Сентябрьданул 1-нний Дагъусттаннал БакIчи Рамазан АьбдуллатIипов гьуртту хьунни шадлугърал тагьардануву Семендер поселокрай цIусса 58-мур школа тIитIаврий.

ХIасан Аьдилов
Ва школалийн га кьини лавгун бур 2 азаллихъайсса дуклаки оьрчIру.
«ХIакьину Семендер поселокрай бувну бур хъунмасса школа. Иширайну хъуннасса поселокрай уттинин бакъая я дуккаврил, я культуралул, ягу цамур журалул социал объект, мукун къа­бучIия. Мукуннасса тагьарданий бур МахIачкъалагу, Каспийскгу, жулва цай­мигу шагьрурду. Ххал барча, цавагу шагьрулул къадиркIун дур градостроительствалул план», — увкунни Рамазан АьбдуллатIиповлул.
Республикалул БакIчинал бувсунни республикалий биялну бакъашиву школарду ва азарханарду. Ванал мукъурттийн бувну, махъсса 2,5 шинал мутталий ясли-садикирттай кIанттурду гьарза хьуну бур ванияр хьхьичIсса 20 шинал мутталий бувминнуяр. Бувну бур 38 дуккаврил учреждение, инсантал хъин байсса 30 учреждение. Вай гьантрай АьФ-лул ХIукуматрал Председатель Дмитрий Медведевлул качирчуну дур 10 шинайн­сса Дагъусттан хьхьичIунмай шаврил программалий, миккун итадакьин ккаккан бувну бур 140 млрд. къуруширттал. «Жува щаллу буван аьркинссар шиннардий щаллу къабуллай бивкIсса масъалартту»,- увкунни Республикалул хъунаманал.
Мунияр ххишалагу, Дагъусттаннал БакIчинал КIулшиву дулаврил ва элмулул, Шяраваллил хозяйствалул, Промышленностьрал министерстварттайн тапшур бувну бур пишакаршиврул сияхIру дуван ва школа къуртал буллалисса оьрчIахьхьун аттестатращал архIал цания ца пиша лавхьхьушиврул хIакъиравусса удостоверениегу дулун.
Республикалул каялувчитурахь барчаллагь тIутIисса махъру цIусса школа баврихлу лавхъунни МахIачкъалаллал мэр Муса Мусаевлул, школалул директор Шагане Баймурзаевал, мукунма дуклаки душнил.
Яла кьуркьунни ятIул лиссугу, ххал дунни школалул виваллил тагьаргу.