Вай гьантрай ЦIуссалакрал гимназиялул дуклаки оьрчIру ва учительтал хьунабавкьунни шаэр-публицист, Дагъусттаннал Чичултрал союзрал лакралмур секциялул хъунама Илияс МахIаммадовлущал.

Мунал бувсунни цалва оьрмулул ххуллия, творчествалия. Дук­лаки оьрчIал гьунарду чIявусса инсаннахьхьун буллалисса суаллугу чIявуя: хIакиннал пишалий зий ивкIсса Илияс МахIаммадов гьунар бусса шаэр акъагу, художникгу ур, мунал шеърирду бивщуну бур лакрал поэзиялул антологиялийгу, итабавкьуну бур тамансса жужругу. Лакрал чичултрал секциялул хъунама хIисаврай, Илияс МахIаммадов ччя-ччяни хьунаакьай респуб­ликалул личIи-личIисса школардай дуклакиминнащал.
Шаэрнащалсса хьунабакьаврий гимназиялул дуклаки оьрчIал ккаккан бувна музыкалул гьунардугу. Илияс МахIаммадовлулгу цалла репертуарданувасса ца­ппара балайрду увкуну, дуклаки оьрчIру ххари бувна.