Февраль зурул 4-нний МахIачкъалалив 7-мур гимназиялий хьунни Ниттил мазрал кьинилун хасъсса, «Агана гьунттий ттул маз бухлагарчан, хIадурссара на хIакьину ивчIан» тIисса цIанилусса, халкьуннал шаэр Расул ХIамзатовлул махъру гьануну лавсъсса, шагьрулул школардал оьрчIал дянивсса шеърирду буккаврил конкурс.
Конкурсраву гьуртту хьунни шагьрулул школардаясса 8-11-ми классирттал дуклаки оьрчIру. ОьрчIал буккин аьркинну бия Дагъусттаннал миллатирттал мазурдийсса шаэртурал шеърирду. Ва конкурсрал агьаммур мурад бия оьрчIавун ниттил мазрахсса гъира-шавкь рутаву, лакрал шаэртал хъамакъабивтун, миннал творчество лахьхьин даву.

И. Саидова
Шиккува кIицI лаган, ва гимназиялий ниттил мазрал дарсру дишаврих хъуннасса къулагъас дур, шикку мудангу лавайсса даражалий тIайла ду­ккай ниттил мазурдин хас дурсса конкурсру ва личIи-личIисса мероприятиярду. Ва ххуллухгу, конкурсрал даву дайдихьлай, 7-мур гимназиялул дуклаки оьрчIал Дагъусттаннал циняв миллатирттал мазурдийсса шеърирду ккалаккисса, балайрду ва къавтIавуртту щаллу дуллалисса концерт ккаккан дунни. Цинявн­нал ябацIанну, Дагъусттаннал миллатирттал зумувну чIюлу бувну бия актовый зал. Ванийн бувнугу чIалай бия ва школалий буниялагу хъуннасса аякьа душиву оьрчIан ниттил мазру лахьхьин баврих. Ва школалий ниттил мазрал дарсру дихьлай бур чIярусса шиннардий учительшиву дуллай бивкIсса, даврил опыт бусса учительница КъитIалаева Шамсият. Ни­ттил мазурдийсса шеърирду бу­ккаврил конкурсрал жюрилуву бия ДГПУ-рал Дагъусттаннал филологиялул факультетрал преподаватель, профессор, филологиялул элмурдал доктор Дибиров Ибрагьим, ДГПУ-рал Дагъусттаннал филологиялул факультетрал декан Мажидова Зайнаб, 22-мур школалул лакку мазрал дарсирдал учительница Аьбдулгъапурова Аьжа, шагьрулул школардал ниттил мазрал дарсирдал учительтал ва шаэртал.
7-мур гимназиялул дуклаки оьрчIал хIадур дурсса ххаллил­сса концертрая мукьах конкурсрал даву дайдирхьуна цалва-цалва миллатирттал мазурдий­сса шеърирду буккаврийну. Ва конкурсраву лакку мазрайсса шеърирду ккалаккисса оьрчIан кьимат бишлай бия чIярусса шиннардий лавайсса даражалий ниттил мазрал дарсру дихьлахьисса, даврил хъунмасса опыт бусса Аьжа Аьбдулгъапурова ва 27-мур школалий лакку мазрал дарсру дихьлахьисса учительница ХIанапиева Зарина. Лакку мазрайсса шеърирду ккалаккисса оьрчIал ккаккан бунни кIулну душиву цанна лакрал машгьурсса шаэртурал (Абачара ХIусайнаевлул, Мирза МахIанмадовлул, МахIаммад-Загьид Аминовлул ва цайминнал) творчество. ЗахIматну бия хьхьичIунсса кIанттурду булунми язи бугьан. Конкурсрай гьуртту хьусса цинявппагу оьрчIал цаннаяр цаннал ххаллилну бувккунни лакрал шаэртурал шеърирду.
8-9 классирттаву 1-мур кIану бувгьунни 50-мур школалул дуклаки оьрчI Аскандаров Заурбаглул. Ванал ляличIину асар хьунну бувккунни МахIаммад Ибрагьимовлул чивчусса Ханмуртазааьлихасса балай; 2-мур кIану бувгьунни 17-мур школалул дуклаки оьрчI ЦIаххай МахIаммадовлул. Ванал був­ккунни Даниял Магьдиевлул лак­рал машгьурсса шаэр Абачара ХIусайнаевлун хас бувну чивчусса ххаллилсса шеъри; 3-мур кIану бувгьунни 52-мур дуклаки оьрчI Аьлиев ХIанмадлул ва 11-мур школалул дуклаки оьрчI Рамазанов АхIмадлул.
10-11 классирттаву 1-мур кIану бувгьунни 30-мур школалул дуклаки душ Аьлиханова Мариял; 2-мур кIану бувгьунни 16-мур школалул дуклаки душ Буттаева ХIалиматлул; 3-мур кIану бувгьунни 52-мур школалул дуклаки душ Масуева Саидал.
Конкурсрал хIасиллу дуллай, Аьжа Аьбдулгъапуровал дакIнийхтуну барчаллагь увкунни цинявппагу шикку гьур­ттушинна дуван оьрчIру хIадур бувсса лакку мазрал дарсирдал учительтурахь.