ОЬМИКЬАГЬДИНАЛ АРС КЬУРБАНОВ АЬЛИХАН
Ва ялун дуркIсса шинал январьданул 1-нний, машиналул авариялущалсса бала-апатIраву, оьрмулул 32-чинсса шинаву дунияллия лавгунни зирангсса, итххявхсса жагьил, ялун уклакисса, пагьму бусса хIакин Кьурбанов Аьлихан Оьмикьагьдинал арс. Ятинтал хьунни кIива, чIиру кунмасса, 3 ва 6 шинавусса, мюрщулт.

Щащар хьунни имин­сса, тIул-тIабиаьтрал бувччусса чIаращар ххуй Марина. Аь-къа­на тIий ливчIунни нину-ппу, уссу-ссу, гъанми.
Аьлихан увссар 1983-ку шинал УзбакIисттаннал хъун шагьрулий Ташкантлив, тиккун Дагмединститут къуртал бувну мукьах зун тIайла бувккун бивкIсса хIакинтал Ккулатусса Оьмикьагьди ва Мааьзат Кьурбановхъал кулпатраву. 2001-ку шинал увххун, 2006-ку шинал къуртал бувссар МахIачкъалалив Дагмедакадемиялул стоматологиялул факультет, гиккува – интернатура ва ординатура. Тания шинай вай 7-8 шинал мутталий гъирарай зий уссия МахIачкъалалив хIакин-стоматологнал касмулий. Республикалий машгьурсса стоматолог, медициналул элмурдал доктор Оьмикьагьди Рамазанович ххарину икIайссия арсная, цалла сянатрал ва элмулул кIулли тапшур дан лайкьсса варис уклай ур тIий. Цибанссар, чичру укунсса диркIун дур. Лавгунни жула Аьлихан дунияллия, аьрщи-чаругу, гъаннал дакIругу аьтIи дурну. Гамур дунияллий алжаннул ххари аннав цув, гьав нурданул дуцIиннав.
Аьлихан аьпалул шаврил жижара буллай, ва кIусса кьурчIишиву дакIнийхтуну кIидачIлай буру мунал кулпат­ращал Маринащал, арсурвавращал Ширванинащал ва Кьурбаннущал, ниттищал Мааьзатлущал, буттащал Оьмикьагьдинащал, ссищал Анжелащал, уссищал Заурдущал, щарнил буттащал Михаиллущал, циняв гъан-маччаминнащал, щалва Зирбухъал ва Дурнахъал авлад­ращал. Амин!
Ккуллал
ва Хъюйннал жямат

——————————————————————

АЬВДУЛЛАГЬЛУЛ АРС
ХIАМИДОВ АЬВДУЛХIАМИД
Декабрь зурул 11-нний, оьр­мулул 85 шинаву, аьпалухьхьун лавгунни ххаллилсса зунттал арс, бюхъу-бажар бусса пишалул заллу, ЧIяйннал шяравасса ХIамидов АьвдулхIамид Аьвдуллагьлул арс.
АьвдулхIамид увну ур августрал 28-нний 1930 шинал ЧIяйннал шяраву.
ЧIяйннал дянивмур даражалул школагу къуртал бувну, 1955 шинал дуклан увххун ур Шяраваллил хозяйствалул институт­равун, му къуртал бувну 1960 шинал, гъаттарал хIакиннал пиша лавхьхьуну бур. Институт къуртал байхту, тIалав увну, лавгун ур Нугъайнал райондалийн В.И. Лениннул цIанийсса «Вперед» тIисса совхозрайн.
Гъаттарал хIакиннал пиша ххуйну лавхьхьусса, зун гъира бусса, цачIава зузисса зузалтрал хIурмат бусса АьвдулхIамидлул 15 шин дурну дур ва совхозрай зий гъаттарал азарду хьун къаритлай, хъин дуллай ва миннул жинс ххуй дуллай. Министерст­валул зооветеринарный отделданул хIукмулийн бувну, ххаллилсса пишакар хIисаврай, АьвдулхIамид увцуну ур Къизлардал райондалийсса «Жданово» тIисса совхозрайн. Пенсиялийн укканнин зий ивкIун ур ва совхозраву, къатта-къушгу, кулпатгу бувну, хъунмасса кьадру-кьиматращал зузалтрал дянив ва каялувшиннарачIа. Ванан дуллуну дур чIярусса бахшишру, ХIурматрал грамотарду. ДакIнийхтуну бувсса захIматрахлу лайкь хьуну ур «Заслуженный ветврач» хIурматрал цIанингу.
Цалва аьзизсса кулпат Муслиматлущал вайннал, ларайсса кIулшивурттугу дуллуну, хъуни бувну бур 2 арс Басир ва Абрек.
АьвдулхIамид ия дакI-аьмал хъинсса, агьалинащал хIал бавкьусса, хъярч-махсара бан кIулсса, ЧIяйннал жяматраву хъанахъисса кьурчIисса ва ххарисса кьинирдал чIарав мудангу ацIайсса адамина. Цибанссар, бивкIулун мажал бакъассар, Аллагьнал буллусса гьантта ххи-чан бан къашай.
АьвдулхIамидлул бивкIулул кьурчIишиву кIидачIлай, жижара буллай буру ванал кулпатращал Муслиматлущал, арсурвавращал Басирдущал, Абреклущал, ссурвавращал Ашриплущал ва Нураниятлущал, махъсса цинявппагу гъан-маччанащал.
АьвдулхIамидлун къабуллусса оьрмулул бутIа ванал кулпатран, махъминнан булуннав, алжаннул ххари аннав, рухI хъинний дишиннав. Амин.
ЧIяйннал жямат

—————————————————

БУТТАЛ АРС МАММАЕВ ПАТТАХI
Уттигъанну аьпалул хьунни хIурмат бусса зунтталчу, дяъвилул ва захIматрал ветеран Маммаев ПаттахI Буттал арс.
Увссар ПаттахI 1926 шинал Шахьуйннал шяраву. Га чIу­мул оьрчIал кунна, ПаттахIлул оьрчI­шивугу, жагьилшивугу дагь­­­ссар захIматсса дяъвилул шиннардийн. Каспийскаллал ремесленный училищалуву дуклакисса 16 шинаву­сса чIава жагьил, цала чIунархIал оьрчIащал, эвакуация хIисаврай, гьан увссар Дянивмур Азиянавун. Тих, Коканд, Самаркьанд шагьрурдай слесарьну зий ивкIссар. Махъ МахIачкъалалив паровозирттал депораву зий ивкIссар машинистну.
Муххал ххуллул аьралуннаву къуллугъгу бувну, 50-ку ши­ннар­дия айивхьуну, пенсиялийн укканнинцIасса ПаттахIлул захIматрал ххуллу бавхIуну бия «Дагэлектромаш» заводрацIун ва «Дагколхозстройрал» Механизациялул управлениялуцIун. Ва 18 шинал лахъишиврий ия «Дагэлектромаш» заводрал партийный комитетрал хьхьичIунсса членну, шамийла увчIуну ур МахIачкъалаллал шагьрулул советрал депутатну, ДАССР-данул Верховный судрал народный заседательну.
ПаччахIлугърал ПаттахIлул бивхьусса захIматран лавайсса кьимат бишлай, ванан дуллуссар «Знак Почета» орден, «За доблестный труд в годы Великой Отечественной войны 1941-1945 годов», «В ознаменование 100-летия со дня рождения В.И. Ленина» медаллу, РСФСР-данул, ДАССР-данул, ДАССР-данул МВД-лул Верховный советрал Президиумрал ХIурматрал грамотартту, чIяву-чIявусса цаймигу ведомстварттал грамотартту ва Барчаллагьрал чагъарду.
Маммаев ПаттахIлул къуш шярава шагьрулийн цалчин бивзсса къушри. Шярава шагьрулийн бувкIминнал, къутаннайн тIий, цайми-цайми кIанттурдайн тIий, лавай-ялавай наниминнал мудан вайннанний ликказан дайсса диркIссар, Маммаевхъал къатрал нузру хъамаллурал хьхьичI мудангу тIиртIуну диркIссар.
ПаттахIлул ва ванал кулпат­рал Шамайл, ххаллилсса тарбиягу дуллуну, цалва-цалва оьр­мурдал ххуллурдайн бивчунни 4 оьрчI. ПаттахIлул цалва 13 оьрчIал оьрчIал оьрмулувухгу хьхьичIунсса гьурттушинна дайва, минналмур тарбиялувугу цалва чулухасса хъунмасса бутIа бихьлай, 12 правнукнаясса ххаришивугу хъуннасса дикIайва ванал.
ПаттахI ия дакI хъинсса, аьчухсса, лагма-ялттунащал авкьусса, инсаннан хъинбала буван анавар уккайсса, цалла шяраваллил ва щаллагу ватандалул бучIантIимуний дакI цIуцIисса хъуначу.
ПаттахIлул бивкIулул кьур­чIишиву кIидачIлай, жижара буллай буру ванал кулпатрахь Шамайхь, арсурваврахь АбутIалиблухь ва Рашидлухь, душварахь Майяхь ва Асиятлухь, куявтурахь МихIаммадахь ва Кирамуттиннухь, арснал хъаннихь, оьрчIал оьрчIахь, махъсса щалвагу агьлу-авладрахь, гъан-маччаминнахь.
ПаттахIлул рухI хъинний дишиннав, пирдавс-алжан нясив баннав.
Шахьуйннал жямат

——————————————

ХIАЖИНАЛ ДУШ БИРГЬУЗОВА САБИРАТ
Оьрмулул 75 шинаву жуятува батIул хьунни гьарца багьу-бизулуву хIал бавкьусса, бювхъусса хъамитайпа, ХIажинал душ Биргьузова Сабират.
Сабират бувну бур 1939-кусса шинал Бархъаллал шяраву, Биргьузхъал ХIажинал ва Исккандархъал Ххадижатлул къушлий.
Сабират зийгу, яхъанайгу буссия Нальчик шагьрулий, ти­ккува аьпалухьхьунгу лавгунни. Тихунмай гьаннин зий бивкIссар Анжиливгу: III Интернационал фабрикалий, университетраву поварну ва цаймигу кIанттурдай. Ва бия 5-мур разрядрал повар. Сабират цинявннан кIулссар кагу, дакIгу марцIсса зузала ва инсан хIисаврай, цинма заралнугу, цаманан хъинбала бан ччисса хъамитайпа хIисаврай.
Сабиратлул бивкIулул кьур­чIишивугу кIидачIлай, жижара буллай буру ванил душнихь ва махъсса цинявппагу гъан-маччаминнахь.
Бархъаллал жямат

Ссихасса ххару

Уссурссуннал дяниву
Вил хIурмат лавайссия.
Чулданий личIарчагу,
Чумартну жан дуллуссар.

Дунияллул ххазина
Вища букан къавхьунни.
Душнил оьрчIал барачат
Ина жун кьабивтунни.

ЦIубарз кунма, жул ялун
Архния бучIайссияв,
Вила дакIнин лавхьхьусса
Ссалам-ссайгъатгу лавсун.

Ина бавцIуний мудан
Тяхъашиву дикIайва,
Мюрщи-хъуни ххари бан
Инара дайдишайва.

Вил кунмасса бакъасса
БивкIу нясив къабаннав,
Чулданий личIарчагу,
ЧIарав мудан чув ивкIсса.

Чичрулун чаран бакъар,
Чан хьунна тти жун ина.
Жул дакIурдиву тIурча,
Сагъну буссара мудан.
Ссупиянова Хамис

—————————————

АХIМАДХАННУЛ АРС ГЪАЗИИБРАГЬИМОВ ЩАЙХРАМАЗАН
Январьданул 6-нний, оьр­мулул 61 шинаву, ахиратравун лавгунни 1-мур ЦIувкIратусса АхIмадханнул арс Гъазиибрагьимов Щайхрамазан.
Щайхрамазан увну ур ок­тябрьданул 14-нний 1953 шинал 1-мур ЦIувкIуллал шяраву медициналул зузалал кулпатраву. Буттал касмулул ххуллу бачин бан Щайхрамазан, 1972 шинал дянивмур даражалул школагу къуртал бувну, увххун ур Дагъусттаннал медициналул институтравун. 1978 шинал хъинну ххуйну институтгу къуртал бувну, зий ивкIссар Свердловская областьрай хIакин-невропатологну. 1982 шинал зана хьуну увкIссар Ккуллал райондалул азарханалий зун.
Щайхрамазан ия дакI хъинсса, коллективраву авкьусса, хъунанал хIурмат бусса, мюрщинах аякьа дайсса, ас-намус бусса инсангу, гьунар бусса хIа­кингу. Ванал хIурмат цала хъин бувсса халкьуннаву мудан личIантIиссар.
Щайхрамазаннул бивкIулул кьурчIишиву кIидачIлай буру мунал ниттищал, кулпатращал, арснащал, душвавращал, куявтуращал, ссурвавращал, миннал наслулущал.
Щайхрамазаннул гьав нурданул дуцIиннав, алжаннул ххари аннав!
1-мур ЦIувкIуллал жямат

——————————————-

САДИКЬЛУЛ АРС КьИБИДОВ ШАМСУТТИН
Тамансса шиннардий къашавайгу ивкIун, аьпалувух ивхьунни ххаллилсса зунтталчу, 1-мур ЦIувкIратусса Кьибидов Шамсуттин Садикьлул арс.
Увну ур Шамсуттин 1931-ку шинал 1-мур ЦIувкIрав. Миккува дянивмур даражалул школа къуртал бувну, дуклан увххун ур МахIачкъалаллал шяраваллил хозяйствалул техникумравун. Ветеринарнал пишагу лав­хьхьуну, зий уссия буттал шяраву, 1990-ку шиннардия шинай – Ваччав ветуправлениялий. АпатI шаврийну шанийн агьну, махъсса шиннардий къашавай арсначIа, душничIа икIайва.
Шамсуттин ия цалла даву лавайсса даражалий дачин дувайсса пишакар. Цалва кулпат Басиратлущал хъуни бувну, щаллу бувна 3 душ ва 1 арс.
ЧIярусса шиннардий дакI­нийхтуну бивхьусса захI­мат­рахлу Шамсуттиннун дуллусса хIурматрал грамотартту, бахшишру чIяруя. Ва ия захIматрал ветеран.
ДакIнийхтунусса кьурчIи­шиву кIидачIлай буру Шамсу­ттиннул арснащал, душваращал. Ванан къабуллусса оьрму махъминнан булуннав. Алжаннул ххари уваннав, гьав нурданул дуцIиннав.
Ккуллал райондалул вет­управлениялул, ветлабораториялул зузалт

—————————————————————————-

АБАКАРДУЛ АРС
ИСАКЬОВ АПАННИ
Тамансса хIаллай шануцIухгу ивкIун, дунияллия лавгунни КIямашрал шяраваллил ца ттарцIну хъанахъисса, маслихIат, насихIат бусан бюхъайсса инсан, хъуначу, зунтталчу Абакардул арс Апанни Исакьов.
Апанни увну ур КIямашрал шяраву 1928 шинал Абакардул ва Щазал кулпатраву. Уссурвавраву, ссурвавраву Апанни ия чIана-чIавама. Тай захIматсса дяъвилул шиннардий ванангу багьссар, захIмат баву дакъассагу, дард-къумашивуртту духIан. Хъуна-хъунама уссу ЯрахIмади иривссар дяъвилул мугьалттухьхьун, хъиривма Исякь, биялсса бакIрачIангу бувкIун, рухI дуну зана хьуссар дяъвилия. Миннал дард-буруккинтру ккухIин багьссар вайми уссу-ссурвавращал Апаннинангу. Яла цала шама арсналссагу. Къумашивур­ттал, захIмат-жапардал лахIан къаув­ссар Апанни. ИвкIссар захI­матрал фронтрайгу, колхозрал давурттайгу. Шагьрулийн ивзун махъ зий ивкIссар М. ХIажиевлул заводрай, махъ, завод лавкьуну, угьара хьуну, пенсиялий ша­ва щяикIаннин. Заводрайгу, лагма-ялттуминначIагу Апанни къакIулсса чансса бикIайва, хъунмая муначIансса хIурмат-иззат, дуллуна медаллу, бахшишру.
Апанни дунияллия лавгсса къумашивугу кIидачIлай, жижара буллай буру кулпат Ххадижатлухь, оьрчIал оьрчIахь, уссу-­ссурваврая бивзминнахь, щалвагу Абакархъал тухумдалухь. Апаннинал барачат махъ ливчIун лякъиннав, махънал оьр­мурду лахъи баннав. Апаннинал рухIгу алжаннул ххари даннав, гьав нурданул дуцIиннав.
КIямашрал жямат

———————————————

Майсарат дакIнийн бутлай
2013 шинал январь зурул 8-нний, оьсса азаруннища хха­ссал бан къавхьуну, жуяту яла лавгуна Буйнакск шагьрулул агьалинангу, ЧIяйннал жямат­рангу бусравсса хъамитайпа ХIусманова Майсарат Рамазаннул душ.
Янил ляпI учиннин шин ларгунни, амма ва жущала бакъассар учин дакIнил кьамул буллай бакъар.
Къачансса хьунабакьай жунма оьтту-ттурчIал ятсса бухьурчагу дакIнил базуну хьусса инсантал. Мукунминнавасса бия ЧIяйннал шяравасса Майсаратгу. Майсарат бия аьмал-хIал бавкьусса, пахру-ххара, дакI хъуншиву дакъасса, сахаватлув­сса инсан. Мунил аьчухшиврия, захIмат ххирашиврия буслан бикIайва цал унугу минначIа хъамалу хьумагу, чIахху-чIарахмигу. ЧIивинащалгу, хъунанащалгу цанма лавхьхьусса мазрай гъалгъа бан кIула Майсаратлун. Инсантал ду-дакъашиврух бурувгун личIи къабайва.
Майсаратлул хъинсса дакI, бусравсса цIа, шагьрулуву уртту-тIутIив дугьлай, шагьру чIюлу бан бивхьусса захIмат тачIав дакIния къабукканссар ванищал зий бивкIминнан, ЧIяйннал жяматран, чIахху-чIарахнан.
ИкIай ца-ца инсан личIину хъунмасса бурж биттур къабуллайнугу, цала кIанттай цува акъа чара бакъасса, мунал кIану бугьансса цама къаляхълахъисса. Мукунсса бия Майсаратгу. Ва бакъашиву ялу-ялун асар хъанай, хIайп тIийнма бур циняв­ппагу ва кIулну бивкIми.
Шин гьарчагу, жуйнма жува букIлай бакъару. Дурар аьрар­ххусса дакIру аьчух дуккан. 15-20 шинай щилчIав къадурсса давурттив 2 шинал лажиндарай дурну, Щурагьиял шагьру тIутIавун бахьлаган бувссия Майсаратлул. ХIакьинусса кьинигу шагьрулул агьалигу, каялувчиталгу рязину, барчаллагьрай буслай бур ванил дурсса давурттая. Ми давуртту ттиния тихуннай дуллан цала бакIрайн лавсунни ванил лас ХIусманов МахIаммадлул. Мугу кулпатрал дайдирхьумур дяличIан къаритлай зий, агьали рязи бан хIарачат буллай ур.
Шагьрулуву бувгьусса жагьил­сса мурхьирдайнгу, гъили дагьайхту тIитIинтIисса караматсса тIутIайнгу я щувкун, шагьрулул агьалинан дакIнин багьавантIиссар вайннуха къайгъурдай бивкIсса Майсарат. Ванил сагъну бунува дирзунни циннасса гьайкал.
Щурагь ялапар хъанахъи­сса ЧIяйннал жямат, гъан-маччами, дустал