АХIМАДЛУЛ ДУШ ССУНГЪУРОВА ПАТIИМА
Хъунма хIал цIуцIи шанийгу къабувну, ва Ххувшаву ларсун 70 шин шаврил байрангу хьунадаркьуну, жагьи-жугьултрахунгу къабахчуну, хъирив кьини аьпалувух бивхьунни бусайсса мукъуй цIу бусса, чIанийн багьсса, дайсса даву ккаркма мяш хьунну дайсса, мюрщинащалгу, хъунанащалгу буса-учинмур

лякъайсса, Ленинградуллал блокадалувун агьсса дяъвилул ветераннал, милицанал полковникнал, лагма-щархъангу, Вираттиянгу бусравсса Ссунгъуров Зайдил кулпат, оьрмулул уртакь, Вира­ттиял шяраватусса АхIмадлул душ ПатIима.
ПатIима бувну бур Вираттиял шяраву АхIмадлул ва Бахттуншал хъунбакъасса кулпатраву. Яхъанай бивкIун бур Гъумук-Гьухъалив. Ва бия цуппа бусса кIану чIюлу буллалисса хъамитайпа, 4 оьрчIал нину, музейраву, ательелий зий бивкIсса, Совет ХIукуматрал сасан бувсса зунттал инсан. Ванин кIула ухнан ххуллугу, ххувнан ламусгу бан, бусравъя уссу-ссил оьрчIан, шяраваллил жяматран, шагьрулий яхъанахъисса чIахху-чIарахнан. Дяъви байбивхьусса чIумал ва бивкIун бур чагъравусса, жагьилшиврувун бувхсса душ. Ккарккун дур ванингу дяъвилул дардру, ккаши-мякь, къарцинсса шинну, дяъвилия букIлай бивкIсса маоьлул «шанмурцIурду». Гьарзат бувхIуну, ккувхIуну махъ ПатIиман дардругу ккарккунни лякьлул оьрчIал – арснал Камиллул ва душнил Октябринал, жагьилсса оьрмулий, чIун дакъана аьпалувух бивхьуну. Гьав нурданул дуцIиннав цал.
ПатIимал бивкIулул жижара буллай буру арсурваврахь Сергейхь, Шамиллухь, куяв Ссапардухь, уссихь МухIадлухь, вайнная бивзминнахь, арснал хъаннихь, уссурваврал ва ссил оьрчIахь, гъан-маччанахь, щалвагу агьлу-авладрахь. Махънал оьрмурду лахъи баннав, ванил барачат зул ужагъирттай ливчIун лякъиннав, я Аллагь. ПатIимал рухI алжаннул ххари даннав, гьав нурданул дуцIиннав. Амин.
Вираттиял жямат

————————————————

ЮСУПЛУЛ ДУШ АХIМАДОВА ЗУНЗУЛ
Майрал 1-нний, оьрмулул 69 шинаву, дунияллия лавгунни ххаллилсса дакI-аьмалданул заллу, мяйжаннугусса зунттал хъамитайпа, ГьунчIукьатIатусса АхIмадова Зунзул.
Зунзул бувну бур 1946 шинал ГьунчIукьатIатусса Сулайманов Юсуплул ва Гъумучатусса Тахисарахъал Аьйшатлул кулпатраву Гъумук.
1965 шинал Гъумук 11 класс­гу бувккуну, щар хьуну бур ГьунчIукьатIатусса АхIмадов Руслан ХIамидлул арснан.
Гьашину гъинттул ласнангу 75 шин хъанай, архIал яхъанайгу 50 шин хъанахъисса мажлис буван пикрилий бивкIун бур.
1970 шинал Зунзуллул, шяраваллил хозяйствалул техникумгу къуртал бувну, экономистнал пиша лавсъссия. Гара шинал Дагснабрайн бувххун, пенсиялий букканнин, 20 шинай ги­ккусса давурттай зий буссия.
Зунзул бия зузинащал хIал бавкьусса, инсаннал чIарав бацIан чялишсса хъамитайпа. Ванил цила ласнащал хъунигу бувну, чивун буккан бунни арс ва кIива душ, ччинал цалва хьурдай учинсса.
Зунзул, цилла даву дакI цIий, тIайлану биттур дуллай зий бивкIун тIий, лайкь хьуну бия цимирагу ХIурматрал грамоталун ва арцуйнусса бахшишир­ттан.
Зунзуллул кьурчIисса бивкIу­лул къумашиву кIидачIлай, жижара буллай буру ванил ласнахь Русланнухь, арснахь, душварахь, ссихь, цинявппагу уссур­ссуннахь ва гъан-маччанахь.
Зунзуллун бакъамур ванил оьрчIан, оьрчIал оьрчIан булуннав.
Цил бунагьирттал аьпа баннав, рухI хъинний дишиннав.
ГьунчIукьатIрал, Гъумучиял ва КIямашрал жямат