Къизилюртуллал райондалийсса Султанянгиюрт тIисса шяраву хIакьинусса кьинигу ялапар хъанай бур 1965 шинал бизан бувну бивкIсса Хъанардал шяраваллил агьлу.
2011 шинал ва шяраву тIивтIуну бур цIусса школа. 2013 шинал декабрь зуруй тIурча, школалул коллективрал ва Хъанариясса Совет Союзрал Виричу ХIажи ХIусманович Бугъановлул мачча-гъаннал тавакъюрайн бувну, ва школалун дуллуну дур ХIажи Бугъановлул цIа.
ЧIярусса шинну ларгун дунугу, жула Виричунал цIа школалун дуллуну абад дунни ва шяраву.
Утти ХIажи Бугъановлул аьпа абад бавриха зузисса фондран дакIний бур школалул хIаятраву Виричунан гьайкал дацIан дан. Му бакъассагу, фондрал хIарачат бан тIий бур Хъунмасса Буттал кIанттул цIанийсса дяъвилул тарихран, та дяъвилуву гьуртту хьусса дагъусттанлувтуран, ХI. Бугъановлун ва му кунмасса Вирттавран хас бувсса музей бан.
Амма вай давурттан чIярусса арцу аьркин дагьлай дур. Фондраща ми давуртту дан бюхъан тIий бур так спонсортурал кумаграцIух.
Гьашину Буттал кIанттул цIанийсса Хъунмасса дяъвилуву совет халкьуннал Ххувшаву ларсун 70 шин хъанай духьувкун, вай давуртту Ххувшаврил кьинилийннин бартдигьин ччай бур.
Ва давриха зузиминнан кумаг бан, чIарав ацIан ччисса ухьурчагу, ришлай буру фондрал реквизитру ва адрес ва тавакъю буллай буру цалва миллат ххирасса, миллатрал тарихрал кьадру-кьимат бусса гьарицагу инсаннахь ва уздансса даву дузрайн дуккан дан шайсса кумаг бувара тIий.
Расчетный счет:
№40703810204020000019
в ОАО «Россельхозбанк»:
367010. ш. МахIачкъала, пр. Гамидова 54 «а»
БЖ 048209793, ИНН
7725114488/КПП 054143001
ОГРН 1027700342890
К/с 30101810000000000793
в ГРЦК НБ РЕСП. Дагестан БАНКА России
Фондрал президент Давуд Бугъанов буслай ур вава масъалалул хIакъираву цува ДР-лул КIулшивуртту дулаврил министерствалийн, Аьрали комиссариатрайн, мукуна шаннагу лакрал районнал бакIчитурайн увкшиву.
Шаннагу райондалул бакIчитурал шайсса кумаг банну увкуну бур. Министерствалул ва Аьрали комиссариатрал хъуниминналгу арцуйнусса кумаг бансса сант дакъар, дуллалимунил чIарав бацIанну, цамур журалийсса кумагру банну увкуну бур.
— 9-мур майрайннин личIину хъуннасса чIун лирчIун дакъар. Му чIумалнин жунма дакIниймур бартбигьин цахъи анавар буккан багьлай бур. На цаймигу жулва къуллугъчитурайн уккан дакIний ура. Умуд бур цалла Ватангу, миллатгу ххирасса гьарицагу лаккучунал гьурттушинна данссар жула Виричунал аьпа абад буллалисса давурттаву, — тIий ур Давуд Бугъанов.
————————————
Бугъанов ХIажи ХIусманович увну ур 1918 шинал сентябрь зурул 25-нний Лакрал райондалийсса Хъанардал шяраву. 1939 шинал Дагъусттаннал педагогический институтгу къуртал бувну зий ивкIун ур МахIачкъалаллал медициналул техникумраву.
Аьралуннавун увцуну ур 1939 шинал. 1941 шинал дуклай ивкIун ур НКВД-лул мюрщими лейтенантътал хIадур байсса курсирдай. Мура шинал талай ивкIун ур Баргълагавал фронтрай. Гьуртту хьуну ур Москавуллахлусса, Ккавкказуллахлусса талатавурттаву.
1943 шинал февраль зуруй захIматсса щаву дирну госпитальданийн агьну ур. Мичча увккун махъ тIайла увккун ур дуклан. 1943 шинал ноябрь зуруй хIаписартурал курсругу къуртал бувну, цIунилгу фронтрайн лавгун ур.
1944 шинал сентябрь зуруй ХIажи Бугъановлул батальон хьхьичIва-хьхьичI Венгриянал аьрщарайн бувхминнавух диркIун дур.
Мура шинал ноябрь зуруй капитан ХI. Бугъановлул каялувшиннаралусса батальондалул душманнал ккуллардал цIаравух Тиса тIисса нехгу лархъун, лахъазан дургьуну дур. Мукьийла гьужум бувну нанисса душман махъунмай бищун бувну, полкрал вайми подразделениярттангу неххал тия чулийн лахъансса сант руртун дур.
Цувагу къучагъну талай ивкIун ур, лахъазан канища къадуккан.
ХIажи Бугъанов мукуна гьуртту хьуну ур Будапештлив ва Веналийн гьужум бувсса операциярттаву. 1945 шинал апрель зуруй ва ивтун ур разведотделданул хъунаману. 1945 шинал март зурул 24-нний бувксса СССР-данул Верховный Советрал Президиумрал хIукмулийну немецнал фашистуращалсса талатавурттаву ккаккан дурсса къучагъшиврухлу ва командованиялул тапшур бувсса аьрали бигарду эбратну щаллу бувну тIий полковник ХIажи ХIусманович Бугъановлун Совет Союзрал Виричу тIисса цIагу, Лениннул орден ва Мусил цIукугу буллуссар. Му бакъассагу, ХIажи Бугъанов лайкь хьуну ивкIссар ЯтIул ттугълил, Буттал кIанттул цIанийсса дяъвилул 1-мур даражалул ва ЯтIул цIукул орденнан ва медаллан.
Дяъви къуртал хьуну махъгу Бугъанов ЯтIул Аьралуннаву къуллугъ буллай ивкIссар.
1946-1947 шиннардий каялувшиву дуллай ивкIссар МахIачкъалаливсса педагогический институтрал аьрали кафедралий 1950 шинал къуртал бувссар М. Фрунзел цIанийсса Аьрали академия. 1949 шинал декабрь зуруя айивхьуну ва ивкIссар Совет Аьралуннал ВВС-рал Агьаммур штабрал военно-научный управлениялул хъунама элмийсса зузалану. 1953 шинал февраль зуруя айивхьуну зий ивкIссар Харьковрай.
ХIажи Бугъанов дунияллия лавгссар 1987 шинал май зурул 20-нний, оьрмулул 69 шинаву.
Увччуну уссар Къизилюртуллал райондалийсса Султанянгиюрт шяраву.
