Сайки 4 шинай лахъи лавгсса силистта къуртал хьушиву баян бунни Москавуллал областьрал Домодедоволул шагьрулул судрал – «Авиалинии Дагестана» авиакомпаниялул ТУ-154 самолетрал командир Закаржа Закаржаев условнайну 3 шинайсса дуснакьгу увну, амнистиялийн бувну мурахасгу унни.
П. Рамазанова
ДакIнийн бутанна 2010 шинал декабрь зурул 4-нний Внуково аэропортрая гьаз хьусса ТУ-154 самолет дачIи ссятрава Домодедоволийсса аэропортрай щяритан багьссия экипажран, самолет дагьавриясса нигьачIаву дуну (3 двигатель зий бакъа). Самолетрай уссия 163 пассажир ва 9 экипажрал члентал. Цуксса хIайпнугу, му самолет гуж-балагь щяритан бюхъарчагу, 2 инсаннал оьрмурду бяливчIссия… Амма сагъну ливчIми ца зумату кунма экипажрал гьунардануллу цивппа бивкIулуща ххассал бувсса тIий бия. ЖучIа редакциялий буссия му самолетрай бивкIсса лакгу, къалакгу. Мигу бия ссавруннайн гьаз шайхтува самолет даркьуну дакъашиву гассят бувчIуна, экипажрал биялсса хIарачат бувну, пассажиртуран цIунцIиярду къахьунну самолет щяриртуна тIий.
Экипажрал командир Закаржа Закаржаевлуй тахсир ккаклай бия (силистталул хIасиллайн бувну) самолетрал эксплуатациялул тIалавшинна лиян дурну, аэропортрал взлетно-посадочная полосалул кьатIув самолет щяритаву ва мукун щяриртсса самолетрайн байча щаву («столкнулся с препятствием»). Закаржаевма судран бувчIин буллай ия цамур куццуй самолет щяритансса чара къабивкIшиву, самолет дагьан, пIякь учин бюхъайшиву чIалай, бюхъай-шай бувну, анавархъиндарай щяритан багьшиву.
Закаржа Закаржаевлул хIакъиравусса силистталул бази бан кумаг бувну бур бардултрал — пассажиртурал. Ми исват буллай бур гьамин Закаржаевлул хIарачатрайну чIявусса пассажиртал бивкIулул ххяппурттаща ххассал хьушиву.
