Ва шинал бартлаглай дур Ххувшаву ларсун 70 шин. Бюхттулсса Ххувшаву жура ларсъссар хъинну захIматну. Миллионну солдатнал ва хIаписартурал жанну кьурван дурссар Ватан дуручлай. Дяъвилул цIараву жулва инсантурал ялун личин дурссар Ватан ххирашиву, чувшиву, дакIурдил кьянкьашиву, чумартшиву. Дяъвилул цIараву чIявусса инсантал харжгу хьуссар.
ЗахIматну бивкIссар гьарца шаттирах. Амма, дяъви жуйнма баян бувну бухьувкун, талан багьлай бивкIссар фашизмалущал. БакI чулий дугьансса мажал къабивкIссар. Га дяъвилул ахир дуваншиврул, багьлай бивкIссар чара бакъа ххув хьун. Жулва аьралуннал бунияла чIярусса чувшивуртту дурссар. Бусалардавун багьну бур 300 бунияла хьусса иш, махъа нанисса аьралуннан ххуллу тIитIин хьхьичIсса душманнал дзотру цалва чурххардийну лавкьусса виричушивуртту. БакIраяту жува бух хъанай махъунмай хьун багьссар, Ленинградрайн, Москавлив, Волга неххачIан, Ккавкказнавун бияннин. Амма жулва халкь мукIруну бивкIссар махъунмай хъанахъаву чIумуйнусса душиврийн. Къинттуллух зузими, дяъвилул ххуттай талатими душманнал хьхьичIсса ца баруну хьуссар. Совет аьралуннан кIулну бивкIссар цанма кумаг буллай къинттуллух ниттихъул, кулпатру, бугьарасса буттахъул, ттаттахъул, цалва оьрчI-душру бушиву.
Совет аьралуннавух талай бивкIссар хъинну чIявусса дагъусттанлувталгу, 180 азара инсан. Вайннавух ивкIссар Ккуллал райондалийсса Ккуллал шяравасса 465 адаминагу. Миннавату зана къавхьуссар 232 ккуличу. Жул, Ккуллал, чиваркI талай бивкIссар циняв дяъвилул фронтирттай. ЧIявуми лайкь хьуссар орденнан ва медаллан.
Дяъвилувух гьуртту хьусса запасрал хIаписар Къаллаев лайкь хьуссар «Боевого Красного Знамени» ва цаймигу орденнан ва медаллан. Оьмар Оьмаров лайкь хьуссар «Красной Звезды», «Отечественной войны 1степени», «Орден славы 1 степени» орденнан ва чIярусса медаллан. Ккуллал шяраву мукунсса чиваркI чансса бакъар: Рамазан Аьбдуллаев, Рашид Мусиев, Жяъпар Рамазанов, Аьлил Рамазанов, Оьмари Каммаев, МахIаммад-ХIажи ХIажиев, Сайпу МахIаммадов. Ккуллал чиваркIуннал чувшивурттаяту чивчуну буссар чIявусса. Ккуллал шяравасса чIявусса комсомольцынал жанну харж дурссар Ватан дуручлай. Миннавух бур: МахIаммад Аьбдуллаев, ХIусайн Ибрагьимов, Муса ва Ибрагьин МахIаммадовхъул, Рамазан АьбдурахIманов, Рамазан Акуруев, ХIасан Аьбдуллаев, Жамал Оьмаров, Оьмар Оьмаров, Мусалав Оьмаров, Оьмари Ибрагьимов, ХIажи Шуаьев ва чIявусса цаймигу.
Хъун дяъвилул ца гьурттучуная бусан ччива ттун гьарта-гьарзану.
Му Ккуллал шяравасса Мурачуев МахIаммад МахIмудлул арсри.
Пулеметчик Мурачуев МахIаммадлул ца талатаву.
1945-ку шин. Апрель. Дяъви къуртал хъанахъисса чIалай бунува, немец данди бацIлай бивкIун бур. Апрельданул 18-нний 3-мур батальон, 331-мур гвардиялул битултрал полк, цивугу талай ивкIсса дагъусттанчу, гвардии рядовой Мурачуев, гъан хъанай бивкIун бур Австриянавусса Вельблинг тIисса зунттал ккурлучIан. Шикку вайннайн къарши бавцIуну бур немец. Миннал вайннайн гьужум бувну бавчуну бур. Жулва батальондалун лагь хьун багьну, хьунабавкьуну бур немецнал солдат. Дайдирхьуну дур хъинну къизгъинсса талатаву. Снарядирттал, автоматирттал чIурдал бюхттулсса чIу бивкIун бур.
Мурачуевлул цалва пулемет бивхьуну бур ца чIирисса лагьшивруву, роталул ца чулух. Яла битлан ивкIун ур ялун нанисса немецнайн. БакIрай нанисса немецнал танкалува гьаз хьуну бур ца чIивисса пуркIурал ттугъ. Амма га ттугъ ппив хьуннин, пIякь увкусса чIу хьуну, танк дунийра дарцIуну дур. Хъирив наними, цахъис хIурхIа хьуну, мугъаятну дарчуну дур. Му чIумал немецнал роталул ца чулух Мурачуевлун ххалхьуну дур ссур хьуну цала чулиннай нанисса бронетранспортер. Пулемет Мурачуевлул ганил чулинмай кIура баен бувну, битлан ивкIун ур. Агь, вил къаттай, ялагу дакъарцIуну, цала чулиннай най, цачIанна диявай диркIун дур.Туннурду буцавай бивкIун бур, ссавур кIюла хъанай. КьатI хъанан бивкIун бур немец. Гай махIаттал хъанай бивкIун бур цалла бронетранспортер цайнна битлай душиврия. Ца кIапIал немецнал ялагу гъан хъанай диркIун дур бронетранспортерданучIан. Мурачуев авцIуну ивкIун ур гай хъиннува гъан хьуннин. ЧIалай диркIун дур гайннал луххал дурцIусса нетIри. Яла, хъиннува гъан шайхту, «цулун» ивкIун ур Мурачуев. Цаягу къаивтун, циняв кьатI бувну бур. Амма бронетранспортерданул лагма ялагу минарду пIякьа тIий диркIун дур. Ца чIарав пIякь учайхту, га хIалдания лавгун ур. Цайна цува учIайхту, контузия хьусса бувчIуну бур. Ялагу немец чIалай бивкIун бур цачIанма най. Амма гай гъан хьун къабивтун кьатI бувну бур.
Дяъви най бивкIун бур щала шалклуйх. Бронетранспортерданул лагмасса гранатартту дартIун дур, ялагу Мурачуевлул цучIав гъан хьун къаивтун ур. Ряхра ссят ларгун дур бронетранспортер Мурачуевлухьхьун дирирния шиннай. Му чIумал хъирив лавсса жула аьрал чIалан бивкIун бур арх бакъасса бакIурдий. БронетранспортерданучIан жулва саллатI гъан хьусса чIумал, гай махIаттал хьуну бивкIун бур гиккусса немецнал кьаркьаллал чIярушиврий. Га Мурачуевлул даву диркIун дур.
Дяъвилия Мурачуев сагъну увкIссар, амма мушакъат хьуну. Цахъис хIаллай МахIаммад Мурачуев фельдшерну зий ивкIссар. Яла махъ Дагъусттаннал шяраваллил институтравун увхссар.
Мурачуев МахIаммад кунмасса вирттал жул Ккуллал шяраву чансса бакъар. Гайннал дурсса чувшиву тачIав дакIния къагьантIиссар.
Ккуллал шяраву вирттаврал цIарду абад дуван дацIан дурну дуссар лахъсса гьайкал. Школалул оьрчIру мудан муних буруглай, лагма-ялтту марцIшиву ядуллай буссар.
Жу муданмагу хIурматрай, аякьалий буссару Хъун дяъвилул гьурттучитураха. Гайнналлихха жунма пишкаш бувсса тархъансса оьрму. Ми мудангу жул дакIурдиву буссар.
ПатIимат Аьбдуллаева,
Ккуллал 2-мур школалул
10 «б» классрал дуклаки душ
