Июньдалул 16-нний Дагъусттаннал БакIчи Рамазан АьбдуллатIиповлул дунни ДР-лул террорданийн къаршисса комиссиялул ярглийсса гьартасса заседание. Ххалбигьлай бия хъинну агьамшиву дусса объектирдал мюхчаншиву щаллу даврил масъалартту. Мукунма ххалбивгьунни 2013-2018 шиннардий Аьрасатнал Федерациялий террорданул идеологиялийн къаршисса Комплексъсса план биттур дуллалаврил масъала.
ХьхьичIмахъ лахълай, Рамазан АьбдуллатIиповлул бувсунни Дагъусттаннай оператив тагьар уттигу захIматсса тагьарданийра личIлай душиву.
«Оператив тагьарданийн хъунмур негативсса асар биян буллай бур ттигу-шилагу бандформированиярттал члентурал, экстремистътурал ва террорчитурал. ЛичIлай дур терактру давриясса нигьачIавугу. Му тагьарданущал кIул бан аьркинссар гьарца топливно-энергетический комплексрал каялувчитал, республикалул жизнеобеспечениялул объектирдал каялувчитал. Ми масъаларттаха зун аьркинссар ихтиярду дуруччай органнаяр ххишала, щалва жяматгу», — увкунни Дагъусттаннал БакIчинал.
Рамазан АьбдуллатIиповлул тапшур бунни педагогтуран, психологтуран, социал зузалтран, жагьилтурал центрдан ва жяматийсса цачIуншивурттан террорданул профилактикалун хасъсса информациярттал луртаннал анализ дуван.
ДР-лул МЧС-рал хъунама Нариман КазимахIаммадовлул бувсъсса куццуй, республикалий бур 42 агьамсса ва 100 нигьачIаву диллалисса объектру. Ми ххалбувну, кIул хьуну бур тамансса диялдакъашивуртту душиву.
ДР-лул виваллил иширттал министр Аьбдурашид МахIаммадовлул бувсмунийн бувну, шинал дайдихьулия тIайла хьуну, министерствалул зузалтрал ххалдурну дур террорданийн ва диверсиярттайн къаршисса тагьар 44 объектрай. Тиккусса диялдакъашивурттал сававртту, тайннул администрациярттал хIисаврай, арцу диялну дакъашиву дур. Мува масъалалул хIакъираву Дагъусттаннал БакIчинал дунни цаппара тапшур бавуртту. Хаснува ДР-лул ХIукуматрал Председательнал 1-ма хъиривчу Анатолий Карибовлуйн тапшур бунни образованиялул ва элмулул министр Шагьаьппас Шагьовлущал цачIу дузал бувну комплексъсса комиссиягу (бригада), организациярдай ялун личин дурсса цIу дагьаврия нигьачIаву дусса диялдакъашивуртту духлаган дуван. Вице-премьер МахIаммад Исяевлуйн тапшур бунни мура даву дуван автодорожный хозяйстварттаву.
2013-2018 шиннардий АьФ-лий террорданул идеологиялийн къаршисса Комплексъсса план биттур дуллалаврил хIакъираву бувсунни ДР-лул жагьилтурал иширттал министр Заур Кьурбановлул. Ганал мукъурттийн бувну, мува министр бакIчисса ведомствалул пишакартурал ДР-лул Печатьрал министерствалущал цачIу хIадур дуллай бур программа «Гражданское население в противодействии распространению идеологии терроризма».
Жагьилтурал иширттал министерствалул сипталийну муниципалитетирттай сакин буллай бур зузи группартту. Масалдаран, Ахвахуллал ва Ккуллал районнай сакин бувну бур, интернет сетравугу зузисса, за кIулсса пишакартурал группартту, миннал дайссар адресрайнусса профилактикалул давуртту.
ДР-лул БакIчинал дунни масъалартту ххалбигьаврил хIакъиравусса хIасиллу ва цаппара тапшур бавуртту.
ХIадур бувссар
ХI. Аьдиловлул
