ХIурмат бусса ГьунчIукьатIрал жямат!
Цума чув ялапар хъанай ухьурчангу, зу уттинингу хъунмасса кумаг бувссар жула буттахъал мина сагъну ядуван, жунна буттал буттахъал кьадиртмур, тапшур дурмур лирну къагьан.
Дандамаев МахIаммадлул 1991 шинал, цалчинсса ГьунчIукьатIрал Кьинилий увкусса махъру: «Аллагьная азаллихъайсса шиннардил хьхьичIра жунна дирсса аьрщир ва жулла ГьунчIукьатIрал аьрщи, гьарца кIанттун жулла цIардугу дусса. Цамур аьрщи, ватан жулла дакъассар ва дакъа. Ва ядуван аьркинссар, жулва мазгу, багьу-бизугу, жулла ужагъругу, жувагу бухкъалаганшиврул. Му аьрщарах жула буттахъал чIявусса оь экьибувтIуссар. Мунияту кIулну бикIан аьркинссар зулва мархри ча наниссарив». Цума-цагу гьунчIукьатIиричунал бувчIин буван аьркинссар цалва оьрчIан, миннал оьттуву личIаншиврул, минналгу цалва оьрчI-душнихь бусан, цалла ужагъ ча дайдихьлахьиссарив.
Жула ГьунчIукьатIрал жямат, ци кьини дуккарчангу, щийнчIав къавщуна, цайнува цивппа дузал шайсса бивкIссар жямат лагма лавгун. ГьунчIукьатIрал жяматрал чIявусса инсантал ккашилсса бивкIулиягу ххассал бувссар. 1926 шинал Поволжьялий ккаши бусса чIумал, ГьунчIукьатIрал гиккусса халкьуннан кумагран мусил кIисри, вичIилусру, арцул кьай-кьуй, цирда арцу дартIун, ххуйсса кумаг бувну бивкIссар.
Гай жула буттал буттахъал яхI-къирият, багьу-бизу жувувагу буссар. Жулла шяравалу махъсса шиннардий кIинттул агьалинан, ризкьилун щин диял къахъанай лирчIун дур. Шяравалу щинал щаллу дуван, щин дуцинсса тагьар дан багьлай бур. Му даву дузал дуваншиврул, аьркинну дур арцу турбарду машан ласунсса.
Хъунмасса тавакъюври шайнал шайсса кумаг буваву щинал масъала щаллу буван. Ттулва пикрилий, оьккину къахьунссия гьарцагу тухумрал хъуниминнал сияхIру дурну, цуманал ци дуллуссаривгу чичирчан.
КIилчинсса масъалагу укунсса бур. Жула щарнил имам Шагьабуттиннул хIарачатрайну, хIатталлил чIалачIин ххуйчулиннай даххана хьуну дур. Шиккува хъунмасса барчаллагь учин ччай бур жула шяравусса жагьилтурахь, хIатталлийн бувккун, гьавгу дурккун, бивкIугу буччин чIарав бацIлацIисса. Жул пикри буссия жагьилтуран кумаг бансса, муниятугу ми махъунмай хьунни, цив арцух дуллай бакъару ва даву тIий. Ва кIилчинсса масъала хъанай бур. Жулла хIатталлу къуртал хьуну дур, утти аьркинну бусса бур цIусса кIанай дуван. Му дувангу аьркин хъанай дур дайгьузанну дувансса муххал къери, турбарду, бухсса бухьурчангу, къери цIакь дувансса. ЦIунилла вай давуртту щаллу дуван арцу аьркин хъанай дур. ХIатталлил хIакъираву ттул укунсса пикри бур. МахIачкъалалив ва Каспийскалий, цайми кIанттурду хIисав къабувну, 718 кулпат хъанай бур марцIсса ГьунчIукьатIрал арамтуннал бувсса. Вай цинявнналагу буттал буттахъул, буттал ниттихъул ва ниттил агьлу бувччуну буссар ГьунчIукьатIувсса хIатталлий. Зува бувайсса цадакьа, бичайсса ссахI бичара ГьунчIукьатIрал мизитравун, зула ливтIуминнал рухIирдаяту ва уттавасса зула ичIуссаннал цIуллу-сагъшиврия. Мунийну хIатталлил масъала дузал хьунсса ххай ура. Пикри бувара на чивчумунил ялув. Бюхъай цаманал пикри ттулмурнияр къулайсса бикIан, мукунмургу бувчIин бувара жула имамнан.
ГьунчIукьатIрал ккурандалул чулуха Амин Аьбдуллаев
