Республикалий ххуллурдай авариярду чIяру хъанахъаврил тагьар ххалдиргьунни ххуллурдай мюхчаншиву дуруччаврилсса буллалисса хIукуматрал комиссиялийгу. Микку гьурттушинна дунни ХIукуматрал Председательнал хъиривчу Рамазан Жяъпаровлул, низам дуруччай органнал ва транспортрал предприятиярттал вакилтурал, министерствардал хъуниминнал.

П. Рамазанова
« 2015 шинал январь зуруя июль зуруйннин 852 ДТП-рду хьуну дур (ми хъанай дур 2014 шиналнияр 32 % гьарзану), ливтIуну ур 270 инсан (2014 шиналнияр 8% гьарзану). Ми авариярттаву 1152 инсаннан цIунцIияртту хьуну дур, мигу ларг­сса шинал вара чIумалнияр 40 % чIярусса хъанай дур. Мукунсса тагьар дур республикалий ххуллурду бакьин буллай, цIубуккан буллай бунува, профилактикалул давурттив дуллай буна. Укун кьурчIисса ва пашмансса хIасиллу дикIан къааьркинссар, мукъурттия давурттайн бувчIун зун чIунссар», — увкунни вице-премьернал. Мура тагьардания гьарза-гьартану бувсунни МВД-лул ГИБДД-лул Управлениялул хъунаманал бурж чIумуйну бартбигьлагьисса Тарлан Герейхановлул. Мунал бувсмунийн бувну, аварияртту чIяру хъанахъаврил савав дур шагьрурдай агьалинал аьдад хъун хъанахъаву ва машинартту чIяву хъанахъаву. « Хаснува къаххуйсса тагьар дур федерал шагьраххуллул участокру дусса МахIачкъала, Избербаш, Къизляр, Къизилюрт шагьрурдай. Амма зунттал районнайгу тагьар мукунна лащинсса дур », — увкунни госавтоинспекторнал. ЛичIинура къулагъас дурна муххал ххуллул переездирттал тагьарданух.
Тарлан Герейхановлул кIицI лавгунни ххалдиргьусса ми переездирттава 60 % мюхчаншиврул кьараллая архсса душиву. « Жу цимилагу чичару кIанттул властирдайн, муххал ххуллул переездру ва шагьраххуллу ца лагрулий хIала бухлахисса кIанттурду бикIан къааьркиншиву, амма минналгу мудан, арцу дакъашиврийн бувну, цамур чаран бакъар тIисса жаваб дулай », — увкунни Тарлан Герейхановлул. Шагьраххуллурду цукунсса тагьарданий буссарив балжину бувсунни Транспортрал ва ххуллурдал хозяйствалул агентствалул хъунаманал хъиривчу МахIаммад ТIагьировлул. Гьаз бунни миккува Дарбантуллал ххуллурду бакьин баврилмур масъалагу. Юбилейрайнсса хIадуршинна дуллалисса ГКУ-рал дирекциялул хъунаманал хъиривчу Шагьимардан СалихIовлул бувсунни Дарбантлив 13 кIичIиравалу ва 4 парк бакьин буллай бушиву. Мукунма ххуллурдай оьрчIан цIунцIияртту къахьуншиврул дуллалисса ва дуллантIисса давурттаягу бунни ихтилат заседаниялий.