Вай гьантрай «Лакку Билаят» тIисса культурно-прос­ве­тительский центрданул сипталий лакрал жагьилтал Москавлийсса лакращал хьунабавкьунни. Лакрал культуралул вечер ларгунни Москавуллал Миллатирттал къатлуву.

Ва ххаллилсса батIаву даврил агьаммур мурадгу бия лакку маз ябаву, миллатирттал аьдатру, багьу-бизу буруччаву. Жагьилсса ник хъуниминнащал кIул хъанахъисса, хIала-гьуртту буллалисса, цачIун буллалисса жагьилтурал сипталийну дурсса цалчинсса ва даву хъинну хъуннасса агьамшиву дусса хъанахъиссар. Ва кьинисса мажлис бачин бувну бия Юсупхъал Нураттин ва Москавуллал областьрайсса адвокатътурал коллегиялул адвокат ЛухIухъал Аминат. Лакрал халкьуннал авадансса тарихрая бусласисса кутIасса презентациягу дурну, ккаккан дунни Москавлий ялапар хъанахъисса лакрал хIадур дурсса концерт. Магьирну аккордеон бишлай ия Ажуев Жаруллагь, дачIу ришлай ия МахIаммадов Шамил, лакрал халкьуннал макьаннайсса балайрду увкунни ХIусманов Ибрагьимлул ва МахIмудова ПатIиматлул. Лакрал халкьуннал аслийсса къавтIаву «Чаргу» ккаккан дунни Наида Атаевал каялувшиннаралусса «Выше гор» тIисса Ккавкказуллал ва Заккавкказуллал къавтIавурттал ансамбльданул.
Гъумук ванияр 5 шинал хьхьичI лавсъсса хъатIувасса бутIри экрандалий ккаккангу бувну, муния балжину бувсунни ЛухIухъал Аминатлул. Лакрал литературалиясса ихтилат бунни ВШЭ медиакоммуникациялул факультетрал 2-мур курсирал студентка Мяммахъал Фаридал. Лакку мазрайсса шеърирду бувккунни Москавуллал ПаччахIлугърал строительствалул университетрал градостроительствалул факультетрал 2-мур курсирал студент ХIасайнихъал Рашидлул, Москавуллал ПаччахIлугърал машиностроительный университетрал студентка Усттархъал ПатIиматлул. Мукунма ва батIаврий шеърирду бувккунни шаэр, журналист,филологиялул элмурдал кандидат, Аьрасатнал Федерациялул Журналистурал ва Чичултрал союзирттал член, ДР-лул лайкь хьусса учитель Миясат Муслимовал.
Мукунна дунни лакку маз, лак­рал тарих ва культура цуксса кIулну дурив ххалдуллалисса викторинагу. Ва викториналувусса суаллан жагьилтуращал ччалли жавабру дуллай ххув хьунни оьрмулул бугьарами.
Мукунма ва батIаврий ихтилат­ру бунни, ва дакIнийхтуну жагьилтурал дурсса даврихлу барчаллагь увкунни бусрав­сса хъамаллурал: «Дагестан» Москавуллал культуралул центрданул президент Арсен ХIусайновлул, Дунияллул халкьуннал паччахIлугърал къуллугърал ва управлениялул паччахIлугърал ва конфессионал хIала-гьурттушиврул кафедралул профессор АьбдулхIамид Булатовлул, Дагъусттаннал агьалинан ххуйну кIулсса меценат Оьмари Каллаевлул ва цайминналгу.
Ахирданий циняв шиккун бувкIсса хъамаллурал хьхьичI авадансса лакку дукрардал ссупра тIивтIунни «Жи есть» ресторандалул чулуха ПIаркьухъал Камилал.
«Лакку билаят» культурно-просветительский центрданул чулуха Юсупхъал Нураттин дакIнийхтуну барчаллагьрай ур лакрал миллат цачIун буллалисса, жулва миллатрал хьхьичIавасса багьу-бизу хъама къабитаву, лакку маз ябаву, буруччаву мурадрай дурсса агьам­сса даву сакингу дурну, чIаравгу бавцIусса, жулва Лакку билаят унгу-унгуну ххирасса, ххаллилсса лакрал жагьилтурахь: Мирзахъал Кариннухь, Аьли­хъал Исмяиллухь, ХIасайнихъал Рашидлухь, Мяммахъал Фаридахь, ЛухIухъал Аминатлухь.
— Вай на кIицI лавгсса оьрчIру ва душру хIакьинусса кьини цивппа зузисса ва дуклакисса кIанттурдай хьхьичIунну буссар. Укунсса жагьилтуралли жулва миллатрал цIа-кьини бюхттул дантIисса. Жагьилтурал сипталий дуллалисса цалчинсса даву цукун хьунавав тIий пикрирдай бивкIру. Хьунни чIявусса бучIан ччай бивкIсса, амма, кIанттурду къавхьуну, бучIан къавхьусса къаччан бивкIсса инсанталгу. ЯлунчIил дуллалисса батIаву, циняр диялдакъашивурттугу хIисавравун ларсун, хъиннура гьарта-гьарзану ва агьали рязий хьунну дан хIарачат банну, — тIий буслай ур Юсупхъал Нураттин.
ХIадур бувссар И. Саидовал