Июльданул 29-нний Дагъусттаннал БакIчи Рамазан АьбдуллатIипов гьуртту хьунни СКФО-рал Социал-экономикалул масъаларттал хIакъиравусса ХIукуматрал комиссиялул заседаниялий. Заседание хьунни Аьрасатнал премьер-министр Дмитрий Медведевлул каялувшиврулу.
Ххалбигьлай бия СКФО-рал промышленностьрал ва агропромышленностьрал комплексру импортозамещениялул хахливу лябуккан баврил ва мукунма «2025 шинайннин Ухссавнил Ккавкказуллал федерал округ лябуккан баву» тIисса АьФ-лул паччахIлугърал программа ххуй даврицIун бавхIусса масъалартту.
ХIукуматрал Председательнал дакIнийн бувтунни Ухссавнил Ккавкказуллал циняв регионнай цIакь дурну душиву импортозамещениялун кумагрансса планну, промышленностьраву ва агропромышленностьрал комплексраву щаллу дансса инвестпроектирдал сияхIру.
«Дунияллул рынокирттайсса хIалкьазия, экономикалувусса тагьар уттигу бигьасса дакъар. Жунма цинявннан зун багьну бур бюджет ссуссукьу бувсса тагьардануву. Жунма аьркинну бур Ухссавнил Ккавкказрай промышленность ва шяраваллил хозяйство лядуккан дуллансса тагьар дузал дуллан. Жу кабакьланну импортозамещениялул иширттаха зузисса проектирттан, Аьрасатнал цIусса технологияртту хIадургу дурну хьхьичIуннайгу дуллалисса проектирттан, Аьрасатнаву цIусса продуктру дуккан дуллалисса проектирттан, захIматрал рынокрай тагьар ххуй дуллалисса проектирттан», — увкунни Дмитрий Медведевлул.
КIилчинмур масъалалул хIакъираву премьер-министрнал бувсунни, 2016-2020 шиннардинсса «Развитие Северо-Кавказского федерального округа на период до 2025 года» тIисса паччахIлугърал программалун тIайла дуккан ккаккан бувну бушиву 150 млрд. къуруширттаяр ххишаласса арцу.
Комиссиялул заседаниялий ихтилатру бунни Аьрасатнал промышленностьрал ва машлул министр Денис Мантуровлул ва АьФ-лул Шяраваллил хозяйствалул министр Александр Ткачевлул, яла махъру буллунни Ухссавнил Ккавкказуллал регионнал бакIчитурахьхьун.
Дагъусттаннал БакIчи Рамазан АьбдуллатIиповлул бувсмунийн бувну, Дагъусттаннай ятту ябаврил масъала захIматну бакъар, амма захIматшиву дур яттил дикIуя цайми продукция давриву ва ми гьарзат машай дуккан давриву.
Региондалул каялувчинал хъуннасса къулагъас дуллай ур къюмай тIутIи бугьаврих ва переработкалух промышленностьрах. Ганал бувсунни республикалий консервартту дайсса КIикIуниннал заводрал цIусса цех баврия. Мукунма ганал бувсъсса куццуй, республикалий чIявусса стройматериаллу цайми кIанттурдаяту ласайсса душиву, республикалий цилва стройиндустрия бансса луртанну дуна. Мунийн бувну, АьФ-лул минпромторгращал цачIу цаппара проектру хIадур дансса пикри бур.
Рамазан АьбдуллатIиповлул бувсунни мукунма, аьралуннал – промышленностьрал комплексраву тамансса заказру душиву. «Агарда му капиталозамещениягу ласурча, ттул пикрилий, республикалул промышленностьраву тамансса лябукку хьунссия» увкунни республикалул хъунаманал.
