Аьвзал заманнай лакку кIанттул шяраваллайх дачIлай бивкIссар тIар касмурду. Гъумучиян дуллуссар мусил усттарнал касму, ШавкIуллан уссал усттарналсса касму. Мукун дачIлай, ца Бархъаллан къадирну диркIун дур касму.

Бархъал хъунмасса пикрилухун багьну бур. Микку ца хъунавхьучунал куну бур: «Бархъал, жува буссару ссихIир аьрщарай, бачи мунил касму лахьхьиннуча», – куну. Дуллан бивкIун бур бархъал тIахIунттив. Бархъаллал тIахIунттал караматшиву ххалхьуссар Дарбантлив, Гьанжилив, Москавлив, Парижлив.
Ттул пикрилий, Ххутрал шяраваллийн дирхьунссия хIакиннал касму. Ттунма кIулсса му шяраву бур 2 тухум хIакинтурал (бухьун­ссар цаймигу) Минкаиловхъал ва Дибировхъал. Ванияр 6 шинал хьхьичI на, Лаккуй хъинну къашавай хьуну, багьунав МахIачкъалаллал портрал азарханалийн. Микку на хъин бувнав Минкаилов КьурамахIаммадлул – профессор, шин ххишалагу хьунни му жуятува лавгун (аьпа баннав цал). КьурамахIаммад кунасса пульманолог, бюхттулсса педагог Ккавкказнаву чIявусса бакъахьунссар. Мува азарханалий зий ур КьурамахIаммадлул арс Эльдар Минкаилов. Эльдаргу лахъавай ур буттал бюхттул шачIанттуйн.
Та нава бутталгу, арсналгу хъин бувсса шинал на «Ххяххабаргъ» кказитрайн чирчуссия макьала: «БивкIссания ттучIава ханнал хазна, давияв ВацIиллул ялув Минкаиловхъал буттангу, арснангу гьайкал куну.
Гьашинугу на, къашавай хьуну, багьунна Гъумукун азарханалийн, ччай бакъая ттун гиккун багьан. Амма нава кIивун бувхсса чIумал, караматсса къатлувун багьсса кунма хьунав. Лагмара марцIшиву, палатарттаву чаннашиву, марцIсса шану-кIаралу, гьантлун мукьийлла дулайсса нахIусса дукра, ччаннайн лаххан дулайсса бахиллу украсса, шагьрулийсса азарханардай багьлух дулайсса дуна. Яла-яла, хъунама хIакин АьбдурахIим Дибирович, профессор Дибиров Дибирдул арс, лакрал пахру, чIивисса чIумуй Москавлия Лаккуйнгу увкIун, азархана ва низамрайн бувцусса. АьбдурахIим, бюхттулсса хIакин акъа­ссагу, ухьунссар хIакьсса муаьллимгу. Цал на хъинну ххалбувну, яла чIарав авцIусса жагьилсса хIакиннахь ххалбан бувну, мунахьхьун чIявусса суаллу буллуна. Хъинну дугърисса буттая-профессорная укунсса акъа арс къаизанссия.
АьбдурахIим Дибировичлул райондалул азарханалийн кIункIу бувну бур за кIулсса, жагьилсса хIакинтал. Минкаилова Саида Жяъпаровна хъинну за кIулсса невропатолог бур. Къашайшалан цукун хъамабитанссар хьхьу-кьини дакъа «Скорыйлий» зузисса Дездемона. Цилла мюрщи оьрчIал куннасса кару къашайшалал чурххайх ттюнгъану дуклакисса Марианна. Яру хъяй буна, «вихва инава къабуругара» тIий дяъвайсса Аня. Пюрунтрал яруннал ялтту инсаннах кьувтIуну буруглагисса, ганаву ци ххуй дакъасса зат кьукьин хъиннивав тIисса, кIюрххицIунгу операция байсса, Сулайманнул яру.
Вай гьарца зат АьбдурахIим Дибировичлул пагьмур, усттаршивур.
Я Аллагь, АьбдурахIим Дибирович, вихьхьун 100 шин хьуннингу мукун лак­раха къуллугъ буллансса каши-кьудрат дулуннав.
БивкIссания ттучIава ханнал хазна, булувияв АьбдурахIим Дибировичлухьхьун, хъиннура хъун дуван лакрал жямат­раха къуллугъ буллансса каши.
Жува, лакрал жямат, Лаккуймигу, Ма­хIачкъалаливмигу, Москавлиймигу, чувсса бухьурчагу, бачи шайсса кумаг баннуча патриот АьбдурахIим Дибировичлун цIуну буллалисса азархана бувну къуртал бан. Бю­хъайхха му чIумал хIукуматрангу нач хьуну, мунилгу кумаг бан.
Гуламан Исяева, лавайсса даражалул педагог,
ш. ГьукIур