Ми ххиранийри Ватангу ххирасса. Ватан ххираманавур хайр-мюнпатранну къуццу тIунна тIисса гъирагу, хъитгу бикIайсса. Мунияту ттунгу къадурчIай патриотизм аьралишивруцIун циван дархIуну дикIан аьркинссарив. Патриот акъар цала лагмацириннайн «ва цуркур, та вахабитри, гама оьккур, тама террористри» тIутIима. Патриот акъар чIарав балаллухьхьун иривманах вичIидишин, кумаг бан къаччима. Аьйкьума тIайла ацIан ан, га балаллуя уруччин ссавур дакъама. Патриот акъар цайми миллатру душман буллалима, кьюкьин буллалима. ОьрчIру тарбия буллан аьркинссар хъинну куртIсса кIулшивуртту дуллай, дуккин буллай. Дуккавривур чани бусса. Ватандалун хайрданунну зузиманая пайда ххиссар, ватандалухлу жан дуллалиманаяр тIиссара на. Гьай-гьай, ватан ххирасса чIумал, лагмацири аьзизсса чIумал, гайннахлу ччимур талатаврий жан дулун цумацагу хIадурссар.
— Жулва щалва ихтилат пашмансса хъанай чIалай бур. ДакI ххари дансса цичIав чIалай бакъарив?
— Бур. Рязи акъа икIайссияв хьхьичIава Дагъусттанная дуклан Москавлив бувкIсса оьрчIру хьхьарасса, дуккавриву хIарачат бакъасса букIлай. Утти Москавлив дуклан бувхсса жулва оьрчIру хъинну итххявхсса, дуккаврих зуву дусса, гъира ххисса, тIайласса ххуллийх нанисса оьрчIру бур. Бялахълан, вяйлиллан бувкIсса бакъар, элмулулгу, оьрмулулгу бюхттулнийн лахъансса тамахIрай бувкIсса оьрчI-душру бур.
— Жулгу ххарисса хавар. Жул кказитрал байран ялун диявай дур. ЯлунчIил жул кказитрал 25 шинал юбилей дур. Ци чIа учин ччива миллатрал кказитран?
— ХьхьичIва-хьхьичI ттун Дагъусттаннал агьалинан дакьаву ва буллугъшиву чIа учин ччива. Глобализациялул заманагу ялун бивну бухьувкун, миллатирттал рувхIанийсса ирс-ххазинардах къулагъас чан хъанай дур. Аммаки на дакI дарцIуну ура чIявусса миллатру бусса республикалий, гьарца миллатрал культурагу, колоритгу, ляличIишивугу ядувансса аькьлу биял хьунссар жунма тIий. Миллатрал маз ябаврил хъунмасса бияла бур миллатрал прессалухь. Жулва мазру тIурча – багьа бищун къашайсса ххазинар. Гьарца чулуха итххявхсса, гьунарду ххисса, чантI увкусса лакрал миллатралгу цалва кказит ябуванссар, буруччинссар, юбилейгу лайкьсса даражалий дуванссар тIий дакI дарцIуну ура. Зун тIайлабацIу баннав. Юбилейгу бюхттулсса даражалийсса миллатрал байран хьуннав.
Качар ХIусайнаевал
бувсса ихтилат чивчуссар Имара Саидовал
