МоскавуллачIасса «Горки» резиденциялий АьФ-лул ХIукуматрал Председатель Дмитрий Медведев июньдалул 26-нний хьунаавкьунни Дагъусттаннал БакIчи Рамазан АьбдуллатIиповлущал. Премьер-министрнал цIухху-бусу бунни региондалийсса тагьарданул хIакъираву ва ккаккан бунни бан-битанмур.
Рамазан АьбдуллатIиповлул барчаллагь увкунни «О первоочередных мерах по опережающему развитию РД» тIисса АьФ-лул ХIукуматрал хIукму кьамул бан кумаг баврихлу.
Республикалул каялувчинал бувсунни хьхьичIсса шиннардий республика куртIсса кризисраву диркIшиву. Махъсса 2-2,5 шинаву тIурча тамансса дахханашивуртту хьуну душиву.
Федерал ХIукуматрал БакIчинал бувсунни республикалий агропромышленностьрал комплекс лябуккан баву ца яла приоритетмур бутIа хъанахъишиву, хаснува ахъулсса, къюмайтIутIи ва ахънилсса ххяххан дуллалаву. «Хъунмур къулагъас миннух дуллан аьркинссар», — увкунни Дмитрий Медведевлул.