КЬАСИННУЛ АРС ТТУПЧИЕВ ТТУПЧИ
Уттигъанну, оьрмулул 83 шинаву, аьпалул хьунни Хъурхъиятусса Кьасимлул ва Шуаьйнатлул арс, ххаллилсса лаккучу, захIматчи, Ттупчиев Ттупчи.
Увну ур Ттупчи Хъурхъив 1931 шинал. Аьралий бурж лахълай 5 шин дурссар морякну Керчьрай. Яла, занахьуну махъ, щалва оьрму гьан бувссар колхозраву, ятти-гъаттараха зий. Цаппара шиннардий уссия шупирнугу зий. Дяъвилул шиннардий хъунмасса захIмат бивхьуну бур къанаврду дуклай, захIматрал фронтрай.
Ттупчи ия дакI-аьмал хъинсса, аьчухсса, гьарцаннащала авкьусса, дакIнийхтуну захIмат бишайсса адамина, мунияту жяматравугу гъан-маччаначIагу ва кIулминначIагу бусравну, хIурматрай икIайва. Цалва кулпат ХIавиватлущал хъунигу бувну, ххуйну тарбиягу бувну, армиярдугу лавхъун, цалва-цалва ххуллурдайн бивчуна 5 арс ва 1 душ.
Ттупчи аьпалухьхьун лагаврил кьурчIишиву кIидачIлай, жижара буллай буру кулпатрахь, арсурваврахь, душнихь, цинявппагу Ттупчиевхъал агьлу-авладрахь.
Цал рухI хъинний дишиннав, алжаннул ххари аннав, махънал оьрмурдай барачат бишиннав.
Аммин.
Хъурхърал жямат
—————————————
ИБРАГЬИННУЛ АРС ИБРАГЬИМОВ МЯММА
Мартрал 6-нний 52 гьантта хъанай бур ххаллилсса лаккучу, Аьхъаратусса Ибрагьиннул ва Рукьижатлул арс Мямма оьрмулул 55 шинаву аьпалухьхьун лавгун.
Мямма увну ур 1959-ку шинал. Аьхъардал шяраву школагу къуртал бувну, Совет аьралуннаву къуллугъ бувну махъ, оьрчIнияцIава ятти-гъаттараха, техникалуха зун гъира бусса, захIмат ххирасса Мямма айивхьуна захIмат буллай буттал шяраву совхозрай, яла махъ, цалла фермерский хозяйствалий Бабаюртуллал райондалий.
Мямма ия дакI аьчухсса, инсаннан кумаг бан хьхьичIунсса, къирият дусса, хIал бавкьусса, аслансса зунтталчу. Январьданул 14-нний хар-хавар бакъасса лухIисса бивкIулул хаварданул гъюжу дуккан дунни мунал ххирасса кулпатрал ва уссур-ссуннал дакIру.
Мямма ахиратрал шаврил хъуннасса кьурчIишиву кIидачIлай, жижара буллай буру кулпатрахь, арсурваврахь, душваврахь, уссихь, ссурваврахь, гъан-маччанахь, щалвагу агьлу-авладрахь.
Цал бунагьирттал аьпа баннав, гьав нурданул дуцIиннав, чурх чаннаний бишиннав, алжаннул агьулданувух хьуну лякъиннав.
Махънал оьрмурдай барачат бишиннав. Аммин!
Аьхъардал ва Инишиял жямат
—————————————
Евгения МахIаммадовал
аьпалун
Агь, ттул нину Женя
Украинкая!
Укра хъиншивуртту
Дулун кIулмуръя!
Амма оьрму ганил
Ккулув бувна гьан.
ЦIимилул ссуну зий
КIулъя цIими бан.
Ккуллал МахIаммадгу
Хъинну ххирану;
Рязи байва Женял
Ккуллал кулпатру!
КIулссия ттул ниттин
ЦIуцIинал къюву!
Шайссия га гьарнан
Ца цIимилул ссу!
Ххирая ттул нину
Ккуллал жяматран;
КIулсса та буну тIий,
Агь, чIарав бацIлан!
Ххарисса хаварду
Бакъар, ттул нину!
Агь, бур Украина
Оьттул цIараву!
Талай кувннащал кув
Бур Украина;
Инсапгу инсаннан
Диртун хъамара!
ДикIара дагьлайнна
ДакIнийн, ттул нину.
Щин хъамаритайссар
Вил инсаншиву?!
КIулши Украиннал
Ларайссар хъинну!
Мунил ца барагу
Инара, нину!
Душ Рита Мурачуева
———————————
Редакциялул щалвагу коллективрал чулухату дакIнийхтунусса жижара буллай буру Абачарал душ ХIусайнаева Качардухь, ванил ххирасса ссу
Загьидат
аьпалухьхьун лагаврийн бувну.
Мукунна дард кIидачIлай буру жула даврил уртакьтал Абакарова Камилахь ва Сагидов Анвардухь.
Цил бунагьирттал аьпа баннав, рухI бигьаний дишиннав!
«Илчи» кказитрал зузалт
