«Илчилул» лавгмур номерданий жу чивчуссия МахIачкъалалийсса аэропорт Совет Союзрал кIийла Виричу АхIмад-Хан Султаннул цIанийсса бухьувкун, укун тIий чичавангу, учавангу аьркиншиву, укунсса тIалавшинна душиву журналистътураягу. Вайва гьантрай интернетраву, «Фейсбукрай» МахIачкъалаллал аэропортран цIа «Уйташри» тIий къяна бувгьусса инсантал бивкIунни, ттунгу миннащал бястлийсса ихтилатру буллан багьунни. Чул бищунсса гьану бакъанува, «Уйташ» тIий чивчуну бия аэровокзалданийгу тIий. Хаварду гьаз хьунни аэропортрайсса АхIмад-Хан Султаннул гьайкалгу дукьлакьиссар тIисса. Бувккунни хаварду аэропортрая дуркьсса бюст Ваччавсса гьайкалданий дирхьуссар тIиссагу. Вай тIардал дазу рищуншиврул, на оьвкуссия аэропортрай зузисса Алексей ХIажиевлухь гьайкалгу дунийра душиву, аэропортран цIагу «Уйташ» дакъашиву чIалачIи буллалисса суратру рирщуну гьан дува куну.

ПатIимат Рамазанова
ЖучIан гьан дурсса суратирттал бувсунни май зурул 8-нний аэропортрайсса АхIмад-Хан Султаннул гьайкалданучIа хьушиву Хъуннасса Ххувшаврил 70 шин шаврил юбилейран хасъсса митинг. Вара кьини Виричунал гьайкалданучIа бивхьуну бур тIутIал шалккарду ва кацIру, ихтилатру бувну бур Ххувшаву ласунсса виричушивуртту дурсса ва жанну харж дурсса дагъус­ттаннал летчиктурая. Хъунма­сса хIурматрай кIицI ларгун дур кIива миллатрал хъунасса арс, машгьурсса летчик-испытатель АхIмад-Хан Султаннул цIагу. Митинграйн бавтIминнал хьхьичI ихтилат бувну бур Аьрасатнал Виричу МахIаммадов Дибир-ХIажи ХIасановичлулгу. Суратрай чIалай дур аэропортран цIа «АхIмад-Хан Султаннул цIанийсса международный аэропорт МахIачкъала» душивугу.
Ялагу. Вайва гьантрай интернетраву баян бунни Украиннал Радалул депутатътурал (240 депутатнал чIу буллуну) Симферополлал аэропортран АхIмад-Хан Султаннул цIа дирзшиву. На буккав му цIусса хавар «Крымские новости» агентствалул сайтрай. Ххари хьура, СССР-данул циняв республикардай Виричунал цIа аэропортирттан, шагьрурдан дизларчагу чIяру къахьунссар тIий бивкIра. Виричунахсса ччаву ялтту дурккун, цал, «ницал хъунмур ппалавва бушиву» бувчIлай къабивкIра, Украиннал дизарчагу, Американал дизарчагу рязийну бивкIра. Амма къащи хьунни ттулла ххаришиву нахIакьдансса диркIшиву бувчIайхту, Виричунал цIанил хIурмат бакъасса даву душиву бувчIайхту. Гьаннайсса, ттулва бакIрайн кьутI увкуну, пахрулул макIлива нава чантI учайхту. Ца билаятрал парламентрал ци къуллугъри цамур билаятрал аэропортран цIа дизлан? Жунма дакIнийри Къирим Украиннал республикану дусса шиннардийва Къиримнал агьали Украиннал хъуниминнайн бувкшиву, Симферополлал аэропортран АхIмад-Хан Султаннул цIа дизаву тавакъю буллай, амма украиннал националистътуран кьамул къавхьушиву. Къиримнал тIалавшинна кьамул къадувансса хIуччанугу бивкIссар ва цIанилусса аэропорт бунува бушиву. Уттирив, Къирим Аьрасатнал республика хьувкун, Виричунал цIа гьаз дувансса сант ляркъуну, Киеврайсса хъуними щил каних мечI би­ттунсса кьасттирай буссарив пIякь бивкIун чIалай бур. Украиннал парламент­рал машвара щащансса кьаст душиврия усттарну чичлай ур вай гьантрай журналистътурал группалущал жулла республикалийн увкIсса блогер Александр Горный («Эхо Москвы»): «На АхIмад-Хан Султаннул цIанийсса МахIачкъала аэропортрайн ивсса кьини, май зурул 14-нний, бавунни ттун Украиннал Радалул Симферополлал аэропортран АхIмад-Ханнул цIа дирзссар тIисса хавар. ДакI дарцIуну ура ва политикалул хIилла душиврий. Аьрасатнаву бур АхIмад-Хан Султаннул цIанийсса аэропорт. Дагъусттаннай. МахIачкъалаллал аэропортрал генеральный директор Станислав Невзоровгу ур украиннал депутатътурал хIукму духIин дакъасса бур тIий.
Ца билаятрай цава ца инсаннал цIанийсса кIива аэропорт къабикIайссар, Симферополлал аэропортрал гендиректор Евгений Плаксиннул баян бунни уттиния тиннайгу цалва аэропорт­ран «Международный аэропорт Симферополь» тIисса цIа личIантIишиву, Украиннал парламентрал хIукмурдугу Къиримнал парламентран кьамулну бакъашиву».
Политикалувун куртI хъанан къачча, Къиримнал хIакъиравусса ттулвамур пикригу ттулва буттукьраву, кьункьуллулу битанна, амма бусалардавун агьсса летчик-аснал цIагу цIакьлин дургьуну, политикалул макрурду щашлашаву кьурчIи бизлай бура. Ва бюхттул­сса летчик-испытательнал цIанил хIурмат бакъашивур.