ХIАИДЛУЛ АРС МАНСУРОВ МАНСУР
Уттигъанну, январь зурул ахирданий, оьрмулул 75 шинаву, аьпалухьхьун лавгунни ГьунчIукьатIрал ХIаидлул арс Мансур.

Мансур увну ур 1940 шинал ХIаидлул ва ПатIиматлул машлул кулпатраву. Ппугу дяъвилий ивкIуну, Мансур чIивинияцIава ниттин кумаг буллай, даву дуллай аьдат хьуну ия. Москавлив гидромелиоративный институт­раву дуклай уна ванал цалва оьрмулул пишану бувчIуна электрикнал пиша. Ва цувагу цайнува цува хьусса усттар ия, электрикнал даву ларайну кIулсса пишакар ия. Зий уссия цал мас­терну, яла инженерну «Мехколонна 52-лий». Яла, пенсиялийн укканнин, зий ия «Дагсельэнергостройрай». Пенсиялийн ув­ккун махъгу Мансур инсантуран цивппа заллусса къатраву ток­рал давуртту дуллай зий-занай ия. Инсаннан кумаг буван чIарав ацIан кIункIу тIисса инсан ия ва. Махъсса шиннардий, чани бакъа, шава занакьала хъанай ия. Цибан­ссар, Аллагьнал чичру укунсса духьунссия.
Мансурдул бивкIулул кьур­чIишиву кIидачIлай, жижара буллай буру Раяхь, ХIаидлухь, Сапижатлухь, Лианахь, Марияннухь, куявтурахь, цинявппагу гъан-маччаминнахь. Мансурдун бакъамур ванал оьрчIан, оьрчIал оьрчIан булуннав.
Цал бунагьирттал аьпа баннав, рухI хъинний дишиннав.
ГьунчIукьатIрал жямат

——————————————

ЖАБРАИЛЛУЛ АРС РАМАЗАНОВ АХIМАДИ
Уттигъанну аьпалул хьунни хIурмат бусса зунтталчу, захIматрал ветеран, ЧIяйннал шяравасса Рамазанов АхIмади Жабраиллул арс.
Увссар АхIмади 1939-ку шинал ЧIяйннал шяраву Жабраиллул ва Асватлул кулпатраву. ЧIяйннал дянивмур даражалул школа къуртал бувну, Совет аьралуннаву къуллугъгу бувну, ва дуклан ув­ххун ур Буйнакскаллал медучилищалувун. Ххуйсса ккаккиярттай мугу къуртал бувну, АхIмади зий ивкIун ур Ккуллал райондалий, цал Хъюйннал шяраву, яла райондалул азарханалий рентгенологну «Анаварсса кумаграй». Му бакъагу, АхIмади ия ххаллилсса тIаннул усттар. Райондалул азархана ЧIяту Ваччав бизайни, кIикку цIусса азархана буллай хъунмасса захIмат бивхьуссар ванал. Бакъахьунссар Ккуллал райондалул шяраваллаву АхIмадил нузру, чIавахьултту къабувсса къатта-къуш, нажагьсса бакъа. Мунал бувайссия жалиндалул хъирив булунсса ххуйва-ххуйсса буттукьригу.
ЧIярусса шиннардий АхIмади зий уссия райондалул азарханалий завхозну. Аьркинмунил хъирив увккун, азархана гьарзадрал щаллу бувайссия. Махъсса шиннардий, пенсиялийн увккун, шава игьалаг­лай уссия.
Дазу-зума дакъасса кьур­чIишиву кIидачIлай, жижара буллай буру АхIмадил кулпатрахь Майсаратлухь, душваврахь, куявтурахь, махъсса цинявннахьвагу. Гьав нурданул дуцIиннав. Алжаннул ххари уваннав.
ЧIяйннал жямат