Вай гьантрай Дагъусттаннай сакин дурну дур цIусса Коммерциялул дакъасса цачIуншивурттал ассоциация «Единство и развитие».
ХIасан Аьдилов
Га Ассоциациялувун бувхсса цаппара цачIуншивурттал (объединения) каялувчитал хьунабавкьунни майрал 26-нний республикалул журналистътуращал «Дагестанская правда» кказитрал редакциялий.
Пресс-конференциялий гьуртту хьунни цIуну сакин бувсса «Единство и развитие» тIисса Коммерциялул дакъасса цачIуншивурттал Дагъусттаннал ассоциациялул председатель Загьиди МахIмудов, Дагъусттаннал БакIчинал советник, Ассоциациялул Попечительшиврул Советрал председатель Деньга Халидов, Попечительшиврул Советрал член, ихтиярду дуруччайма ХIасан Айгунов, Ассоциациялул сопредседательтал: АхIмад Аьбдуразакьов (ДРОО «Поддержка курса Главы РД»), Арсен ХIажиев («ЯПП» суккушиндарал лидер), ХIусайн Жанбеков (председатель «ДАНКО»), Лейла ХIамзатова («ДР-лул оьрчIшиврул бутIувусса коммерциялул дакъасса организациярттал Ассоциация»), Фадик Мугулов (Дагъусттаннал Ишбажаранчитурал союз).
Вай так шиккун бувкIмири, цинярда цачIуншивурттал союзру дур Дагъусттаннал Ассоциациялувун духлахисса 18.
З. МахIмудовлул бувсмунийн бувну, Ассоциация сакин бувну бур коммерциялул бакъасса ца профильданувусса организациярду цасса структуралувун (идаралувун) цачIун баншиврул. ЦIанасса ппурттуву га идаралувун цачIун дурну дур 40-яр ххишаласса организациярду. Ганал увкусса куццуй, цIусса Ассоциация баврийну бюхълай бур цайми регионнащалгу, цащалла цаллагу арарду гьарта-гьарза дуллан. Мунийну бюхълай бур профилсса организациярду цачIун дуван, региондалийгу, регионнал дянивгу властьрал органнал дянивгу цIусса уртакьшиврул даражалийн буккан.
Загьиди МахIмудовлул бувсунни Ассоциациялул задачалул хIакъираву. Ганал мукъурттийн бувну, Ассоциациялул мурадруну бур кIулшиву дулаврил даву дачин дуван, активран за лахьхьин бан, миннал даража лавай буллан, цалва бувгьусса къуллугъирттайн тIайлану бикIан. Мунияр ххишалагу, Ассоциация баврийну бюхълай бур дучIан дуван арцурду. Хъунмасса Ассоциация хьувкун, бюхъантIиссар гьуртту хьун жяматийсса сиптардан кумагрансса программарттавух, миннунсса арцурду ласун ва агьамсса проектру дузрайн дуккан дуллан. ПаччахIлугърал властьрал органнащал уртакьну зурча, тамансса проблемартту щаллу бан бюхълай бур ишбажаранчишиврул, ихтиярду дуруччаврил, жагьилтурал иширттал ва цаймигу бутIраву.
«Жун аьркинссар хIала-гьурттушиву дачин дуллансса площадка, паччахIлугърал властьрал органнал жяматийсса организациярду антогонистъталну дакъача, партнерталну, уртакьталну кьамул дулланшиврул, проблемартту щаллу буллансса кумагчиталну», — увкунни правлениялул председательнал.
Деньга Халидовлул бувчIин бувсса куццуй, инсантурал хIарачат бувну бур циву личIи-личIисса мурадру цачIун бувсса, личIи-личIисса пишардал ва социалну активсса агьалинал группартту цачIун бувсса структура сакин бан. Ахирданийгу дузал бувну бур цайми цаппара ассоциацияртту цачIун бувсса «суперассоциация». Мунил нузру тIиртIуну дур цIу-цIусса структурарттангу.
Яла гьарца тикку гьуртту хьусса сопредседательнал бувсунни цалва-цалвами масъаларттал хIакъираву.
«Илчи» кказитрал вакил увманал буллунни укунсса суал: «Му Ассоциациялувун духлахисса строительствалул яни къатри дуллалисса организациярттал кувний документру бакъанма, ягу ми къатIайлану щаллу бувну, къабагьавайсса кIанттурдай къатри дуллай бур строительствалул нормарду ва кьяйдардугу лиян дурну, яла чIярусса диялдакъашивурттащал бувну бур автозаправкартту ва автомойкарду. Миннул хьхьичIалу кьукьин кIанай, зу миннул ихтиярду дуручлантIиссарув?».
Му суалданун жаваб дуллай, Загьиди МахIмудовлул бувсунни ми къатIайлашивуртту хьхьичIми шиннардийра дурну диркIшиву, цIана мукунсса диялдакъашивурттал хьхьичIалу най дуна кьукьлай бушиву.
