Дагъусттаннал ХIукуматрал хъунама Аьбдуссамад ХIамидов итни кьини, августрал 3-нний, гьуртту хьунни Каспийскалий, №7 аьралий городокрайсса цалчинмур международный конкурсру тIитIаврил шадлугърай. Ми бур «Кубок Каспия» ва «Каспийское дерби» тIисса конкурсру, цивппагу Аьрасатнал обороналул министрнал хIукмулийн бувну буллалисса «Армейские международные игры-2015» проектрал лагрулий.

П. Рамазанова
«Кубок Каспия» конкурсрай гьуртту хъанай бур Аьрасатнал, Азирбижаннал ва Къазахъисттаннал жамирдал экипажру, «Каспийское дерби» конкурсраву тIурчарив Аьрасатнал, Къаза­хъисттаннал ва Китайнал командартту. Дагъусттаннал бакIчинал цIанияту Аьрали-Хьхьирил Флотрал Главнокомандующий Виктор Чирковлухьхьун ссалам буллай, премьер-министр Аьбдуссамад ХIамидовлул барчаллагь увкунни Да­гъусттаннайн хъуннасса вихшала дусса Аьрасатнал обороналул министр Сергей Шойгухь. Конкурсрайсса хъамаллуравух ия Астраханнал областьрал губернатор Александр Жилкингу. Билаятрал гуж-кьуват цIакьсса армиялийн чул бищавриву бушивугу кIицI лавгун, билаятрал хъуними хIакьину армиялул сий гьаз дувансса хIарачат буллай бушиврий ва Дагъусттан бусалардавун агьсса моряк-подводник, Совет Союзрал Виричу МахIаммад ХIажиевлул ватан душиврий чIурчIаву дуллалисса ихтилат бунни Аь. ХIамидовлул.