Декабрьданул 24-нний МахIачкъалалив бувкIунни Дагъусттаннал ХIукуматрал машан лавсъсса Нефтекамскаллал автомобиллал заводрал автобусру.
ХI. Аьдилов
Жяматрансса транспорт ларсъссар Республикалул хъунама Рамазан АьбдуллатIиповлул сипталийну ва премьер-министр
Аьбдуссамад ХIамидов гьурттуну. Автобусру лавсъссар «Точки роста», инвестиции и эффективное территориальное управление» тIисса ДР-лул приоритетсса проект дузрайн дуккан даврил хахливу.
ЦIанасса ппурттуву бучIан бувсса автобусру бавцIуну бур МахIачкъалаллал хъунмур майданнив. Гьарца автобусравун лагайссар 100 инсаннаяр ххишала. ЩябикIайсса бур 24 кIану, бур оьрчIал коляскардансса кIанттурду ва мукунма мушакъатминнансса кIанттурдугу.
Ми автобусру заназаврийну бачIи-кьачIину щаллу бантIиссар льготарду дусса инсантурал пенсионертурал, инвалидтурал, школьниктурал, студентътурал масъалартту. ЦIубутIуй жяматийсса транспорт занантIиссар МахIачкъалаллал агьамми кучардавух: Р. ХIамзатовлул цIанийсса, 1-ма Петрдул цIанийсса, Имам Шамиллул цIанийсса, А.ХI. Ахъушинскийл цIанийсса, мукунма Каспийск шагьрулул кучардавух.
Транспорт ларсъссар автобусру итабакьайсса заводрал багьлий. Контракт чирчуну диркIссар 439 млн. ва 800 азарда къурушрансса, миннувату 250 млн. къурушру дуллуссар федерал бюджетравату. Ца автобусрал багьа бур 7 млн. ва 300 азарда къуруш. Республикалул ласунтIиссар цинявппа 121 автобус, миннувату 69 автобус бур «Нефас», 30 — «Брафис» журалул, лирчIми дур спецтехника.
