ОЬМАРХIАЖИНАЛ АРС ХIАЖИЕВ АБАКАР
Къашавай шаний лахъигу къалавгна, оьрмулул 69 шинаву лавгунни лайкьсса Ккурккуллал арс ХIажиев Абакар.

Абакар увссар 1946 шинал Ккурклив къуллугъчинал кулпат­раву. Мунал нитти-буттал – Оьмар­хIажинал ва Сакинатлул сакин бувсса кулпат бивкIссар шяраву ца яла хьхьичIунсса, эбратрансса кулпатну. Шяраву школагу къуртал бувну, Абакар лавгссар «Золотые прииски» тIисса кIанттайн.

Давриву хIал бавкьусса, курчIил акъасса, зунтталчунал зумуну зирангсса уну тIий, хъуниминнал чулуха Абакардун тамансса барчаллагьру баян бувну бивкIссар. АцIра шин тиккугу дурну, кIура авссар Да­гъусттаннайн. Пенсиялийн укканцIа зий ивкIссар Геологоразведкалий буровой усттарну. Миччава увкссар пенсиялийнгу.
Абакар ия щарнил агьулданун бусравсса, щилтагъшиву дакъасса, щилчIав аьй данну ша къаласай­сса, цалла ччаву гъан-маччанайх дачIлачIисса инсан.
Абакар тачIав щинчIав дакIния къаукканссар ва кIулманан. Абакар, вин алжан нясив баннав, гьав нурданул дуцIиннав.
Ккурккуллал жямат

Вил ажалданул хавар
Къаччан къабивкIсса акъар,
Кьияма дакIницI ливкри,
Кьакьари кьурчIи лавгри.

Пюрундалул ларзулух
Шяравуннай дуруглай
Буттал къатри дакъаяв
Увх-увхманахь пиш-пиш тIий.

Вил оьрмулул кIушиврул
БутIа ласун хIадурну
Уссурвал ва ссу бия.
Лагма маччами бия.

Ци тахсир бунуявав
Ина цалийну ливчIсса,
Чищал чут хьун къавхьуну,
Къатта чанна къалавхъсса?

Бюхттулний буттал къатри
Пюрундалул яруннах
Ялгъузну Кьиблалийннай
Дуруглай хIисав хьувкун,

Увкуссия на къатрахь
УчIантIиссар Абакар,
ТалихIирал нур дирзун,
Оьрму цIубуккантIиссар.

Мусил ттарцIну ацIанссар
Буттал къатлуву тIисса
Вийн дирхьусса вихшала
Тти гьаттавун рутавив?

Аьсивсса хIикматирай
Хьурдай та алжаннава
Вилла нину Сакинат
Ца лахIзалий дизан дан,
Кьакьарттуй чIу букьаннин
Вил хъирив зума учин.
Аьлиева Ханича,
ш. Ккурккул

————————————

ШАМХХАЛЛУЛ АРС МАХIАММАДОВ АВАЛИ
Цаппара хIаллай къашавайгу ивкIун, оьрмулул 85 шинаву Москавлив жуятува батIул хьунни Щамххаллул арс МахIаммадов Авали.
Авали увну ур 1930-кусса шинал Ваччав, хъинну хIурмат лавайсса Щамххаллул ва Асиятлул къушлий. Авалин дурагу 3 шин дусса чIумал ивкIуну ур ппу. ЗахIматсса дяъвилул шиннардий вайннал кулпат бивзун бур Щурагьун. Микку арцул медальданущал школагу був­ккуну, 1950-кусса шинал Авали увххун ур Москавуллал Техникалул институтравун. Мугу лайкьну къуртал бувну, хьуну ур ххаллилсса инженер. Дяъвилия махъсса шиннардий Авали цалва пишалий зий ивкIун ур паччахIлугъран хъинну агьам­сса, хьхьичIунсса объектирдай. Му бакъассагу, рационализатор хIисаврай, ванал ляхъан дурну дур патентирттай цIакь дурсса техникалул личIи-личIисса зат­ругу.
Инсан хIисаврайгу Авали ия хъинну хIал бавкьусса, гъан-маччами ва хъамал ххирасса чувгу, цала буттал ватан хъамакъаритай­сса патриотгу.
Авалил бивкIулул жижара буллай буру арс Щамххаллухь, душ Мирехь ва махъсса цинявппагу гъан-маччаминнахь. Шамиллухь ва махъсса цинявппагу гъан-маччанахь. Цал бунагьир­ттал аьпа баннав, гьав нурданул дуцIиннав.
Ваччиял жямат

———————————-

АЬВДУРАЗАКЬЛУЛ АРС ХIУСМАНОВ МАХIАММАД-САДИКЬ
Оьрмулул 75 шин бартларгун, ахиратравун лавгунни жяматрал дянивгу, даврийгу мудан бусравну ивкIсса, дакI-аьмал уздансса чув, ХьурукIуннал шяравасса Аьвдуразакьлул арс ХIусманов МахIаммад-Садикь.
МахIаммад-Садикь увну ур 1940-ку шинал ХьурукIрав. Цал буттал шяраву 4 класс, яла Гъумук дянивмур даражалул школагу къуртал бувну, зий ивкIун ур «Дагдизель» заводрай слесарьну, токарь-револьверщикну. Муния махъ зий ивкIун ур Избербаш шагьрулул ДагЗЭТО-лий мува цалва пишалий. 1961-1964-ку шиннардий лавхъун бур аьрали бурж. Тичча увкIун махъгу зий ивкIун ур гара цалла даврий. 1965-ку шинал зун ивкIун ур «Дагнефтегазразведкалул» автотранспортрал конторалий слесарьну. 1965-1967-ку шиннардий къуртал бувну бур Буйнакскаллал финансирттал техникум, зун ивкIун ур Финансирттал министерствалий ревизор-инспекторну, яла – отделданул начальникну. 1977-ку шинал зун ивкIун ур трест «Корводстройрай» хъунама бухгалтер-ревизорну. 1977-2003-ку шиннардий – «Дагестанавтодорданий» бухгалтерну, хъунама бухгалтерну.
Чув зий ивкIун унугу, ванаяту цинявппа рязину, барчаллагь тIий бикIайва, дакI марцIсса, тIайламур ччисса уну тIий.
Ва лайкь хьуну ур чIярусса бахшиширттан, ХIурматрал грамотарттан. «Почетный дорожник России», «Заслуженный экономист Республики Дагестан» цIардан. Ва хъанай ур захIматрал ветерангу.
МахIаммад-Садикь жуятува личIи шаврил кьурчIишиву кIидачIлай, дакIнийхтунусса жижара буллай буру ванал кулпат­рахь Ххадижатлухь, арсурваврахь Аьвдуразакьлухь, Мурадлухь, уссурваврахь Асланнухь, Аьлихь, ссурваврахь, щарнил уссурваврахь Захардухь, Шамиллухь ва махъсса цинявппагу гъан-маччанахь. Цал бунагьир­ттал аьпа баннав, гьав нурданул дуцIиннав, алжаннул ххари аннав, рухI бигьаний дишиннав.
ХьурукIуннал
ва Хьурттал жямат