Ассоциация сакин бувссар 2013 шинал Ухссавнил Ккавкказуллал федерал округрал 1-мур форумрай, цачIун бувссар СКФО-рал субъектирдал яла агьамми СМИ-рду.

«Ттул журналистътуращал ххуйсса арарду хьуну дур. Агарда журналист зий ухьурча аьчухну, мурадлувну, му чIумал ганал ттун кумаг буллалиссар ттул давриву. Журналистнал ттун кумаг байссар цукунсса- бунугу проблемар­тту чIалачIи бан», — увкунни Рамазан АьбдуллатIиповлул.
Дагъусттаннал БакIчинал хъамал кIул бунни республикалийсса тагьарданущал ва бувсунни Дагъусттан цIубуккан баврин хасну цалла дансса давурттая. Ганал мукъурттийн бувну, цIана дузрайн дуккан дуллай бур 7 приоритетсса проект, зий бур дуккаврил масъалалуха ва культура гьаз даврил масъалалуха. Экстремистшиврущал ва террорданущалсса талатаврил хIасиллу ккаккиялунсса хьуну дур: хIакьину преступностьрал даража Дагъусттаннай 32-лий ялавайну бур дянивну лавсун Аьрасатнал Федерациялийнияр.
Рамазан АьбдуллатIиповлул увку­сса куццуй, Ставрополлал крайрал, чIаххуврай бунагу, дакъар кIивагу региондалул цачIусса экономикалул ва культуралул проектру. Мунияту хIадур дуллай бур мукунсса цаппара проектру, миннувух дур машлул бутIувуссагу.
Мунищала архIал Республикалул каялувчинал тапшур бунни ялун нанисса чIумуву гьарза дуллан регионнал дянивсса уртакьшиву, цачIу кказитру ва телепрограммартту дуккан дуллай.
СМИ-рдал иширттал хIакъираву буслай, Рамазан АьбдуллатIиповлул увкунни: «Агарда ттун чIаларча журналистнал, цалва пикри-зикригу буслай, цалва буккултрал буруккинттугу ккаккан буллай ушиву, на хIадурссара мунащал архIал хIакьмунихлу талан. Амма ганал макьалалухгу багьа лавсун бухьурча ва авторнал щилчIав мурадру биттур буллай ухьурча, му чIумал га инсан ттун бусравну къаикIанссар журналист хIисаврай».
«Ухссавнил Осетия» кказитрал хъунама редактор Александр Гориннул буллу­сса, Аьрасатнайн къаршисса санкциярттал Дагъусттаннал экономикалийн биян був­сса асардал хIакъиравусса ва республика импортозамещениялул программалуву гьуртту шаврил хIакъиравусса суалданун Рамазан АьбдуллатIиповлул бувсунни хIакьину чIяруми давуртту дуллай бушиву АьФ-лул Президентнал «майрал» хIукмурду биттур баврин хасну.
Республикалул хъунаманал бувсъсса куццуй, Дагъусттаннал БакIчинал Аьра­сатнал ХIукуматрал хьхьичIун ларсун дур сайки 80 даву импортозамещениялун хасну. Амма мунищала архIал респуб­ликалий чIявуми заводру щаллуну зий бакъар, экономикалул тагьар захIматсса духьувкун. Уттигъанну Внешэкономбанкирал Дагъусттаннан личIи дурссар 1 млрд. ва 300 млн. къуруширттал «Уйташ» индустриальный паркирал инфраструктура дузал баншиврул.
«Грозный — информ» ИА-лул директорнал буллунни суал, шяраваллил хозяйствалул бутIуву импортозамещениялул программа дуз давриву республикалул дуллалисса давурттал хIакъираву.
Рамазан АьбдуллатIиповлул жавабран бувсунни махъсса 2 шинал мутталий шяраваллил хозяйствалуву дурсса ва дуллалисса давурттая.
Ихтилат хьунни мукунма Хъунмасса Буттал КIанттул цIанийсса дяъвилий ххув хьуну 70 шин шаврил байрандалийн хIадур шавриягу, ЕГЭ дулаврил ва аьмну дуккаврил иширттал хIакъиравугу, информациялул политикалул хIакъиравугу.
ХIадур бувссар ХI. Аьдиловлул