Аьрасатнал Кьинилун хасну МахIачкъалалив, «Ак-Гель» бярничIасса Оьруснал интеллигенциялун дирхьусса гьайкалданучIа, июньдалул 12-нний хьунни шагьрулул магьирлугърал школардал тарбиячитал, хореографиялул ансамбльлу ва эстрадалул артистътал гьур­ттусса хъуннасса шадлугъ.

З. АьбдурахIманова
ПаччахIлугърал байрандалущал шадлугърайн бавтIми барча бан увкIсса ДР-лул ХIукуматрал Председательнал хъиривчу Анатолий Карибовлул кIицI лавгунни, шиккун бувкIсса тамашачитуравух чIявуми жагьи-жугьулт бушиврия цанма хъунмасса пахру багьлай бушиву.
— Жулва билаятрал ялун­бучIантIимур зу кунма жаваб­лувсса, зулла Ватан ххирасса жа­гьилтурал кIунттихьри бусса. Умуд бур Ватандалул цIаний зу ссайчIав мяш къавхьуну, яхI-намус бурувччусса, жул кIану бугьансса ник хьуншиврийн, — увкунни А. Карибовлул.
Шагьрулул администрациялул бакIчинал цIания МахIачкъалаллал халкь байрандалущал барча бунни бакIчинал хъиривчу Рафик Бу­ттаевлул. Ванал кIицI лавгунни, Аьрасатнал Кьини – тархъаншиврул, дакьаврил ва миллатирттал цашиврул кьини душиву.
Барча бавурттал ихтилатру хьуну махъ, байбивхьунни, тамашачитурал гурсса хъатру ришлай кьамул бувсса, балайрдал ва къавтIавуртталмур бутIа. Шикку вайннал щаллу бунни Ватандалун хасъсса балайрду ва Дагъусттаннал миллатирттал макьаннайсса произведенияртту.
Тамашачитуравух жагьилтурал сакиншиннардил гьурттучитурал дунни «Российский триколор» акциягу. Вайннал дарчIунни билаятрал ттугълил рангру дусса лисри. Мукунма ххютулу краскарду ва цайми-цаймигу ай-тай дирхьуну, гъан хьунал, гъира бунал чIаврдай Аьрасатнал ттугълил аквагрим дуллалиссагу чансса бакъая.
Хьхьунил цIаннаву ссавруннайн личIи-личIисса салютру итадакьаврийну къуртал хьунни шадлугъ.