«Оьрмулуву чувшиву дувансса кIанттурду къачанссар», — куну бивкIссар цила чIумал жула хъунасса чичу Максим Горькийл. Иширах бургарча, га къааьйкьуну ур. Вай мукъурттил тIайлашиву тасттикь дуллай бур чIун-чIумуй жулва, дагъусттаннал, жагьилтал. Яла махIатталсса зат ци бур учирча, чувшиву дуванна тIий ганиннин дакIний дургьуну дуллай бакъарча, цакуну дуллай бур. Мунияту цIунилгу Максим Горький: «АхIмакьсса къучагъшивруха жува балай тIиссару».

Вайнна жулва оьрмулувасса мисаллу.
Июльданул 24-нний 2013-ку шинал, Хипил тIисса Табасараннал райондалиясса Марат Рахметов цала ссурахъищал игьалаглай ивкIун ур Звенигород тIисса шагьрулул чIарах нанисса Москва неххал зуманив. Кумаграй оьвтIисса чIу бавну, Марат неххавун ххявххун ур, бюкьлакьисса кIива душнин кумаг буван. Ванаща бювхъуну бур 14 шинавусса Юля Акиньева ва Репсиме Керогян ххассал буван. Цащава щинава уккан хьуну бакъар.
Июльданул 6-нний 2015-ку шинал 5-мур классраву дуклакисса ЦIумадиял райондалия­сса МахIаммад Сабигулаевлул оькьлакьисса 4 шинавусса оьрчI ххассал увну ур. Ишмур хьуну бур укун. КIия дус тIуркIу тIий ивкIун ур ца хъунбакъасса бярнил чIарав. Мукьра шинавусса Адам Зиявдинов бярничIан гъан хьуну, ччех ивкIун, 2 метралул куртIсса бярув агьну ур. Ганал дус левчуну ур ххуллийн, кумаг бувансса инсаннах луглай. Му чIумал ванайн бакIрайн агьну ур МахIаммад Сабигулаев. Ванал ххассал увну ур Адам.
Ва шинал июльданул 10-нний Хазар тIисса Дарбантуллал райондалийсса шяравасса Раджабаьлиев Султаннул ххассал бувну бур бюкьлакьисса душ, амма цащава ххассал хьун бювхъуну бакъар.
Султаннун, цаймигу Каспий хьхьирил зуманив бигьалаглагисса инсантуран кунма, кумаг бувара тIисса чIу бавну бур. Ванал гужирай ххассал бувну бур Саидова ПатIима (2003-ку шинал бувсса), Табасараннал райондалийсса Хучни шяравасса МахIачкъалалив яхъана­хъисса душ. Цащава хьхьирива уккан хьуну бакъар. Султан увну ур Дарбантуллал райондалийсса Хазар шяраву, дуклайгу ивкIун ур шиккува. Школа къуртал бувайхту дуклан увххун ур Минскаллал медучилищалувун. Зий ивкIун ур Дарбантливсса СИЗО-2 дуснакьраву фельдшерну. Запасрал хъунама лейтенантнал чиндалуву ивкIун ур. Хъирив Султан лавгун ур Тюменнал областьрайн. Тикку ишбажаранчишиву дуллай ивкIун ур. Бувну бур кулпат. Хъуни буллай ивкIун ур 2 арс ва ца душ. Бувну бур къатри, лавсун бур машина.
Июль зурул цалчинми гьант­рай кулпатращал Султан увкIун ур гъанссанначIан. Га кьини цала оьрчIащал хьхьирийн щинавун учIан лавгун ивкIун ур. Шаппай бачинну тIисса лахIзалуву кумаг бувара тIисса чIу бавну бивкIун бур. Дагъусттаннал Огни шагьрулий яхъанахъисса Альбина Рабадановал яруннил хьхьичIа бакъа хьуну бивкIун бур 12 шинавусса, МахIачкъалалия цичIанма хъамалу бувкIсса, гъансса душ Саидова ПатIима. Хьхьирил щатIал душ лавсун лавгун бур хьхьиривун сайки 100-150 метралул архну. Цала шяравасса 2 жагьилнащал Султан увххун ур хьхьиривун душ ххассал буван. Цува уххайхту, ганал душ гайминнахьхьун буллуну бур. Цахъис цува игьалаган ацIанна куну бивкIун бур гьалмахтурахь. Душ ххассал буллай, ганин кумаг буллалисса инсантуран Султан хъамаивтун ивкIун ур. Цахъис хIаллава Султан хьхьирил зуманив увтун ур, амма хIакинтураща га ххассал уван къавхьуну бур. Султаннун дурагу 42 шин диркIун дур. Султаннул цакьнивагу мукуна инсан ххассал увну ивкIун ур. Амма гьашину хьумур иш махъва-махъсса хъанай бур.
Марат Рахметовлун ва Ма­хIаммад Сабигуллаевлун хIукуматрал чулуха дуллуну дур медаллу. Умуд бур мукуннасса медаль дулунссар Раджабаьлиев Султаннунгу тIисса.
АхIмакьсса къучагъшивруха жува балай тIиссару!
Тахмираз Имамов
Таржума бувссар ХIажимурад ХIусайновлул