Уттигъанну Ахттиял райондалул бакIчи ХIусман Аьбдулкаримов ва «Просвещение» фондрал каялувчитал бувкIунни Ккуллал шяравусса 1-мур школалийн. Вайннащал ия Къирим республикалул судирттал департаментрал председатель, Ккуллал шяравасса Карин Аккуев.
ХIажимурад ХIусайнов
Хъамал Ккуллал 1-мур школалийн бучIаврин багьана хьуну бия «Просвещение» фондран ччан бикIаву Ккуллал 1-мур школалун пишкаш буван махъва-махъ бувксса компьютердал класс.
Ва фондрал президентну усса ия ХIусман Аьбдулкаримовлул бутта МахIмуд Аьбдулкаримов. ХIусман Аьбдулкаримовлул цала буттаяту увкунни: «Нагу, ттул уссурвалгу хъинну барчаллагьрай буссару жула бутта МахIмудлул жунна дуллусса тарбиялия. Буттал жухь мудан учайссар: «Инсантуран кумаг булувара дусса кашилийну», — куну. Буттал цалва оьрмулул 52 шин учительну, миннувагу 10 шин школалул директорну зий гьан дурну дур. ЦIана ва ур шяраваллавусса школарду цIуну бувксса компьютердал технологиярттал дузал буллалисса «Просвещение» фондрал президентну. ХIакьину жу Ккуллал шяраваллил 1-мур школалун лавсун бувкIру махъва-махъ бувксса компьютердал класс. Шагьрурдайсса дуклаки оьрчIаща кунма, цалла кIулшивурттал даража лахъ буван хьунтIиссар шяравусса школардай дуклакиминнащагу», — увкунни ванал.
МахIмуд Аьбдулкаримовлул увкуна: «На ва нара каялувшиву дуллалисса фондрал хIукму буварду, ттулва ва щалвагу фондрал зузалтрал Карин Аккуевлул чулухунмайсса хъунмасса хIурматгу хIисавравун лавсун, пишкаш буван компьютердал класс. КIулшиву – му инсаннал гужри. ЦIанасса чIумал жулла республикалун аьркинну бур ларайсса кIулшиву дусса чIявусса пишакартал. Школардай дуклакисса оьрчIру – жула ялун бучIантIимурди. Миннайнни жулла вихшала дусса. КIулшиврул гьану школалийва куртIну бизарча, яла ганил ялув «лахъсса къатри» дуван шайссар».
Хъамаллурахь барчаллагь тIисса ихтилатру бунни Ккуллал райондалул бакIчинал хъиривчу Сабрина Илиясовал, райондалул бакIчинал пресс-секретарь Шамххал Хизриевлул, Ккуллал шяраваллил 1-мур школалул директор Руслан Къянчиевлул, вава школалул завуч Рамазан Маммаевлул. Хъамакъабитаврин рирщуна суратругу.
