Аьлибагова Сайдхалум АхIмадовна, ДГУ-рал филологиялул факультетгу къуртал бувну, чIярусса шиннардий зий бивкIун бур Къизилюртуллал райондалийсса Султанянгиюртуллал 1-мур школалий. ХьхьичIунсса, хIарачат бусса пишакар хIисаврай ва бувцуну бур Къизилюртуллал райондалул КIулшивуртту дулаврил управлениялий зун. ЧIярусса шинну дурну дур микку хъунмур специалистну зий. Ва бур Аьрасатнал Федерациялул лайкь хьусса учитель, Аьрасатнал аьмсса кIулшивуртту дулаврил хIурматлувсса зузала. Му бакъассагу, кIулшивуртту дулаврил аралуву бивхьусса захIматрахлу лайкь хьуну бур цикссагу ХIурматрал грамотардан ва барчаллагьирттан.

Къизилюртуллал райондалий­сса лакрал кюруну хъана­хъисса Хъанардал шяраву 2-3 шинал хьхьичI тIивтIуссия цIусса школа ва му школалун дуллуссия Совет Союзрал Виричу ХIажи Бугъановлул цIа.
Ххувшаврил байрандалул гьант­рай школалул хIаятраву бюхттул­сса даражалий тIиртIунни ХIажи Бугъановлунсса гьайкал.
ЧIявусса миллатру бусса Къизилюртуллал райондалийсса, жула Виричунал цIа дирзсса, школалул директор лакку инсан лякъаврия хъиннува ххари хьуру. Ва школа тIивтIусса чIумал, шикку директорну бацIан ччисса чIявусса бивкIун бур. Ххюттуршлийсса учительтурал дянив конкурс баян бувну, миннава бувчIуну бур кIулшивуртту дулаврил аралуву зий чIярусса шинну дурсса, хъунмасса опыт ва куртIсса кIулшивуртту дусса учитель, Хъусращиял шяравасса Аьлибагова Сайдхалум АхIмадовна. Ва хьуну бур цалчин конкурсрал гьанулий бувчIусса директоргу. Шиккува кIицI лаган, тай шиннардийсса Къизилюртуллал райондалул бакIчигу тIайлашиву ччисса, марцIсса инсан ивкIун ур. Ванал сипталий дурну дур директор язи угьансса конкурсгу. Конкурсрал хIасиллу дуллалинигу тIайлашиврул тарап дургьуну, директорну бивтун бур Сайдхалум АхIмадовна. Утти цичIанма школалийн кьамул буллалисса жагьилсса учительтал Сайдхалумлулгу мукунма конкурсрал гьанулий язи бугьлай бур. ЦIуну гьану бивзсса школалий дуккаврил процессгу нирхиравун бувтун, ххуйсса пишакартурал коллективгу салкьи бувну, цийнна дурсса вихшала лайкь дан хIарачат буллай бур Сайдхалум АхIмадовна. Зий хъунма хIал къавхьусса ва школалий уттиния тихуннай дуллансса давурттивгу чIярусса дур, дузал дан багьлай бур уттизаманнул школардайсса цинярдагу шартIру. Щак бакъар ца кулпат кунма бавкьуну зузисса ва коллективрал мигу щаллу данссар тIисса. Сайдхалум АхIмадовнал каялувшиннаралу вай учительтурал уттинингу, ца-кIира шинал дянив, хъунмасса захIмат бивхьунни школалул цIа гьаз дан, оьрчIан куртIсса кIулшивуртту дулун.
ХIакьинусса кьини ва школалий дуклай ур 754 оьрчI, зий ур 72 учитель. Школа тIивтIуния шихунмай, оьрчIру итххяххан баву мурадрай, шикку зузи дурну дур «Рассвет» тIисса хореографиялул ансамбль. Дуклаки оьрчIал цалла кIулшивурттал, бюхъу-гьунарданул даража ккаккан буллай бур личIи-личIисса конкурсирттай. Вай гьантрайгу шикку дуклакисса лакку душ Лукьманова Насибал «Первоцвет» тIисса республикалул конкурсраву 3-мур кIану бувгьунни. Ларгсса шинал вара конкурсраву ванил бувгьуссия 3-мур кIану. «Умники и умницы» тIисса райондалий хьусса конкурсраву 2-3 шинай лув-ялув 1-сса кIану бувгьуну бур Хъанардал школалул дуклаки оьрчIал.
Уттигъаннугу «Осенние посиделки» тIисса театрданул журалий­сса Аьрасатнал конкурсраву вайннал бувгьунни 1-сса кIану. Вай барча бан ва оьрчIан бахшишру дулун Москавлия Хъанардал школалийн ва зурул ахирданий бучIан тIий бур ва конкурсрал вакилтал.
Школа зий хъунма хIал къавхьунугу, шиккусса учительтурал ккаккан бувну бур цалла пишакаршиврул даража. Школалул коллективраву «Учитель года» тIисса райондалул конкурсраву цалчинсса кIанттурду бувгьусса учительтал чансса бакъар. Оьрус мазрал дарсирдал учительница Дадаева Гульмира 2014 шинал «Учитель года» хьуну бур. Мура цIанин лайкь хьуну бур 2012 шинал чил билаятирттал мазурдил учитель Мадина МахIаммадова. Школалул завуч Мариям АхIмадова ДР-лул КIулшивуртту дулаврил отличник бур, байбихьулул классир­ттал завуч Светлана Рамазановна аьмсса кIулшивуртту дулаврил хIурматлувсса зузала бур.
— Жул коллектив уттигу жагьил­сса бур, вайннал гихуннайгу цалла кIулшивурттугу, бюхъу-бажаргу ккаккан банссар тIисса вихшала дур, — тIий, цила учительтурая рязийну бур Сайдхалум АхIмадовна.
ХIажи Бугъановлул гьайкал тIитIлатIисса шадлугърайнгу, Сайдхалум Аьлибаговал каялувшиннаралу, учительтурал коллективрал ва дуклаки оьрчIал ххуйсса хIадуршинна дурну дия. Хъинну асар хьунсса программа ккаккан дунни ва кьини хъамаллуран ва шяраваллил жяматран ва школалул дуклаки оьрчIал.
Школалувун буххайхту итта­лун багьлай бия учительтурал оьрчIащалсса даву лавайсса даражалий дирхьуну душиву. Умуд бур Виричунал цIанийсса ва школалия итххявхсса, гьунар бусса, школалул цIа лайкьну дуруччинсса оьрчIру букканссар тIисса.
Имара Саидова,
Андриана Аьбдуллаева