АЬБДУЛЛУЛ АРС ЗАГЬИДИЕВ ЗАУР
Жагьилсса оьрмулий, апатI нясив хьуну, жула дянивату личIи хьунни Хъювхъиял шяравасса ххаллилсса зунтталчу Загьидиев Заур.
Заур увну ур 1973-ку шинал Загьидиев Аьбдуллул ва АьтIикатлул къушлий. Ваччиял шяраву школа къуртал бувайхту, бувккуну бур МахIачкъалаллал финансирттал техникум. Муния махъ лавгун ур аьралуннаву къуллугъ бан.

Тичча учIайхту, зун айивхьуну ур Ккуллал райондалийсса налогирттал инспекциялул пишакарну. Заочнайну дуклай, къуртал бувну бур Дагъусттаннал университетрал экономикалул факультет. Налогирттал инспекция Лаващав бизан бувайхту, ивтун ур Ккуллал райондалул казначействалул хъунаману. АпатI хьуну жула дянивату гьаннин шиккува зий уссия.
Заурдул 2-мур ЦIувкIратусса Лиана тIисса кулпатращал хъуни буллай уссия кIия арс ва ца душ. ОьрчIру мюрщину бунува, оьрчIан яла бутта аьркинсса чIумал, цибанссар, Заур ахиратравун лавгунни.
Хъювхъиял, Ваччиял, 2-мур ЦIувкIуллал жяматрал дянив акъагу, щаллагу райондалул жагьилтурал ва бугьараминнал дянив хIурматрай уссия Заур.
Заур кIулми, ванал буттащал Аьбдуллущал, ниттищал АьтIикатлущал зий бивкIми, дусшиврийми, шаннагу шяраваллил жямат кьурчIишиву кIидачIлай бур Заурдул нитти-буттащал, кулпатращал, уссурссуннащал ва гъанссаннащал. Заурдул рухI кIукIлуний хьуннав. Аьпа буваннав. Амин.
Хъювхъиял, Ваччиял,
2-мур ЦIувкIуллал жямат

———————————————

ХIАСАНХIУСАЙННУЛ АРС АТТАЕВ ТЕЛЬМАН
Май зурул байбихьулий, оьрмулул 73 шинаву, апатI хьуну, дунияллия лавгунни ххаллилсса лаккучу, Аттаев Тельман ХIасанхIусайннул арс.
Тельман увну ур 1942 шинал Гъумучиял шяраву къуллугъчинал кулпатраву. Гъумук дянивмур даражалул школагу къуртал бувну, лавгун ур цалва аьралий бурж лахъан. Зана хьуну махъ, шофернал пишагу лавхьхьуну, машиналий зун айивхьуну ур Саэд Габиевлул цIанийсса Гъумучиял колхозрай. МахIачкъалалив ивзун махъ зий ивкIун ур мува цала пишалий.
Тельман ия хъинну хIарачат бу­сса, хъуниминналгу, мюрщиминналгу хIурмат буван кIулсса. Цува зузисса давурттай бувсса захIматрахлу лайкь хьуну ия мадарасса грамотарттан, бахшиширттан.
Тельманнул бивкIулул кьурчIи­ши­ву кIидачIлай, жижара буллай буру ванал кулпатрахь, оьрчIахь, уссурваврахь, ссурваврахь, минная бивзминнахь, цинявппагу гъан-маччаминнахь.
Цал бунагьирттал аьпа баннав. РухI хъинний дишиннав.
ГьунчIукьатIрал,
Гъумучиял жямат

————————————————

Апрельданул 30-нний Ккуллал райондалул азарханалул хъунама хIакинну зий ивкIсса Кьубиев Кьурбан Мирзал арс хархавар бакъа жула дянивату ахиратравун лавгунни.
ЧIявусса инсантуран кьувтIунни чIун дакъа Кьурбан аьпалухьхьун лагаву. Нагу ттунма асар хьумур зумалул ххуттардийну зущал, кказит бу­ккултращал, кIибачIлай бура.

ХIайп бакъаяв мусил бакI,
Вил чурх гьаттавух бишин.
ХIайп дакъаяв вил кару,
ЛухIи гьаттал аьян дан.

Ттул оьрчIая ятинтал,
Ина хьун къабивтуна,
Утти вилваминная
Циван бував ятинтал?

Кару мусилсса хIакин,
Цими оьрму ххассал бав?
Вилвамур ххассал бансса,
ЦучIав циван къаувкри?

Гьав нурданул дуцIиннав,
Махъминнай аргъ дизаннав.
Ттул дакIниярив ина,
ТачIав къаукканссара!
Магьрикаят МахIмудова,
ш. Хъювхъи.

————————————————

АЬВДУРАХIМАННУЛ ДУШ МАХIАММАДОВА ХIУРУН
Уттигъанну, цIуцIи шаний лахъигу къалавгун, оьрмулул 87 шинаву аьпалухьхьун лавгунни цила дакIнийхтуну бивхьусса захIматрайну чIявучин бусрав хьу­сса, мяйжаннугу­сса лакку хъамитайпа, дяъвилул ва захIматрал ветеран, КIямашатусса МахIаммадова ХIурун.
Бувну бур ХIурун АьвдурахI­маннул ва Умаматлул кулпат­раву, ряххулчинсса оьрчIну, 1928 шинал КIямашрал шяраву. Ччянива буттацIа хьусса ХIуруннун оьрчIнийва кIул хьуну бур захIматрал кьадру. Дяъви байбишайхту, кьадиртун дуккавугу, зун бивкIссар КIямашрал «Комсомолец» колхозраву дояркану. АцIра шинава (1950 ш.), КIямашрал ва ГьунчIукьатIрал колхозру цачIун дайхту, зун бивкIун бур «Красное знамя» колхозраву дояркану. Гьаннай­сса цилва оьрмулул 62 шин харж дурну дур колхозран. Дояркашиврущал архIал зий бикIайссия фермалий бригадирнугу.
ДакIнийхтуну бивхьусса захIматран хIукуматралгу кьимат бишлай, ХIуруннун дуллуну дур чIярусса наградартту. Миннувух дур, 1971 шинал дуллусса, Октябрь революциялул орден, 1975 шинал дуллусса Лениннул орден, Соцбяст-ччалдануву ххув хьусса медаллу, Хъун дяъвилуву Ххувшаврил юбилейрттан хас дурсса медаллу. Ххувшаврил 70 шинал юбилейран хас дурмур медаль ласунгу нясив бувну, аьпалувух бивхьунни жулва лакран цинявннанмагу пахру бан лайкьсса хъамитайпа. Мунищала архIал ХIурун бия хъинну дакI-аьмал ххуйсса, хасиятрал бавкьусса, иминсса, лагма-ялттунащал дахIаву дан кIулсса, ка-кумаг бан анаварсса, сант кIулну даву дайсса, цинма кIулмур гаманангу лахьхьин бан хIарачат буллалисса, мяйжаннугу дакIнийхтуну хъунмасса захIмат бивхьусса, мунияту кIирагу щарнил жяматрангу, щалла райондалунгу бусрав хьусса инсан. Бугьара хьуну махъ ХIурун бивзун буссия цила ца бакъа бакъасса душничIан, Къизилюртрайсса ЦIусса Хъанардал шяравун. Цибанссар, инсан ивчIан ляхъан увну ур.
ХIурун ахиратрал шаврил хъуннасса кьурчIишиву кIидачIлай, жижара буллай буру душнихь, гъан-маччанахь, агьлу-авладрахь цинявннахьвагу. Цил гьав нурданул дуцIиннав, Пирдавс-алжан нясив баннав, махънал оьрмурдай барачат бишиннав.
Амин.
КIямашрал ва Хъанардал
жямат

———————————————————-

ЯХIЪЯНАЛ ДУШ ХIАЖИЕВА ПАТIИМА
Ххувшаврил 70 шинал юбилейрал медальгу дуллуну, байрангу хьунадаркьуну, хархавар бакъасса бивкIулул жулва дянивату лавсунни КIямашрал шяраву 1925 шинал ЯхIъянал ва ХIабибатлул кулпатраву бувсса, ГьунчIукьатIув дяъвилул ветераннан щар хьуну, оьрму му шяраву бувтсса ХIажиева ПатIима ЯхIъянал душ.
Дяъвилул шиннардийгу, гания махъсса шиннардийгу ПатIима цал хъунмур дояркану, яла ласнащал колхозрал найрдах буруглай, колхозрал давурттай зий бикIайссия. Ва бия коммунист, бивхьусса хъуниминнал бигардугу биттур бувайва лажин кIялану, цила чIумал. Дуллуну дур ПатIиман тамансса медаллугу, давривусса хьхьичIуннайшивурттах бахшишру ва ХIурматрал грамотарттугу. Дяъвилул шиннардий окопру дуклай занай бивкIссар щархъал лухччайх. Лагмасса щархъаяту гьан бувсса хъами-душругу, нажагь дяъви гъан хъанарчагу тIий, хIадуршинна дуллай бивкIун бур КIямашрал лух­ччайгу. КIай хъами-душвавран дукрагу ларсун лагайсса бивкIун бур цищаласса дояркахъащал ПатIима, цила хушрайну.
Цила язи увгьусса дяъвилул ветеран ХIажиев Кьур­банмахIаммадлущал оьрму бутлай, вайннал хъуна унни ца акъа-акъасса арс Тажуттин. Ваналгу, ванал кулпат Пирдавс­лулгу, хъунмасса захIматгу бивхьуну, оьрмулул ахир хьуннин ялув бавцIуну, хъихъи лавсун, хIурматрай буруглай, 90 шинал оьрмулуву аьпалухьхьун лавгунни ПатIима.
ПатIима бия лакрал фольклор кIулсса, балай учин гьунаргу, чIугу бусса, буса-учин кIулсса хъамитайпа.
ПатIимагу алжаннул ххари баннав тIий, жижара буллай буру ванил арс Тажуттиннухь, арснал щар Пирдавслухь, вайннал оьрчIахь, уссурваврал, ссурваврал оьрчIахь, душварахь, щалвагу агьлу-авладрахь.
ПатIимал барачат махъ лив­чIун лякъиннав, мунияргу бугьара хьуннин зувагу битаннав хъунасса Заннал. Амин.
КIямашрал
ва ГьунчIукьатIрал жямат