Дарбантуллал оьрчIал ва чIаважагьилтурал творчествалул Дворецраву хьуну дур тимуровцынал командарттал слет. Слет цурдагу хас дурну дур Дарбантуллан 2000 шин хъанахъисса ва Хъунмасса Буттал КIанттул дяъвилий Ххувшаву ларсун 70 шин хъанахъисса юбилейрдан.
Ванивух гьуртту хьуну дур шагьрулул оьрчIал жяматийсса организация. Дарбантлив дусса дур тимуровцынал 25 команда.
Шагьрулул сайки циняв школардаясса вай командарттавусса дуклаки оьрчIру «Союз тимуровских команд» тIисса жяматийсса организациялул вакилтал хъанай бур.
Слетрайн бувкIсса хIурматлувсса хъамаллуравух чIава тимуровцы барча бан бувкIминнавух 40-ку шиннардийсса тимуровцыгу бувкIун бур.
Сакиншинначитурал бусаврийн бувну, хIакьину тимуровцы хъуннасса гьурттушинна дуллай бусса бур шагьрулул оьрмулуву, ка-кумаг бувайсса бур цивппалу яхъанахъисса дяъвилул ветерантуран, мушакъатсса халкьуннан. Мукунма чIявуну концертирттащал ва ссайгъатирттащал бияйсса бур нину-ппу, ургала акъасса оьрчIачIан ОьрчIал къатравун. Аякьа дувайсса дур шагьрулул кIичIирттавусса гьайкаллах, гьуртту шайсса бур паркру, хьхьирил зума ччюрклицIа марцI дуллалисса субботникирдавух, библиотекардаву луттирду бакьин буллалисса давурттавух.
Дарбантуллал тимуровцы мукунма гьуртту шайсса бур шагьрулий дувайсса «Ветеран живет рядом», «Солдатский платок», «Обелиск», «Бессмертный полк», «Чужого горя не бывает», «Елка дружбы», «Дети-детям!» тIисса акциярдавухгу.
Слетрал хахливу «Тимуровцы Дербента – Великой Победе» тIисса тимуровцынал дирхьусса суратру ва шинал лажиндарай цала отрядирттал дурсса давурттая чивчусса дневникру бивхьусса выставка дурну дур.
Ахирданийгу циняв тимуровцынал махъ буллуну бур вания гихунмайгу шагьрулуву яхъанахъисса бугьараминнан, мюрщиминнан, заэвминнан шайсса ка-кумаг буллан, шагьрулуву дуллалисса агьамсса давурттавух гьуртту хъанан, хъунмур никиран лайкьсса арсру-душру хьун.
ХIадур бувссар, «Дербент» администрациялул сайтрая, З. АьбдурахIмановал
