Март зурул 4-нний ДР-лул Художниктурал союзрал къатраву хьунни нукIузаманнул зумувну бувсса табасараннал халичарттал выставка. Выставка сакин дурну дия ДР-лул Культуралул министерствалул, «Дагестанский аул» тIисса этнографиялул музей-заповедникрал, Хивуллал халичарттал фабрикалул ва ДР-лул Художниктурал союзрал.
И. Саидова
«Традиционные ремесла. Прошлое и настоящее» тIисса, республикалул художествалул касмурду ядаву ва цIудуккан даву мурадрай хIасул дурсса, хъуннасса проектрал лагрулуву хьусса ва цалчинсса выставка хъанай дур. Выставкалий табасараннал уттизаманнул халичарттал коллекция ккаккан баврийну, чIалай бия ва бигьа дакъасса касму цIудуккан дуван цуксса захIмат бувссарив. Шикку тамашалий бивхьуну бия Хивуллал фабрикалул личIи-личIисса журардал бартбисурду. Выставкалий цилва щавшсса халичарттащал бия Хивуллал райондалиясса Кандык тIисса шяравасса, буттал буттахъая ирсирай халичартту щащаву дирсса, цIанихсса халичартту щащу Изаят Меджидова. ЧIявуми выставкалийсса бартбисурттугу ванил щавшсса бия. Изаятлул бартбисуртту щащавриву ляличIиссара усттаршиву дур. Ванил хIарачатрайну совет заманнай дакъа ишлану къадиркIсса ва цIанакулсса халичартту щащултран хъамадиртсса технологияртту цIудуккан дурну, ишла дуллай бур. ЦIанакулсса бартбисуртту щащавриву Изаят ишла дуллай бур тIабиаьтрал цила дикIайкунсса ххаллу. Мунияту ванил щавшсса бартбисуртту бур хъинну цIакьсса ххаллая бувсса ва ми халичартту биллай бур цимигу никирай бусса куццуй.
Му бакъассагу, ва кьинисса выставкалий бия сунттул ххаллая щавшсса сумакь. КIулсса куццуй, сунттул ххаллая халичартту щащайсса бивкIссар Ираннаву. Жулла республикалий яла ххаллилми халичартту щащайссия табасараннал.
Шиккусса халичартту бия табасараннал яла сий думи накьичру дирхьуну бувсса. Бия халичартту цIу-цIусса накьичру дирхьуну бувссагу. Мукунма бия усттарну щавшусса чантайртту, ссупрарду, кIараллил къатри, тахлил ялтту бичайсса чIиви халичартту ва чIярусса цаймигу къушлий ишла дайсса затру.
«Дагестанский аул» тIисса этнографиялул комплексрал хъунмур Зумруд Сулаймановал бувсунни хIакьинусса кьини каних халичартту щащаврил касму ядурсса регион так ца Дагъусттан хъанай бушиву.
— Ва проектрайну жун пикри хьунни ва ляличIисса касму ядуллалисса халкьуннал буллалисса захIмат агьалинангу ккаккан буван. Ва кьинисса щалла выставка хас дурну дуссар табасараннал хьхьичIавасса бартбисуртту щащаврил касму цIудуккан дурсса инсантуран. КIулсса куццуй, лавгмунил кьадру бакъахьурча, жулва бучIантIимургу бувагу бакъассар. Ва выставкалийсса агьаммур гьурттучи Изаятлул, нукIузаманнул халичартту щащаврил касму цIудуккангу дурну, хьхьичIуннайгу дунни. Ванилли хьхьичIва-хьхьичI сунттул ххаллая бартбису щавшсса. ХIакьину выставкалий тамашалий бивхьусса халичартту цинявппагу щавщун буссар хьхьичIарасса технологиярттайн бувну. Вай бартбисуртту щащансса ххаллугу ранг дурну дур тIабиаьтрал рангирдай. Вай ляличIисса бартбисуртту архIала чIявусса щащан къашайссар, вайннуха шинал лажиндарай 10 инсан зий икIайссар. Умуд бур гихуннайсса выставкардал гьурттучитал гьарза хьунссар тIисса. Изаятлул табасараннал бартбисуртту щащаврил даву цIудуккан дунни. Жулла республика дур художествалул промыслардал ва сянатирттал яла аваданмур. Мунияту ва проектрал лагрулувугу жу аьлтту буллантIиссару хьхьичIарасса касмурду кIулсса усттартал. Мукун гьунар бусса канил сянатру дусса усттартал буссар жулва Бархъаллал, Оьргърал (Кубачиял), УнцIукIуллал. Жува буржлувссару ми усттартурая, миннал магьирсса каруннал дурсса эмаратирттая ччя-ччяни буслан, ялун нанисса никиран кIулну бикIаншиврул, — увкунни Зумруд Сулаймановал.
