Майрал 29-нний Ккуллал райондалул администрациялул залдануву хьунни терроризмалийн къаршисса комиссиялул батIаву. Ва комиссиялул председательну ур Ккуллал райондалул бакIчи Сулайманов Сяид, батIаву дачин дурнугу ия ва цува.

БатIавривух гьуртту хьунни Ккуллал ва Лакрал районнал ца­чIусса полициялул отделданул бакIчи МахIмудов Марат, кIира-шанна райондалул цачIусса, Да­гъусттаннал Лаващавсса УФСБ оперуполномоченный Ш. ХIасанаьлиев, райондалул КIулшиву дулаврил управлениялул хъунмур ХIам­макуева Альбина, райондалул администрациялул юрист Илиясов Шамил, райондалул азарханалул хъунама хIакин Аьшаев Нуруллагь, ГО ва ЧС уполномоченный Кьурбайтаев Ажуб, Ветерантурал комитетрал председатель Загьидиев Аьбдул, Жагьилтурал ва туризмалул комитетрал бакIчи Чаринов МахIаммад, райондалийсса школардал директортал, оьрчIал багъирдал хъуними, шяраваллал администрациярттал бакIчитал.
Ихтилатру бувна Хъусращиял, Ккуллал, Ваччиял,1-мур ЦIувкIуллал шяраваллал бакIчитурал, Ккуллал 1-мур, Вихьуллал, ЧIяйннал школардал директортурал. Ккуллал ва Лакрал районнал прокурор Оьмаров Светозардул бувсуна инсантал буруччинсса давур­тту цукунсса дикIан аьркинссарив. Бувсъсса затру хIисавравун лавсун, хIукмулуву кIицI бувна, кIулшиву дулаврил, цIуллушиврул ялув бацIаврил, чIявусса инсантал батIайсса кIанттаву вай буруччин­сса даву багьайсса кьяйдалий дузал дуллай бакъашиву. Баян бувна кIулшиву дулайсса, цIуллушиврул ялув бавцIусса, культуралул идарарттал бакIчитал такну цала канилусса идарарттал жаваблувталну хъанахъишиву. Шиккува кIицI бувна шяраваллал бакIчитуран цалла шяраваллавугу буслан аьркиншиву, лекцияртту ккалан аьркиншиву жяматрал дянив, терроризма хьун къадитансса нанижатрай.
Мукунма кIицI бувна, чара бакъа Ккуллал ва Лакрал районнал полициялун, Лаващиял УФСБ-лул зузалтран, Ккуллал райондалийсса шяраваллал бакIчитурал дянив семинарду буван багьлай бушиву, терроризма къахьундитансса хIуччарду цукунсса бикIан багьлагьиссарив бусласисса. Ванийну комиссиялул батIаву къуртал хьуна.