Гьарица инсаннал оьрмулуву ца яла дакIний личIаймур байран духьунссар школалия личIи хъанахъисса, оьрчIшиврува бувккун, хъуниминнал оьрмулувунсса ххуллу тIитIлатIисса Махъва-махъсса гюнгутIул байран.
Цинявппагу школардай кунна, Махъва-махъсса гюнгутIул байран кIицI ларгунни Къизилюртуллал тарбиялул колониялийгу. Мура кьини колониялий ккаккан дунни Дагъусттаннал педуниверситетрал музыкалул факультетрал сипталий хIадур дурсса чирилул концертгу.
Махъва-махъсса гюнгутIул байрандалущал колониялийсса оьрчIру барча бан бувкIун бия Дагъусттаннал УФСИН-лул, Къизилюртуллал администрациялул вакилтал, Дагъусттаннал педуниверситетрал студентътал, колониялийсса оьрчIал гъан-маччами. Шадлугърал линейкалийн бавтIун махъ, выпускниктал барча буллалисса ихтилатру бунни шиккун бувкIсса хъамаллурал. Педуниверситетрал студентътурал ккаккан дунни концерт. ХIайп, школардал дуклаки оьрчIащал архIал шагьрулул кучалийх парадрай бачин вайннаща къабювхъунни, амма шиккусса педагогтурал шаймур бунни колониялийсса оьрчIангу ва кьини чаннану, ххарину дакIний личIан. ЧIюлусса лаххия ва выпускниктурал лентарду, тIутIив ва гюнгутIул чIу, учительтурал тIааьнсса ихтилатру ва идаралувусса гьарца кьини цава ца куццуй оьрму нанисса оьрчIан дакIний личIансса караматсса лахIзарду хьунни.
Выпускниктал байрандалущал барча буллай, колониялул хъунама, виваллил службалул полковник ХIабиб Исакьовлул чIа увкунни оьрчIан ччясса чIумал цала-цала шаппай зана шаву. Школалул директор Сидрат Расуловнал чIа увкунни, экзаменнугу ххуйсса кьиматирттай дуллуну, шиккувасса пиша лахьхьайсса училищалуву дуклан, гихунмайсса оьрмулуву гьарица ша ххуйну пикри бувну ласаван. Бюххансса, ххуйсса насихIатру бусласисса ихтилат бунни Дагъусттаннал педуниверситетрал музыкалул факультетрал декан ХIамид Акавовлул.
Ихтилатру къуртал хьуну махъ байбивхьунни яла гьавас бутлатимур, асар хъанахъимур лахIза – Махъва-махъсса гюнгутIи бищаву. Му бищун вихшала дунни Тимур тIисса оьрчIайн.
Гихуннайсса шадлугърал мажлисрай дунни дуккаврил шинал хIасиллу.
Дуккавриву хьхьичIунсса, личIи-личIисса олимпиадарттай хьхьичIунсса кIанттурду бувгьусса оьрчIан буллунни дипломру ва бахшишру. Выпускниктуралгу буллунни тIутIал кацIру цахьра дарс дихьлай бивкIсса учительтуран.
Махъва-махъсса гюнгутIул байран Къизилюртуллал колониялий дакIний личIанну ларгунни.
Дагъусттаннал УФСИН-лул пресс-служба
ХIадур бувссар
А. Аьбдуллаевал
