Мартрал 12-нний МахIачкъалалив хьунни Аьрасатнал кьиблалул театрдал Ассоциациялул заседание. Мунил лагрулуву Ассоциациялул правлениялул председатель Микаэл Базоркиннул бувсунни штаб-квартира Ингушетиянава Дагъусттаннайн бизан буллалишиву.
Бадрижамал Аьлиева
«Укунсса хIукму кьамул баврингу бур цаппарасса багьантту. Цалчин, Дагъусттаннай бур 13 театр. Ингушетиянаву пресс-конференция батIлатIиний, муний яла чIявуми инсантал Дагъусттаннаясса бикIайва. КIилчингу, шийх хъинну ххуйну итххярххун дур культуралул инфраструктура. Шамилчингу, Дагъусттаннай хIасул хьуну дур культуралухсса ляличIийссара бургаву – кризисрал чIумал Поэзиялул театр тIитIаврил чIявусса затру бусласиссар», — увкунни Микаэл Базоркиннул.
Ванал бувсунни Ассоциациялул сопредседательну ивтшиву М. Горькийл цIанийсса Оьруснал драмалул театрданул художествалул каялувчи Скандарбек Тулпаров.
Гихунмай ххалбивгьунни кризисрал шартIирдаву Ухссавнил Ккавкказуллал театрду бакI буккансса цIусса чаранну, ххуллурду лякъаврийн, «кадрардал дефицитращалсса» талатаврийн ва москавуллал вузирдащал цачIусса проектирдайн багьайсса, Уттизаманнул театрал культуралул центр тIитIаврийн багьайсса масъалартту.
Гихунмай Микаэл Базоркиннул бувсунни гьарца шинал Ингушетиянавун букIлай бивкIшиву Театрал искусствалул Аьрасатнал университетрал (ГИТИС) выездной комиссия, Аьрасатнал щалвагу Кьиблалиясса абитуриентътурах вичIидихьлай (прослушиваниярду), миннан консультациярду дуллай. Бувсунни Ассоциациялул дуллай бивкIшиву икьраллу шивун бухлахисса театрдал республикарттал культуралул министерстварттащал, цащалва театрдащал ва РУТИ-ГИТИС-рал каялувшиннаращал. Бувсунни 2016 шинал ГИТИСрал комиссия Дагъусттаннайнгу бучIантIишиву. Ххи бунни ЮНЕСКОлул отделениярдавасса ца бучIантIишиву Ккавкказнавун дунияллул культурардал хазнарду буруччаву мурадрай, яни – дунияллий ва Аьрасатнаву ххуйну къакIулсса Ккавкказуллал культура театрал искусствалийну машгьур давриха зун.
— Ккавкказуллал культура – му караматри, цимивагу чул бусса, ссикъадуцIайсса. Жу буклай буру дунияллул даражалийн: жучIара хъанай дур каши жулва театр дазул кьатIув буккан буллансса, жулва театрду буручлансса. Шикку арцулмур масъалалия ихтилатвагу бакъассар. Ихтилат, хьхьичIва-хьхьичI, хъинсса имидж, статус щаллу шаврияр. Вай программардайн бувну Ккавкказнавасса гьунар бусса оьрчIру гьантIиссар дазул кьатIув дуклан. Гьунар бусса режиссертал, актерталгу гьантIиссар дазул кьатIув, — увкунни ванал.
Шикку, мукунма, гьаз бунни хасъсса кIулшиву дакъа зун къабучIи буллалисса закондалиясса ихтилатгу.
— Хъинну чIявусса инсантал бур театрдаву зий театрал кIулшивуртту дакъасса, амма даврил хъинну хъунмасса опыт бусса. Ва закондалийн бувну, ми давурттая букьан бангу бюхъайссар. Жунгу ххишала бакъа захIматну бикIантIиссар хасъсса комиссия бувккун махъ мукунсса инсантал театрдаву бацIан буван. Мунийн бувну, ва масъалалулсса цIанава буван аьркинни, — увкунни М. Базоркиннул.
