Вай гьантрай республикалул гьарцагу идаралий шинал хIасиллу дуллалисса, хьхьичIун бувкми пишакартал барча буллалисса батIавуртту най дур.
МахIачкъалаллал КIулшивуртту дулаврил управлениялий хьусса батIаврий декабрьданул 24-нний гьуртту хьунни ДР-лул элмулул ва кIулшивуртту дулаврил министр Шагьабас Шагьов, шагьрулул бакIчинал хъиривчу Рафик Буттаев, ведомстварттал вакилтал ва МахIачкъалаллал шаннагу райондалул администрациялул пишакартал.
З. АьбдурахIманова
БатIаву тIиртIунни шагьрулул КIулшивуртту дулаврил управлениялул хъунама ТIагьир Мансуровлул. БатIаврий ххалбигьин лавсъсса агьамми суаллу бия яла нанисса 2014-ку дуккаврил шинал хIасиллан ва ялун нанисса цIусса шинал дувансса давурттан хасъсса.
БатIаврий гьуртту хьусса циняв пишакартал ва хъамал барча буллалисса махъ лахълай, Шагьабас Шагьовлул кIицI лавгунни, яла нанисса шинал республикалул кIулшивуртту дулаврил аралуву ххуйсса, цIа дансса ккаккияртту хьушиву ва ялун нанисса шиналгу вайннуярдагу ххуйсса хIасиллу хьун дансса мурадрай цаппара хъунисса давуртту дан дакIний бушиву.
Шикку министрнал барчаллагь баян бунни гьашину дурсса давурттавух чялишсса гьурттушиву дурсса цинявппагу пишакартурайн, ведомстварттал вакилтурайн.
БатIаврий, мукунма, барчагу бувну, ххуй-ххуйсса бахшишру дуллунни «Шаг в будущее» тIисса элмийсса конференциялий гьуртту хьусса шагьрулул школардал дуклаки оьрчIан.
Мукунма шикку ххалбивгьунни наркомания ппив шаврин хасну дуккаврил идарарттаву дурсса давурттан хасъсса, мушакъатсса оьрчIахь ми цивппа яхъанахъиний дарсру дишаврил ва «Русский язык 2013-2017 г.г.» тIисса муниципал программа щурущи даврин хасъсса суаллу. Шиккува мукунма кIицI лавгунни цалва-цалва къуллугъирттай ххуйсса ккаккияртту дан бювхъусса пишакартуран арцуйну чIарав бацIаврил масъалагу.
Рафик Буттаевлул чIурчIав дунни, ЦIусса шинал байрандалул хьунийн школардал ва оьрчIал садикирттал хъуниминнал, шадлугърал тагьар чIаланшиврул, багьайсса хIадуршинна дуван аьркиншиврий. Ванал бусаврийну, школардал каялувшиннардая ялун нанисса шинал тIалав буллан тIий бусса бур хъуннасса къулагъасралун ласун информациялул ара, цалва-цалва сайтру цIубувну, ми сантирайн бувцуну, зузи буваву.
