Ихтияр дакъанура пасса­жир буцлацисса ва багаж ласласисса шупIиртурай 5000 къуруш аькIлул дихьлахьиссар. Агана машиналий закондалул ххуттава був­ккун таксилул куннасса фонарь дирхьуну духьурча, фонарь ва номердугу зевххуну, 5000 къ. аькIлулгу дихьлахьиссар. Путевой лист дакъана занай ухьурча 500 къ. аькIлул дишайссар.

Ларгсса шинал сентябрь зуруя байбивхьуну зун диркIссар №69 («таксилул хIакъиравусса») федерал закон. Му закондалул цаппарасса тIалавшиннарду цIакь хьуну иширайну зун диркIунни ва шинал январь зурул 1-нния байбивхьуну.
Таксилул хIакъиравусса ва закондалуву ккаккан бувну бур официальнайсса такси закондалул ихтияр къадуллумуния (легальный бакъамуния) цукун личIи бантIиссарив. Ва закон цIакь шаврицIун бавхIуну ххуллул низамрал тIалавшиннардавугу дахханашивуртту хъанай дур. Уттинин ми тIалавшиннардаву дакъассия таксилул хIакъиравуми. [pullquote]Январь зурул 12-нния байбивхьуну 18-ннийн бияннин МахIачкъалалив най буссия «Такси» цIанилусса профилактикалул операция.[/pullquote]
Январь зурул 1-нния байбивхьуну цIакь хьуссар административ правонарушениярттал хIакъираву Кодексраву дурсса дахханашивуртту. Мунийн бувну танмихIрайн кIункIу бан багьлагьиссар ихтияр дакъанура цала машиналий пассажиртал буцлацими ва кьай ласласими, таксилий куннасса фонарь ва таксилул лишан дирхьуну заназими.
Амма уттинин ва даву най дакъая, Ххуллул низамраву таксилучIансса тIалавшиннарду ккаккан дурну дакъа тIий. Мунийн бувну, ХIукуматрал да­хханашивуртту дурну, такси­лучIансса тIалавшиннарду ххи дурну дур ларгсса шинал апрель зурул 13-нния шихуннай щурущисса Ххуллул низамрал тIалавшиннардавун.
Ми тIалавшиннардайн був­­ну, легальнайсса таксилул шупIирначIа дикIан аьркинссар ва полициялул зузалал ккаккан ба учирча ккаккан бан аьркин­ссар таксилий инсантал буцлан­сса ва кьай ласлансса ихтияр ва путевой лист.
Таксилий дикIан аьркинссар таксометр, чуллах – шахматрал низамрай квадратру бивхьу­сса таксилул схема, магъуй – цIухъахъисса фонарь. Агана шупIир пассажир буцлансса, багаж ласлансса ихтияр дакъа, машиналий таксилул лишаннугу дирхьуну, занай ухьурча, мунан кьянкьасса танмихI бантIиссар.
Апрель зурул 13-нния шихунмай ГИБДД-лул зузалтрачIа буссар кьянкьасса хIуччарду таксирду ххал бансса ва легальный бакъасса таксистал жавабрайн буцинсса.
Ихтияр дакъанура пасса­жир буцлацисса ва багаж ласласисса шупIиртурай 5000 къуруш аькIлул дихьлахьиссар (ст.12.3.ч.2 пр1). Агана машиналий закондалул ххуттава був­ккун таксилул куннасса фонарь дирхьуну духьурча, фонарь ва номердугу зевххуну, 5000 къ. аькIлулгу дихьлахьиссар. Путевой лист дакъана занай ухьурча 500 къ. аькIлул дишайссар. МахIачкъалаливсса ОГИБДД-лул зузалтрал гьарица кьини дуллантIиссар рейдру ихтияр дакъанура пассажиртал бувцуну заназими ашкара баву ва жавабрайн буцаву мурадрай.
Мунийн бувну, жу баян буллай буру цинявппа таксистуран: цIуну ххи дурсса тIалавшиннарду дурурччуну, легальныйну зунсса чаран лякъияра тIий.
Радик Гафизов, МахIачкъалаливсса ОГИБДД-лул пропагандалул инспектор, полициялул хъунама лейтенант
ХIадур бувссар
А. Аьбдуллаевал