ГьунчIукьатIрал шяравасса БитIал Аьли увну ур 1862 шинал заргалнал къушлий. 1886 шинал дурну диркIсса Аьрасатнал переписьрай БитIал Аьлил цIаницIун кIицI бувну бур мунан кIулну бушиву аьраб маз ва оьрус маз.

Цала хъунама ссурахъу Юнуслущал архIал
Армавирдай ва Екатеринодардай БитIал Аьлил тIивтIуну бивкIун бур кIива дуссукъатта. Микку миннал дувайсса диркIун дур Санкт-Петербурглия заказ дурсса, императорнал конвойтуран (бурттигьалтрал кьюкьлун) аьркинсса затру.
БитIал Аьли цалла дахху-ласулул иширттай лагайсса ивкIун ур Москавлив, Петербурглив, Варшавалийн ва Нижний Новгородрайсса ярмукIалийн. Дур 1898 шинал ми­кку рирщусса мунал суратгу.
Ца ппурттуву, цалла дурсса, багьлул ххирасса, кьай-кьуйгу ларсун, гайннуй паччахIлугърал мугьру бищун бан Ростоврайн нанисса ххуллий, цумурдив ца станциялий поездрал чIавахьулттивух ганан ххал хьуну бур цанма кIулсса лак. Гай ккаккан кьатIувгу увккун, махъунай увкIсса чIумал, дирхьуний къаляркъуну дур цалла хъус. Мунил ялув хъинну кьутIинсса ихтилат хьуну бур уссу Юнуслущал. Му ихтилат сававну, Лакку билаятгу, Аьрасатгу кьабивтун, вайлул хьуну лавгун ур БитIал Аьли дунияллийх. Ялавай бишлашисса ва чагъаргу чивчуну бивкIун бур ми гьантрай. Амма, яла, махъ, дакьилгу хьуну, зана ивкIун ур кьатIату.
Уссу Юнус цалла щарссанищал, архIала ивзун, Макка-Мадиналийн лавгун махъ кIивагу дуссукъатлул заллуну ивкIун ур БитIал Аьли, муначIа зий бивкIун бур хIатта бувгьусса зузалтгума – муксса каши дуну ивкIун ур му.
БитIал Аьли аьпалухьхьун лавгун ур оьрмулул 38 шинаву, кIия арсгу махъ кьаивтун, ца 8, цагу 2 шинавусса – Жаруллагь ва КьурбанмахIаммад. Му чIивима арснал КьурбанмахIаммадлул арсну хъанахъиссар жуна чIявуссаннан кIулсса, гьунар бусса архитектор, публицист, жяматийсса ишруккакку Керимов Жаруллагь. Ванал арс Кьурбан-МахIаммадгу жулла респуб­ликалийгу, кьатIувгу цIа дурксса, хьхьичIунсса архитекторди.
БитIал Аьлил кIиягу арс хъуни хьуну мукьах зий бивкIун бур заргалталну Бухарнаву. Жаруллагь тIима ивкIуну ур тиккува 1922 шинал. Мунал цIагу дирзун дур жува ялув кIицI увсса Жаруллагьлун.
Та чIумал Бухарнаву миксса гьарзасса бивкIун бурхха Дагъус­ттаннаясса агьлу, хIатта тиккусса ца махIлалийн Дагъусттан махIла кунугума чайсса бивкIун бур. Жулва заргалтуран тиччалу ккалли хъанай бивкIун бур цила зумунусса «клондайклун». Тикку бивкIун бур сайки щалла дунияллияту савдажартал бучIайсса арцу-мусил, багьлул ххирасса чарттал базаргума.
БитIал Аьлил чагъарданийн бувну чIалай бур цуксса ххирасса бивкIссарив жулва ппухълуннан Буттал кIану, цуксса захIмат буллай ва циксса ххуллурду битлай бивкIссарив цалва маэшатрал цIаний, ци билаятирттайн лавгун бухьурчагу, цуксса кIункIу тIий бивкIссарив цалла Лакку ватандалийн.
Тани нажагь дакъа къарищай­сса диркIсса вай суратиртталгу буслай бур жухьва хъинну бюххансса кьисса, итталу дацIан дуллай дур та заманалул чIалачIин, багьу-бизулул даража, къирият, къилигъ.
Руслан Башаев
———————

Гъурбатраясса чагъар

Азаллий шанттуршуннил
АцIния ххюлку шинал
Къумасса дакIнивату
Дуснайн чагъар чичинна.

Оьруснал апрель зуруй,
Кьуния мяйку хьхьуну
На кьас дував гьижра бан
Идавсил шариаьтрай.

Къума-цIансса дакIнищал
ХъювхъутIи яруннащал
Кьуния урчIунниву
Иврда ЛухIи хьхьиричIан.

ПарахутIрайнгу лавхъун,
Авчура на гьижралий.
ЦичIав дакIнийн къадагьри,
НикирацI оьрчIру бакъа.

Аллагь, на оьрчIаяту
ЛичIи ан савав хьума
ДурчIин къашай цIуцIаврил
Цу къуртал къауваннав.

Къаччинан ччикун хьура,
ЧчинацIа махIрум хьура.
На рутайсса хьхьу-кьини
Рутаннав ттул душманнал.

На ца чагъар гьан банна
Дустурайн, гьалмахтурайн,
Къаччима ххари хьунсса,
Ччинал дакIру гъагъансса.

Хъаралу чIаращарнил
ЛухIи янна лаххансса,
НикирацI мюрщи оьрчIал
Оьттул макьру рутIинсса.

Ттул авлиясса дакIнил,
Пикри бакъасса бакIрал,
Тадбир бакъасса чурххал
Увтунна гъурбатирайн.

Ссурахъил рирт чIатIаракI
КьуртIунни хъазамравун.
Къурталгу къаанссара
Тти на ва азарданул.

Ссурахъил канил чивчу
Чагъарду буккайтари,
Угь учай ва ттул дакIнил,
Чурххахь бияла бакъа.

БавтIсса мажлисрал дянив
Ттухьра зума цIурххукун,
Зурзу учай ттул чурххал,
Зал-гьав хъамаританну.

Ттул дакIнил кьадаршиврул,
Чурххал яхI бакъашиврул
Ссурахъил лажиндарайн
КIурааен къавхьунни.

Ссурахъуй, на сабавну
Винба хьусса зараллу,
Ттул ятинтал бавххуну,
ТIайла бацIанмур бува.

Ссурахъал, хъинну бикIи,
Кьабивтссар Буттал кIану.
Дустал, хIалал итира,
Тти къаккаккантIиссара.

Жаруллагь, дакIнил тIутIий,
ПатIимат, янил чаний,
На зу аманат бував
Зува ляхъан був Заннайн.

Зул ппу чуври увкуну
Зухьва суал буварча,
Ахиратрал къатлувун
Накьлу хьуссар учара.

ЩихачIав зай мачару,
Заннал чивчу кьадарди.
Заннайн леххаву чара,
БуттачIан биян ба тIий.

Буттахъал гьижра байсса
Ханнахъал къиялулъя,
Ттун гьижра бан багьунни
Ссурахъурссил кьацIлия.

Мина дави чайссия
Багъдад буттал шяраву,
Буттахъал къадур мина
Ттуща дуван шайссияв.

Сайрданий лагайссияв
Мармарчарил кьуллардайн,
Хьхьуних сайр бан лагара
Тти аья-суфилувун.

Гьава бан лагайссияв
Москавлийн, ПетIирбурглив,
Тти гьава бан гьаванна
Маккалийн, Мадиналийн.

ИстIамуллал аьрщарайн
Жул парахутI бивукун,
Баххана хьур ттул аькьлу,
Нур дартIри ттул чурххавун.

ИстIамул бугъазравун
Жул парахутI бувххукун,
Алжаннул къапулувух
Бувххун нанисса ххива.

Бугъазрал тия-шия
Ттупал аьрал ххал хьукун,
Ттун ккаркцири дуниял,
Ва таллагь, хъамадиртри.

Шагьрулул мизитирттал
Минарардайн я щувкун,
Пирдавс-алжаннул чIалъаьри
ЧIалачIи бувсса ххива.

Султан-Аьбдул ХIамид-хан
Ссаламлугърайн уккайни,
АцIния ххюннил хьхьуну
ЦIубарз нанисса ххива.

Аьралуннал дасттарду
ХьхьичIух дацIан дурукун,
Дуниял ахир хьуну,
Мяъшарданийн бавтI ххива.

Аьрабусттан чалмарду,
Авнавутнал къушакьру.
Курт хIаммади я Аллагь,
Зунгу ккаккан бан хьурдай.

Дин-исламрал ххуйшиву,
Шавкьатрал хъуннашиву,
Ттул дакIнил гъарибшиву
Зуяту личIи шаврил,

Гьижра бувну учIаврил,
Валлагь, пашман акъара,
Дустал дакIнийн багьувкун,
ДакI къума лаглан дикIай.

На балай къачайссия,
Шамма къачичайссия,
Дардирдал дакIнивату
Махъру балжан къавхьунни.

Аьбдуллагь, аьй мадара
Мукъурттил чIявушиврул,
ЦIуцIаврил дурцIусса дакI
Дуснахьри дачIра дайсса.

Бувккунал дуаь дара,
ЧIаравнал амин чара,
На, пакьир БитIал Аьли,
Дуаьлувух ишара.
1895 ш.