Пятигорск шагьрулий байбивхьунни Ухссавнил Ккавкказуллал жагьилтурал форум «Машук- 2015». Ва форумраву гьуртту хьунни 18 – 30 шинайн бияннинсса Аьрасатнал Федерациялиясса ва Чил Билаятирттаясса 3000 – ннийн бивсса жагьилтал ва чIявусса хъамал.
Форумрай гьуртту хьунни ДР-лул жагьилтурал иширттал министр Заур Кьурбанов, ДР-лул печатрал ва информациялул министр Азнаур Аджиев.
Имара Саидова
Июль зурул 26-нний форумрал лагрулуву ларгунни Дарбант шагьрулун 2000 шин шаврил юбилейран хас дурсса кьини. Му кьини форумрал гьурттучитал лавгунни Дарбант шагьрулул тарихравун багьсса Нарын-къалалийн экскурсиялийн. Мукунма экскурсия бунни Ухссавнил Ккавкказрай бувагу бусса ца дунияллул диндалул тарихрал музейравун. Жагьилтал махIаттал хьуну бия чIивисса ва ца шагьрулий чIярусса динну яхьуну душаврия. Дарбант шагьрулийсса тарихрал гьайкаллу ххал дурну, миннул тарихрая цимурца кIул бувну махъ форумрал участниктал хьунабавкьунни Дарбант шагьрулул администрациялул хъунама Азади Рагимовлул.
Азади РахIимовлул барчаллагь увкунни жагьилтурал форумрал лагрулуву Дарбант шагьрулийнсса экскурсия сакин баврихлу. Ванал бувсунни уттигъанну Дарбант шагьрулий Нарын-къалалийн АьФ-лул президент Владимир Путингу увкIуну ивкIшиву. Мукунма Азади РахIимовлул Дарбант шагьрулул юбилейрал гьантрай жагьилтурайн оьвкунни хьхьичIавасса Дарбант шагьру ва бусалдаравун багьсса Нарын-къала ккаккан бучIан. Ахирданий оьрчIру Республикалул конституциялул байранналущал барчагу бувну, ккаккан дунни миннан авадансса концертрал программа.
Дагъусттаннал чулухасса делегациялувух концертрай гьуртту хьун бувкIун бия «Каспий» тIисса Дагъусттаннал къавтIаврил ансамбль ва «Вершины Кавказа» тIисса ДГТУ-рал ансамбль ва машгьурсса эстрадалул балайчитал.
