Хъусращиял шяраву кьуллалучIа ялапар хъанай уссия Аьма тIисса адамина. КIанал кулпат Заза дуссия Ницликкухъал АьвдурахIманнул ссу. Вайннал оьрчIру гьарцаннан кIулссар: ШихмахIамма Каспийскалий зий икIайссия; Ибадуллагь тIима, Завжатлул лас, гьарнан кIулссар; душ КIукIу,
Миринхъал Давудлул кулпат ва чIивимур душ РайхIанат МахIаммадов Мусал кулпат. Вай циняв ливтIунни, аьпа баннав цал. Ца Муса ялапар хъанай ур МахIачкъалалий, ччя-ччяни учIай буттал шяравунгу. Вайннал оьрчIругу ялапар хъанай буссар шагьрурдай.
Ва иш хьухьунссия ванияр 80 шинал хьхьичI, цанчирча Аьмал душ РайхIанатлун таний духьунссия 2-3 шин. Аьма ивкIун ур Кащах яттичIа. Та чIумал хъусращиял кулпатру бикIайсса бивкIссар Кащах ва ХъахъияцI-ккуллащал, ЦIурттазанний-чIарттащал хIала-гьурттуну, ттун ми хъусрал кулпатругу кIулли цуми чув бивкIссарив.
Яттугу бавкьуну ппалав, нузкьунгу цIакь дурну, кIинттул чIумал авчуссар шавай, ларххун чухъагу, ттупанггу хъарацIун бувтун канил ттархьгу дургьуну Аьма левчуну ур кIийн, бакIрайн, Чурттавалу чIалачIисса кIанайн, ивну ур. Ларкьуну дур цIангу, ганан чIалан бивкIун бур цала хъирив най, лагма буклай, хьхьичIун буклакисса 3-4 барцI. Гайннуву лахъисса чIара дуссагу бия чайва тIар. Гай яруннал цIай-цIайлул бизар увну ццахливун увтун ур. Ттухъайн ливчукун ХъахъияцIату барцIру лапва гъан-кьутIлан бивкIун бур. Цуксса кьянкьасса ухьурчагу, адамина нигьаувсун ур. Кьус икIайсса ивкIун ур чару ласун, чаругу бакъар, ттархь кIутIу дурну, лагма рукьудурнугу къалихълай, ивну ур Ххяллулун.
Шярава чани чIалай, ккаччал чIурду баллай, бурцIурдил ва кьаивтун ур. Чурх зурзу тIий, гьухъал лавсун най ивкIун ур.
Шавай къатлувун ухлахисса чIумал кIиха-шиха къабухлай, хъитлувух цала ттиликIрахсса ттупанг, цуппа бавхIусса мухIлу рурцун щяв багьну бур. Бувсун бур кулпатрахь цанма ккавкмургу, бувну бур къашавай 3 гьантта, Аьма ивкIуну ур. Ванан цIа дирзхьунссия жула Тахакьаев Аьман (аьпа баннав цал).
ЦIана вай шиннардийгу барцIру гъан хьуну бур мащайн, ятти-къушайн. Микку зузиминнангу, ххуйну лавхьхьуну, ишла бангу ярагъру бухьурча хъина.
Асадуллагь Аьллаев,
ш. Хъусращи
