МахIачкъалаллал кIичIирттаву хьусса чIири-хъунсса дахханашинна най дуна шагьрулул халкьуннал итталун къадагьну къаличIай. Вана вай гьантрайгу социал сетирдаву ца яла къулагъа­сралун дагьмур цIушинна шагьрулул цаппара кIичIирттаву ттинин жунна жулва шагьрулий къаккарксса цIинцI-ччюрк дичлансса уттизаманнул контейнерду дирхьуну дусса дур тIисса дия.

З. АьбдурахIманова
Мяйжаннугу, цIана хъуншагьрулий най дусса дур ччюрк дичлансса контейнерду дишин­сса кIанттурду бакьин буллали­сса давурттив.
ЧIал къавхьуну МахIачкъа­лаллал халкьуннан цалла ччюрк дичайсса кIанттурдайсса муххал къуршан кIанай ккаккантIиссар уттизаманнул пластикрал контейнерду. Вай контейнерду ду­сса дур хъунисса, чIярусса ччюрк лагайсса ва тиннай-шиннай дан бигьашиврун колесру бусса.
Вай контейнердал дусса дур ца цамургу къулайшинна. Ччюрклия оьккисса кьанкь къаришлан, ризкьи, лелуххант къа­батIлан контейнердал ялув дусса дур кьалакьивгу.
ХIакьинусса кьини 15 контейнер дирхьуну дусса дур Хуршиловлул, Лениннул ва С. Стальскийл цIанийсса кIичIирттаву. ЧIал къархьуну контейнерду дишин тIий бусса бур Дахадаевлул цIанийсса кIичIираву Хъун мизитрая арх дакъа.
Шагьрулий цIинцI-ччюрк­лицIа марцI буллалисса масъалалуха зузисса «Каспий-Инвест» компаниялул хъунама инженернал бусаврийн бувну, Таганрог­рая МахIачкъалалив ттигу 200 муххал ва 10-хъул пластикрал контейнерду дучIан тIий дусса дур. Мукунма компаниялул машан ласун тIий бусса бур ччюрк ххилантIисса цаппара машинарттугу.
ЦIана МахIачкъалаллал кIи­чIирттаву 6400 контейнер ва 1800 муххал урна дусса дур. Амма жулва къачIивисса шагьрулий вайгу чанссар. Контейнерду чIяруми дур дух хьу­сса, даххана дан багьлагьисса. Чан къашайсса бур халкьуннал кIичIирттава контейнерду дарцусса ишру. Мунияту ва ишираву «Каспий-Инвестрал» хьхьичI бивхьусса щаллу бан багьлагьисса масъалартту цагу-кIивагу бакъар. Халкьуннайнсса цалла оьвчавривугу ччюрклил кьуцуртту ччи-ччинийн бувтун къакьабивтун, курчIил къавхьуну, ккаккан бувсса кIанайн бутира тIий тавакъюрай бур.