МАХIАММАДЛУЛ ДУШ КЬУРБАНОВА ГЬИДАЯТ
Рамазан зуруй, ца-кIива гьантта цIуцIи шанийгу бувну, оьрмулул 48 шинаву дунияллия лавгунни Цалчинмур ЦIувкIратусса, Каспийск шагьрулий яхъанахъисса, МахIаммадлул ва Пакиятлул душ Кьурбанова Гьидаят.
Каспийскалий хъунма хьусса Гьидаят школа къуртал байхту зун бувхссар «Дагдизель» заводрайн слесарь-сборщикну.
Цуппа дунияллия гьаннингу зий буссия му заводрай. Щар хьуну буссия Кьурбанов Юсуплун, лякьлул оьрчI къавхьуна Гьидаятлул. Му буссия хъинну ас-ламус бусса, даймунил-дитаймунил сант кIулсса, учаймур-бусаймур мяърипатрайсса, захIмат ххирасса инсан. Цуппа зузисса коллективравугу Гьидаят хIурматрай буссия, цуяца инсаннан къаччан бикIан къабайсса, дакI-аьмал хъинсса, ххуймур буван чялиш буккайсса буссия. Аьзизсса ласнангу, ласнал ляхъиндалунгу ххирассия.
Агьлу-авлад гъюжу буккан бувансса нязаннийсса бивкIу хьунни жул Гьидаятлун. Цув алжаннул ххари буваннав, гьаттай нур дизаннав! Гьидаятлул бивкIулул кьурчIишиву кIидачIлай, жижара буллай буру ниттихь Пакиятлухь, ласнахь Юсуплухь, уссу Муслимлухь, ссурвал Майсаратлухь ва Мугьажиратлухь, ниттиуссу Бадруттиннухь, цинявппагу гъан-маччанахь.
Цалчинмур ЦIувкIуллал
ва Ваччиял жямат
——————————
МАХIАММАДЛУЛ АРС СУЛАЙМАНОВ СИРАЖУТТИН
Вай гьантрай, къашавай хьуну, оьрмулул 64 шинаву дунияллия лавгунни Цалчинмур ЦIувкIратусса МахIаммадлул арс Сулайманов Сиражуттин. Ва ччянива Сухокумскалий мина дирхьуну уссия кулпатращал.
Сиражуттин бусса оьрмулий зий уссия Сухокумскаллал «Энергосбытрал» хъунаману, цаппара шиннардий зий уссия Сухокумскаллал азарханалий ттукIралсса, медициналул оборудованиялулсса буллай. Даву ххуйну кIулсса электрик ушаврицIун, Сиражуттин ия канил пагьмурду чIявусса, ччимур даву дюрхъуну дувайсса бюхъу-бажарданул заллу. Му ЦIувкIуллал жяматрал ва Сухокумскаллал агьалинал дянив хIурматрай уссия. ЗахIмат ххирасса, инсантуращал авкьусса, дакI-аьмал хъинсса инсан уссия.
Сиражуттин дунияллия лагаврил кьурчIишиву кIидачIлай, жижара буллай буру мунал кулпатрахь, арсурваврахь, уссурваврахь ва ссийхь. Сиражуттиннун къабуллумур оьрмулул бутIа мунал наслулун ххибувну лякъиннав, цув алжаннул ххари уваннав, махъминнал оьрмурдай барачат бишиннав!
Цалчинмур ЦIувкIуллал
жямат,
Сухокумскалийсса лак
——————————
АЬБДУЛЛАЛ ДУШ СУНГЪУРОВА НУРБИКА
Зумаритавал зуруй, июльданул 28-нний, оьрмулул 82 шинаву, цаппара гьантрай къашавайгу хьуну, аьпалухьхьун лавгунни ххишала бакъа ххаллилсса хъамитайпа, КIулушацIрал шяравасса Сунгъурова Нурбика Аьбдуллул ва Гьидаятлул душ.
Нурбика бувну бур 1933 шинал хъудугьул кулпатраву. Нурбика, цалла шяраву 6 классгу бувккуну, колхозраву зун бивкIун бур. Ванил оьрмулул гьалмахчугу цина гъансса, дакI-аьмал ххуйсса Сунгъуров Гъази хьуну ур. Ва бия цаннай ца бавкьусса, мяърипат ларайсса, цайминнангу эбратрансса къуш. РяхцIалку шиннардий вайннал кулпат МахIачкъалалив бивзун бур. Пенсиялийн букканнин Нурбика зий бивкIун бур усру дайсса фабрикалий.
Нурбика бия цума-цаннащалгу хIал бавкьусса, аьчухсса дакIнил заллу. Гъазинащал, цивппа кунма, захIмат ххирану, хъунаманал хIурмат буван кIулну хъунигу бувну, чивун буккан бунни ххаллилсса 3 арс. Ва бия захIматрал ветеран, лайкь хьуну бия цаппара медаллан ва ХIурматрал грамотарттан.
Нурбикал бивкIулул кьурчIишиву кIидачIлай, жижара буллай буру ванил ссихь, арсурваврахь, вайннал хъаннихь, цинявппагу гъан-маччанахь. Цил бунагьирттал аьпа баннав. РухI алжаннул ххари даннав.
КIулушацIрал жямат
———————————
МУТIАЛЛИБЛУЛ АРС МУТIАЛЛИБОВ МАХIАММАД
Оьрмулул 75 шин хьуну кIилчинмур кьини аьпалухьхьун лавгунни жяматрал дянив хIал бавкьусса, дакI-аьмал уздансса инсан, Карашрал шяраватусса МутIаллиблул арс МутIаллибов МахIаммад.
МахIаммад увну ур 1940 шинал Карашрал шяраву. ЧIавания шинай зий, захIмат буллай ивкIун ур колхозраву. ЧIивину унува буттацIагу хьуну, гьарца багьу-бизулуву кумаг буллай ивкIун ур ниттин. Школа бувккуну мукьах армиялийн лавгун, къуллугъ буллай ивкIун ур 3 шинай ва 3 зуруй.
Армиялия зана хьуну махъ, балугъирттал техникумгу бувккуну, яхъанан ивкIун ур МахIачкъалалив. АцIния ххюра шинал мутталий зий ивкIун ур МахIачкъалаллал таксопаркраву. Муния махъ зий ивкIун ур «Дагэнерголул» къаралданул хъунаману. Пенсиялийн увккун махъгу зий ивкIун ур шагьрулул «Водоканал» идаралий оператор-машинистну. Гьарцагу даврий хIалал бувну бур хIурмат ва барчаллагьру.
МахIаммад жуятува личIи шаврил пашманшивугу кIидачIлай, дакIнийхтунусса жижара буллай буру ванал кулпат Саратлухь, душваврахь, ссурваврахь ГунихIайраннухь ва Марияннухь, махъсса цинявппагу гъан-маччаминнахь. Цал бунагьирттал аьпа баннав, рухI бигьаний дишиннав!
Карашрал жямат
