ЦIусса дастталугъ машгьур хъанантIиссар

spg_4Дагъусттаннал Жагьилтурал иширтталсса буллалисса министерствалий хъунама пишакарну зузисса Кьурбанова Лаурал сипталийну хIасул дурссар Дагъусттаннай цIусса дастталугъ «АхIмадхановцы». Му Совет Союзрал кIийла Виричу АхIмад-Хан Султаннун цIассар, му дастталугърайгу Лаура цуппа каялувшиву дуллай буссар.
Лаура 1-мур ЦIувкIратусса цIанихсса учитель Бакрихъал НурмахIаммадлул арснал ХIажинал ва Расулхъал Жулиянал душри.

ПатIимат Рамазанова
Му школалий дуклай бунийва дуккавриву итххявхсса, школалул оьрмулувугу чялишну гьуртту хъанай бивкIсса душри. 2004 шинал Къизляр шагьрулийсса (миккур Лаурал нину-ппу яхъанай бусса), шагьрулул отличниктурал конкурсрай му лайкь хьуссар «Къизляр шагьрулул шинал ученик» тIисса цIанин. Мура шинал, республикалул биологиялул олимпиадарттай хьхьичIунсса кIантту бувгьусса Лаура конкурсирттавух гьуртту къавхьунува кьамул бувссар Да­гъусттаннал паччахIлугърал университетравун. 2011 шинал Дагъус­ттаннал шяраваллил хозяйствалул академиялул аспирантуралувун дуклан бувхссар (уттисса Аграрный университет). Микку дуклай бунийгу лайкь хьуссар «Аьрасатнал шяраваллил хозяйствалул банк» ОАО-рал стипендиялун. 2012 шинал зун бивкIун бур М.М. Жамбулатовлул цIанийсса Дагъусттаннал паччахIлугърал аграрный университетрал кафедралул ассистентну. 2014 шинал, Жагьилтурал Открытое правительствалул программалул лагрулий, республикалул ХIукуматраву, агропромышленный комплексрал ва тIабиаьт дуруччаврил отделданий стажировкалий бивкIун бур. Му стажировкалул хIасиллайн бувну, зун бувцуну бур Дагъусттаннал Жагьилтурал иширтталсса буллалисса министерствалийн. ХIакьинусса кьинигу зий бур миккува, дуклакисса ва зузисса жагьилтурал отделданий хъунама специалистну. Лаура ХIажиевна республикалий хъанахъисса ххуй чулиннайсса дахханашивурттавух гъирарай хIала буххайсса душ бур. Му бувчIуну бур ДР-лул Жагьилтурал Открытое правительствалул аграрная политикалул комитетравунгу, МахIачкъалаллал шагьрулул собраниялул депутатътурал Жагьилтурал парламентрал депутатнугу. Ларгсса шинал бувчIуну бур Дагъусттаннал Халкьуннал мажлисрал Жагьилтурал парламентравун, экологиялул комитетрай каялувшиву дуллай бур. ДукIу Лаурал дурссия ххуйсса цамургу даву: «Чил оьрчIру къабикIайссар» тIисса ихIсандалул акциялул сиптачия. ЦIуллу-сагъшиврул нукьсансса, мушакъатсса оьрчIан ка-кумагру буллалисса волонтерди. ДакI-аьмал хъинсса, цилла даву хъинну кIулсса ва дуллалимуниву хьхьичIунсса Лаура лайкь хьуссар дукIу Республикалул ХIукуматрал цIаниятусса Барчаллагьрал ча­гъарданун. Мудангу ци ххуйсса даву дуван хъинавав тIий къистасса Лаура ХIажиевнал, бакIрайва кIицI лавгсса куццуй, гьашину хIасул дунни «АхIмадхановцы» тIисса идара. «Жунма хъинну кIулли махъсса шиннардий оьрчIал ва жагьилтурал тарбиялух личIисса ургъил бакъашиву, му тагьар мукунна лахъи лагарча Аьрасатнаву патриотътал ялу-ялун чан хъананссия. Ватан ххирашиву, буттал кIанттухсса ччаву оьрчIаву ва жагьилтураву цIакьгу, куртIгу хъананшиврулсса давурттив дуллан аьркинссар жунна, мунияту ттунгу пикри хьунни «АхIмадхановцынал» дастталугъ хIасул дуван, -тIий бур Лаура Кьурбанова. -Хаснува Къирим Аьрасатнавунмай зана битайхту, миллатирттал дянивсса арарду цIакь дуллалисса давур­ттив сантирай дуллан хъанай бур. АхIмад-хан Султан кIива миллатрал арсри, мунал цIаницIун дархIусса давурттивгу Аьрасатнаву дакьаву ва нахIушиву дуруччаврил ххуллийсса давурттиври. Жул ккурандалувун кьамул буллалиссар оьрчIругу, жагьилталгу».
Лаурал бувсунни Совет Союзрал кIийла Виричунал, бусалардавун агьсса летчик-испытательнал сипат чара бакъа Аьрасатнавусса жагьилтал лагма лаган буллалисса лишан хьунтIишиву, агьалинал дянивсса дусшиврийсса арарду цIудуккантIишиву. «Гьар шинах Ххувшаврил байрандалий Цалчинмур ЦIувкIуллал диаспора Виричунал гьайкалданучIан батIай, микку дяъвилул ветерантурал савлугъ дуллалисса давурттацIун, нитти-буттахъащал байрандалийн бувкIсса оьрчIру ва душру «ЧIава ахIмадхановцынал» кьюкьравун кьамул бувай. Му хъинсса аьдатри, махъсса шиннардий цIакь хьусса. Шяраваллил жяматрал Оргкомитет­рал «Юный Аметхановец» тIисса хъазамрай лачIай значокругу тIалав дайссар гьар шинах. Мукунна ххуй­сса даражалий дур Каспийскаллал №8 лицейравугу тарбиялул даву. Мугу Виричунал цIанийсса школар. Школалул хIаятраву дур АхIмад-хан Султаннунсса гьайкалгу. Гьар кьини школданул хIаятравун бувхсса оьрчIал хьхьичIва-хьхьичI ябитаймур Виричунал гьайкалли. Миккугу Виричунал цIанийсса музейраву цалчинми классирттаву дуклакисса оьрчIру кьамул бувай «АхIмадхановцынал» кьюкьравун. Жул агьаммур мурадвагу Виричунал оьрму гьануну лавсун Аьрасатнаву жагьилтал цачIунмай бувавур, Аьрасатнал цайми регионнайгу хIасул дулланссар тIисса умудрай буру Виричунал цIанийсса дастталугъ», — увкунни Лаура Кьурбановал.
Мунил бувсунни 2015 шинал май зурул 7-нний, дастталугърал ттугъащал ва плакатирттащал, «АхIмадхановцы» дастталугърал вакилтал гьуртту хьушиву Ххувшаврил варистурал парадрай. Бувсунни хъирив кьини Ваччав Виричунан гьайкал тIитIлатIисса шадлугърайгу гьуртту хьушиву дастталугърал вакилтал ва, Ккуллал райондалул Жагьилтурал центрданущал архIал, «АхIмадхановцынал» кьюкьравун кьамул увшиву 50 дуклаки оьрчI. «ЛичIинура цIа дуван ччива МахIаммад Чаринов каялувшиву дуллалисса Ккуллал райондалул Жагьилтурал центрдания, ми хьхьичIунсса гьурттушинна дуллай бур дастталугърал давривух, — тIий бур Лаура ХIажиевна. -Дяъвилул ветеранталгу, кIу къабивзун, хIала буххай жу дуллалимунивух. Дагъусттаннай хIасул хьусса дас­тталугъ духьурчагу, гьалххану ппив хьунтIиссар жул ккурандалул мархри, сайки гьарца региондалий хIасул дувансса пикри бур Виричунал цIанийсса ккуранну. Гьашинусса планнаву дур, дуклаки оьрчIругу гьурттуну, тIивтIусса майданнив театрданул постановка ккаккан дувансса. Мукунма Къиримнавун бивну, дусшиврул ламурду лявкъуну, кIирагу республикалий, жучIава ва Къиримнаву, уссурвалсса школарду (школа-побратимру) бувансса ният дуссар. Му бакъассагу, жул дастталугъ машгьур шаврийну школардай гьаз хьун аьркинссар авиация ва радиотехника, мукунма цаймигу элмурду лахьхьаврихсса гъира. Мукун авиациялул ва радиотехникалул куртIсса ва цIакьсса кIулшивуртту дуллантIисса школардал гьану бизанссар тIисса умудгу бур».
ТIайлабацIу баннав, Лаурай, ина дуллалимуницIун. Дуван дакIнийцири давурттив бартдигьлансса бюхъугу, цIуллушивугу чIа тIий буру.