Дагъусттаннай 3 миллион агьалинал хьушиву исват буллалисса чIивитIу увссар июль зурул 4-нний, МахIачкъалаллал №3 роддомрай. Юбилейрал чIивитIу, яъни 3 миллиондалийн лавхъма, увссар ХIажиевхъал кулпатраву, кIинничалтравасса цари цувагу. Мунаяр хьхьичI увманан Халимбаг цIа дирзун дур, 3 миллиондалийн лавхъманан – АьлихIажи. ХIажиевхъал кулпатраву кIинничалт баннингу 3 оьрчI бивкIун бур: 2 арс ва 1 душ.

Нину ПатIимат хIакин-стилистну зий бур, ппу ХIаирбаг тIурча – ППС-рал отделениялул командирну. Ххюва оьрчI хьусса кулпатран машина пишкаш бувну бур ОАО «НК» Роснефть-Дагнефтьрал, Гъуниннал райондалул хъунаманалгу къатри дансса аьрщи дуллуну дур, Республикалул ХIукуматраллив – 250 азарда къуруш. Гьаннайсса, АьлихIажи айнива барачатну увсса оьрчI хьуну ур, цIуллушиву дулуннав мунахьхьунгу, мунал нитти-буттахьхьунгу.
Оьрму къабигьасса бунугу, Дагъусттаннай ххуйсса даражалий дур оьрчIру баву. Аьрасатнал билаятрай оьрчIру баврил ккал-аьдадрах бурувгун Дагъусттан 1-мур кIанттай бур. Масалдаран, цалчинмур кварталданий ( Соцстрахрал фондрал хIасиллайн бувну) 24 азаллий 475 оьрчI увну ур, миннаватугу 175 кIинничалт. Ларгсса бигьалагай кьини бухмур автостанциялий­сса роддомрая ца кьини 60 оьрчI итаакьарду шавай ниттихъащал, акушеркахъул оьрчIру итабакьин ка хъирив лаллай бакъая тIий, буслай бур роддомрал зузала. ДакIнийн багьунни Аьрасатнал ца яла аварама политик Жириновский Ккавкказуллал хъаннин чIявусса оьрчIру буллан къадагъа дикIан аьркинссар тIий ивкIссагу. Утти Жириновскийхь цIухлан ливчIун бусса бур, ихтияр дуллай урав, гъаривчу, ттун ттула ласнаца оьрчI буван тIий рихшантирттай бивкIмигу.

ПатIимат Рамазанова