ЦIуссалакрал райондалул бакIчи ХIажи Айдиевлул дунни Новостройрайсса Гьамиящиял шяраву цIусса школа тIитIаврин ва Чапаевкаллал шяраву оьрчIал багъ тIитIаврин хас дурсса мероприятиярду лавайсса даражалий хIасул даврил хIакъиравусса совещание. Муний гьуртту хьунни ЦIуссалакрал райондалул бакIчинал хъунаманал хъиривчу Алик Исрапилов, ЦIуссалакрал райондалул КIулшивуртту дулаврил управлениялул хъунама Руслан МахIаммадов, райондалул Культуралул управлениялул хъунмур ХIабибат Буттаева, цIуну тIитIлатIисса оьрчIал багърал директор ва КIулшивуртту дулаврил управлениялул зузалт.
Ва батIаврий ххалбивгьунни цIусса идарартту шадлугърай тIитIиншиврулсса мероприятиярду сакин даврийн багьайсса масъалартту. Шиккува ХIажи Шихамировичлул личIи бунни вай масъаларттаха зунсса жаваблувсса инсанталгу. Вай мероприятиярдай гьуртту хьунсса дуклаки оьрчIру хIадур баву тапшур бунни Руслан МахIаммадовлуйн, музыкалул чулухасса программа хIасул дан тапшур бунни ХIабибат Буттаевайн.
«ЦIусса школа ва оьрчIал багъ тIитIаву – ЦIуссалакрал райондалул агьалинал оьрмулуву агьамшиву дусса иш хъанахъиссар. Мунийн бувну, ми мероприятиярдугу тIайла дуккан аьркинссар лайкьсса даражалий», — увкунни ХIажи Айдиевлул.
